ഹരിചരിതം 4

Haricharitham 4 | Author : Aadhi | Previous Part 

രാവിലെ വീട്ടിൽ എത്തിയപ്പോൾ ആന്റി ഞങ്ങളെ മൂന്നുപേരെയും കാത്തു ഹാളിൽ ഇരിപ്പുണ്ട്.. രാത്രി ചായകുടിക്കാൻ പോയതാണെന്നൊക്കെ പറഞ്ഞപ്പോൾ ” ഈ രണ്ടെണ്ണത്തിന് ബോധമില്ല..നിനക്കും കൂടി ഇല്ലാതായോ അഭീ… ” എന്നും ചോദിച്ചു ആന്റി അഭിയുടെ തോളിൽ ഒരടി കൊടുത്തു. ശ്രീ പോവുന്നില്ല എന്ന് പറഞ്ഞപ്പോൾ ആന്റിക്ക് മുഖത്തൊരു തെളിച്ചം വന്നിട്ടുണ്ട്. ആന്റിയുടെ സങ്കടം കണ്ടു അവൾ പോവുന്നില്ല എന്ന് പറഞ്ഞു കരിയർ നശിപ്പിക്കുമോ എന്നായിരുന്നു ആന്റിയുടെ പേടി.. ഇതിപ്പോൾ ശ്രീയായിട്ട് പോവുന്നില്ല എന്ന് പറഞ്ഞല്ലോ…

ഭക്ഷണം കഴിഞ്ഞു ബൈക്ക് എടുത്തു കോളേജിലേക്ക് ഇറങ്ങി.. ക്‌ളാസ്സിലെ എല്ലാവരും വന്നിട്ടുണ്ട്.. എല്ലാവരും വലിയ തിരക്കിൽ ആണ്, പ്രോജക്ടിന്റെ ടോപ്പിക് ഒക്കെ കണ്ടുപിടിക്കാൻ.. ഞാൻ പ്രൊഫസ്സർ ലിസ്റ്റ് എടുത്ത് കുറച്ചു പാവം പ്രൊഫസ്സർമാരുടെ അടുത്ത് ചെന്ന് ഗൈഡ് ആവാമോ എന്ന് ചോദിച്ചു.. പണ്ടേ അശോകൻ സാറിന്റെ കൂടെ എന്നെ കണ്ടതുകൊണ്ടാണോ എന്തോ ആർക്കും എന്നെ ഗൈഡ് ചെയ്യാൻ ഒരു താല്പര്യവും ഇല്ല… സമയമില്ല, ആ ടോപിക്കിൽ ഇന്റെരെസ്റ്റ് ഇല്ല എന്നൊക്കെ പറഞ്ഞു എല്ലാവരും മടക്കി അയച്ചു… ഇനി ബാക്കി ഉള്ളത് ജോൺ സാറും അശോകൻ സാറും മാത്രം ആണ്.. അശോകൻ സാറിനേക്കാൾ നല്ലത് ജോൺ ആണ്.. സാറിനെ കണ്ടു സംസാരിച്ചപ്പോൾ ഗൈഡ് ഒക്കെ ആവാം, പക്ഷെ അശോകൻ സാർ സമ്മതിക്കണം എന്ന് പറഞ്ഞു. സാറിനെ കണ്ടു സംസാരിക്കാൻ റൂമിലെത്തിയപ്പോൾ ആദ്യത്തെ ചോദ്യം..

” ഹരിശങ്കറിന്റെ ടോപ്പിക്ക് എന്താ…?? എന്നെ കൊണ്ടുവന്നു കാണിച്ചില്ലല്ലോ… ?? ”

” സാർ, അത് ഗൈഡിനെ സെലക്റ്റ് ചെയ്തില്ല.. ”

” അത് സെലെക്റ്റ് ചെയ്യാൻ എന്താ.. ഞാനാണ് ഹരിയെ ഗൈഡ് ചെയ്യുന്നത്.. പിന്നെ നിങ്ങളുടെ പ്രോജക്റ്റ് കോർഡിനേറ്ററും ഞാനാ.. ” എന്റെ ശവപ്പെട്ടിയുടെ മേലെ അവസാനത്തെ ആണിയും അടിച്ചു.. ഇനിയിപ്പോൾ വേറെ ഗൈഡിനെ കണ്ടുപിടിച്ചിട്ട് കാര്യമില്ല, പ്രെസെന്റേഷൻ മുഴുവൻ ഇയാളുടെ മുമ്പിൽ ആണ് നടത്തേണ്ടത്… സങ്കടത്തോടെയും അതിനേക്കാൾ ദേഷ്യത്തോടെയും കോളജിൽ നിന്നിറങ്ങി..

ഫോൺ ബെല്ലടിക്കുന്നുണ്ട്.. ഗൗരി ആണ്…

” ഒരു കാര്യം പറയാനാ…”

” എന്താ… ?? ”

” ഞാൻ അങ്ങോട്ട് വരുന്നില്ല… ഇവിടെ തന്നെ വല്ല സെന്ററിലും ചേരാൻ പറഞ്ഞു അമ്മ ”

സന്തോഷമായി.. ഇന്നത് കേൾക്കേണ്ടത് തന്നെ ആണ്…

” നീയെന്താണെന്നു വെച്ചാൽ ചെയ്‌തോ..ഞാൻ ആരാ പറയാൻ… ?? കുറെ കാലം ആയി ഓരോന്ന് പറഞ്ഞു പറ്റിക്കുന്നു.. നീ എവിടെയാന്നു വെച്ചാൽ പൊയ്‌ക്കോ.. എനിക്ക് നിന്നെ കാണുകയും വേണ്ട..ഒന്നും കേൾക്കുകയും വേണ്ട… ” ഞാൻ ദേഷ്യത്തോടെ പറഞ്ഞിട്ട് ഫോൺ കട്ട് ചെയ്തു..