?മയൂരി? [The Beginning][ഖല്‍ബിന്‍റെ പോരാളി ?] 822

പക്ഷേ അത് കേട്ട് അവളുടെ മുഖത്തെ ചിരി പെട്ടെന്ന് ഇല്ലാതായി. അവളുടെ മുഖം കോപത്തോടെ എന്നെ നോക്കുന്നതാണ് ഞാൻ പിന്നെ കണ്ടത്. ആ നോട്ടത്തില്‍ വായില്‍ ഇരുന്ന നാരങ്ങ മിഠായി പോലും പേടിച്ചു ഇറങ്ങി പോയി… അവളുടെ ഉണ്ടകണ്ണ് വികസിച്ച് വികസിച്ച് കൃഷ്ണമണി ഇപ്പൊ പുറത്ത്‌ ചാടും എന്ന സ്ഥിതിയില്‍ ആയി. സംഗതി പണി പാളി എന്ന് മനസ്സിലാക്കിയ ഞാൻ ദയനീയമായി അവളെ നോക്കി. അവൾ ചുണ്ടിൽ ദേഷ്യം വരുത്തി മുഖം വെട്ടിച്ച് സ്കൂൾ അങ്കണത്തിലേക്ക് നടന്നു. ഞാൻ എന്ത് ചെയ്യണമെന്നറിയാതെ നിന്നു. അവൾ കുറച്ച് ദൂരം പോയപ്പോഴാണ് ഇത്തിരി ധൈര്യം വന്നത്.

““മായു….”” ഞാൻ ഉറക്കെ വിളിച്ചു. അവൾ അത് കേട്ടു എങ്കിലും ഒന്ന് തിരിഞ്ഞ് പോലും നോക്കാതെ നടന്നകലുകയാണ് ചെയ്തത്. അവൾ ഓഫീസ് റൂമിലേക്ക് പോയി പരാതി പറയുമോ എന്ന് പേടി അപ്പോഴാണ് എന്റെ മനസില്‍ ഉദിച്ചത്. അത്രയും നേരത്തെ നില്പ് അവസാനിപ്പിച്ച് ഞാൻ അവൾ പോയ വഴിയെ ഓടി…

ഭാഗ്യത്തിന്‌ അവൾ പോയത് അവളുടെ ക്ലാസിലേക്കാണ്. അല്പം ആശ്വാസം കിട്ടിയെങ്കിലും അവൾ കുറച്ച് നേരമെങ്കിലും തന്ന അവഗണന അത് വേദനയായി മാറി. അത് കണ്ണില്‍ നനവ് സൃഷ്ടിച്ചു. അന്ന് വൈകുന്നേരം ക്ലാസ് കഴിഞ്ഞതും അവൾ പുറത്തിറങ്ങി വരുന്നതും കാത്ത് ഞാൻ ഗേറ്റിന്റെ അടുത്ത് തമ്പടിച്ചു. പക്ഷേ എന്നെ കണ്ടിട്ടും ഒരു വാക്ക് പോലും മിണ്ടാതെ സ്ഥിരമായി നല്‍കുന്ന ചിരി നല്‍കാതെ ഒരു ലോഡ് പുച്ഛം വിതറി അവൾ നടന്നു നീങ്ങി. ഇത്രേയും നാള്‍ കണ്ട സ്വപ്നങ്ങള്‍ എല്ലാം പാഴായി പോയത് പോലെ എനിക്ക് തോന്നി.

അധിക നേരം അവിടെ നിൽക്കാൻ എനിക്ക് സാധിക്കുമായിരുന്നില്ല. കാരണം അവിടെ വെച്ച് എന്ത് ഉണ്ടായാലും അത് അച്ഛന്റെയും അമ്മയുടെയും അടുത്ത് എത്തുമായിരുന്നു. അതിനാൽ മനസില്‍ നുരഞ്ഞു പൊങ്ങിയ സങ്കടത്തെ എങ്ങിനെയോ ഒതുക്കി നീറുന്ന മനസ്സുമായി വീട്ടിലേക്ക് നടന്നു.

അവൾ ഇനി അമ്മാവനോട് പറയുമോ? എന്നാല്‍ തീര്‍ന്നു. എല്ലാവരും കുടെ ചീത്ത പറഞ്ഞ്‌ കൊല്ലും. അടുത്ത സംശയം എന്റെ മനസില്‍ വന്നു. എന്താവോ എന്നറിയാതെ മനസ് ആകെ കൂലങ്കഷമായി ചിന്തിച്ചു തുടങ്ങി.

വീട്ടില്‍ എത്തിയിട്ടും മനസ് ശാന്തമായില്ല. അച്ഛനും അമ്മയ്ക്കും വരുന്ന ഓരോ ഫോൺ കോളും എന്നെ ഭയപ്പെടുത്തി. ശെരിക്കും വന്ന പ്രശ്നം എന്താണ്‌ എന്നാൽ ഇനി രണ്ട് ദിവസം ക്ലാസ് ഇല്ല എന്നതായിരുന്നു. ഇനി അവളെ തിങ്കളാഴ്ചയെ കാണാന്‍ പറ്റു എന്നത് എന്നില്‍ പേടിയും ടെന്‍ഷനും കൂട്ടുകയാണ് ചെയ്തത്. ആ ശനിയും ഞായറും എന്റെ ഊണും ഉറക്കവും പോയി എന്ന് പറഞ്ഞാൽ മതിയല്ലോ… അമ്മയുടെ ഫോണിൽ നിന്ന് ഒന്ന് അമ്മാവനെ വിളിച്ച് അവളോട് സംസാരിച്ചാലോ എന്ന് ചിന്തിച്ചതാണ് പക്ഷേ അത് ആർക്കെങ്കിലും സംശയം ഉണ്ടാക്കിയാല്‍ പിന്നെ പണി പാളും. എന്തിനാ വെറുതെ വടി കൊടുത്ത് അടി വാങ്ങുന്നേ…

അങ്ങനെ എങ്ങിനെയോ രണ്ട് ദിവസം തള്ളി നിക്കി ആ തിങ്കളാഴ്ച വരവായി. അന്ന് രാവിലെ നേരത്തെ തന്നെ സ്കൂളിലേക്ക് വിട്ടു. പിന്നെ അവളുടെ എൻട്രിക്ക് വേണ്ടി പ്രധാന കവാടത്തിൽ ഇരുപ്പുറപ്പിച്ചു. കുറച്ച് നേരം കഴിഞ്ഞപ്പോള്‍ കൂട്ടുകാരുമായി ആടിപാടി അവൾ സ്കൂളിലേക്ക് കടന്ന് വന്നു. കവാടത്തിൽ എന്നെ കണ്ടതും അവളുടെ ചിരി മങ്ങാൻ തുടങ്ങി. ഞാൻ പരമാവധി വിനയം പുറത്തെടുത്ത് ദയനീയ ഭാവത്തില്‍ അവളെ തന്നെ നോക്കി നിന്നു.