?മയൂരി? [The Beginning][ഖല്‍ബിന്‍റെ പോരാളി ?] 822

അവൾ കുടെ നിന്ന ഒന്നര വര്‍ഷം കൊണ്ട്‌ സെബാസ്റ്റ്യന്‍ അങ്കിളിന് നല്‍കിയ വാക്ക് ഞാൻ പാലിച്ചു. മുതൽ മുടക്ക് മുഴുവന്‍ തിരിച്ചടച്ചു. ഈ കാലയളവില്‍ രണ്ടോ മൂന്നോ തവണ സെബാസ്റ്റ്യന്‍ അങ്കിളും മകന്‍ ജെബിനും ഹോംസ്റ്റേയില്‍ വന്ന് നിന്നിരുന്നു. എന്റെ പ്രവര്‍ത്തനത്തിൽ രണ്ട് പേരും പൂര്‍ണ തൃപ്തിരായിരുന്നു. അതിന്റെ സന്തോഷത്തിൽ ഞാൻ ഒരുപാട്‌ എതിർപ്പ് പറഞ്ഞെങ്കിലും ആ ഹോംസ്റ്റേ കെട്ടിടത്തിന്റെ പകുതി അവകാശം എനിക്ക് ഇഷ്ടദാനമായി അങ്കിള്‍ എഴുതി തന്നു.

പിന്നെ നമ്മുടെ ജെബിന് മേഘയില്‍ ഒരു അനുരാഗം വിടരുന്നുണ്ടോ എന്നൊരു സംശയം ഉണ്ട്. വിളിക്കുമ്പോള്‍ എല്ലാം അവളുടെ കാര്യം അന്വേഷിക്കാന്‍ ചെക്കന് വല്യ ഉത്സാഹം ആണ്‌. അങ്കിളിനും അവളെ ഇഷ്ടമാണ്. അവളുടെ കാര്യം മാത്രമാണ്‌ അറിയാത്തത്. തല്‍കാലം രണ്ടിനും ഇടയില്‍ ഹംസം ആവാന്‍ ഞാൻ ഉദ്ദേശിക്കുന്നില്ല. അവര്‍ക്ക് വേണമെങ്കിൽ അവർ ഒന്നിക്കട്ടെ…

ഒരിക്കല്‍ അവളോട് സ്നേഹം കൂടി അവളുടെ പപ്പയെയും മമ്മയേയും അവളോട് അടുപ്പിക്കാന്‍ ഞാൻ ഒരു ശ്രമം നടത്തി. അവളുടെ എതിര്‍പ്പ് വക വെക്കാതെ ഞാൻ നിര്‍ബന്ധിച്ച് നമ്പർ വാങ്ങി ഒന്ന് വിളിച്ചു. തുടക്കം മാത്രേ എനിക്ക് സംസാരിക്കാൻ പറ്റിയുള്ളു. പിന്നെ ‘ക’യും ‘മ’യും ‘പ’യും ഒക്കെ വെച്ച് തുടങ്ങുന്ന നല്ല അസ്സല്‍ ഭരണി പാട്ട് കോട്ടയം ഭാഷയിൽ കേട്ടപ്പോ തൃപ്തിയായി. എനിക്ക് എന്തിന്റെ കേടായിരുന്നു ആവോ…

ഈ കാലത്തൊന്നും നാട്ടിലെ കാര്യങ്ങൾ ഞാൻ ശ്രദ്ധിച്ചില്ല. എന്നാലും സ്കൂൾ കാലം മുതൽ മനസില്‍ കയറിയത് കൊണ്ട്‌ അവളെ മാത്രം പെട്ടെന്ന് ചങ്കിൽ നിന്ന് പറിച്ചെടുക്കാൻ പറ്റുന്നില്ല. അതുകൊണ്ടാണ് മറ്റൊരു വികാരം തോന്നാതെ മേഘയെ പെങ്ങളെ പോലെ കാണാന്‍ സാധിക്കുന്നത് എന്ന് എനിക്കും അറിയാവുന്നതാണ്. ഒരിക്കല്‍ അവൾ കുത്തി കുത്തി ചോദിച്ചപ്പോ എന്റെ കഴിഞ്ഞ കാലം അവളോട് പറഞ്ഞിരുന്നു. അതുകൊണ്ട്‌ അവളും ആ വഴിക്ക് എന്നെ കണ്ടിട്ടില്ല.

എല്ലാം നല്ല രീതിയില്‍ പോകുമ്പോഴാണ് ഗോവയില്‍ തിമർത്ത് ആഘോഷിക്കാനായി നാല്‌ ചെറുപ്പക്കാര്‍ മിറര്‍ വ്യുവിലേക്ക് വരുന്നത്. പക്ഷേ അതിൽ ഒരുത്തൻ എന്നെ അറിയുന്നവനായിരുന്നു. കുട്ടന്‍ എന്ന് നാട്ടുകാര്‍ വിളിക്കുന്ന കിരണ്‍. എന്റെ ബാല്യകാല സഹപാഠി. അവനിലുടെയാണ് ചേട്ടന് ഒരു മോന്‍ ജനിച്ചത് പോലും ഞാൻ അറിയുന്നത്. എന്നെ കണ്ട കാര്യം അവരോട് പറയില്ല എന്ന് ഉറപ്പ് പറഞ്ഞിട്ടാണ് അവന്‍ ഇവിടെ നിന്ന് പോയത്. ഒരുപക്ഷേ ഏട്ടന്റെ ഇങ്ങനെ ഒരു അവസ്ഥയില്‍ അവന് ഇത് അച്ഛനില്‍ നിന്ന് മറച്ച് പിടിക്കാൻ സാധിച്ചില്ലായിരിക്കും.

കഴിഞ്ഞ രണ്ട് കൊല്ലം എന്നെ ഒരുപാട് മാറ്റിയിരുന്നു. ഏകാന്തതയും പിന്നെ കിട്ടിയ പുതിയ കൂട്ടുകളും പഴയ കാളിയെ മാറ്റി അവരുടെ ദാസ് ആക്കി. ഇന്നിപ്പോ തിരിച്ച് പോവുന്നത് അവളുടെ മുന്നിലേക്ക് ആണ്‌. കാണരുത് എന്ന് മനസില്‍ വിചാരിച്ച് മാറി നിന്നതിന്റെ അടുത്തേക്ക്…

കേരള ബോര്‍ഡര്‍ കടന്നതും കാറിന്റെ സ്പീഡ് കുറഞ്ഞിരുന്നു. ഉച്ചക്കത്തെ ഭക്ഷണം ഒരു ഹോട്ടലിൽ നിന്ന് കഴിച്ച് യാത്ര തുടർന്നു. വൈകുന്നേരം ആയി കോഴിക്കോട് എത്തുമ്പോൾ. നേരെ മെഡിക്കൽ കോളേജിലേക്ക്…

✯━━━━━━━━✧━━━━━━━━✯

തുടരും….

✯━━━━━━━━✧━━━━━━━━✯

കഥയെ പറ്റി രണ്ടുവാക്കുകളെങ്കിലും കുറിക്കുമെന്ന് വിശ്വസിക്കുന്നു. അടുത്ത ഭാഗം എഴുത്തിലാണ്. രണ്ടാഴ്ചയ്ക്കുള്ളില്‍ അയയ്ക്കുന്നതാണ്….