?മയൂരി? [The Beginning][ഖല്‍ബിന്‍റെ പോരാളി ?] 823

കണ്ണ് തുറന്ന് നോക്കിയപ്പോ വധുവരന്മാർക്ക് ചുറ്റും നില്‍ക്കുന്ന എല്ലാവരും സന്തോഷത്തോടെ നില്‍ക്കുന്നു. എന്റെ കണ്ണുകൾ അവളുടെ മുഖത്തേക്ക് ചെന്നു. അതേ അവൾ എന്നെ നോക്കിയാണ് ഇപ്പൊ അവിടെ ഇരിക്കുന്നത്. അവളുടെ നോട്ടം എന്നെ കളിയാക്കുന്നത് പോലെ എനിക്ക് തോന്നി. അതോടെ അവിടെ നില്‍ക്കാനുള്ള കരുത്ത് എനിക്ക് നഷ്ടമായി. ഞാൻ മണ്ഡലത്തിന് പുറത്തേക്ക്‌ നടന്നു. നേരെ പൈപ്പിന്റെ അടുത്തേക്ക് ചെന്ന് ഒരു കൈ കുമ്പിളില്‍ വെള്ളമെടുത്ത് മുഖത്തേക്ക് തളച്ചു.

കല്യാണമണ്ഡപത്തില്‍ ഇപ്പോഴും ഒച്ചയും ബഹളവും കേള്‍ക്കുന്നുണ്ട്.കുറച്ച് നേരം ഒരു ഭാഗത്ത് തനിച്ച് ഇരുന്നു. പയ്യെ ആലോചിച്ച് തുടങ്ങി. ഇനിയും അവരുടെ കുടെ ജീവിച്ചാൽ ഇതുപോലുള്ള നോട്ടങ്ങളും കുത്തുവാക്കുകളും കേള്‍ക്കേണ്ടി വരും. അത് ചിലപ്പോ എന്റെയും അവരുടെയും ജീവിതത്തെ ബാധിച്ചേക്കും…

ഇല്ല… ഒരുപാട്‌ പേരുടെ സന്തോഷത്തിന്‌ ഒരു വിലങ്ങ് തടി ആയി ഞാൻ ഇവിടെ നില്‍ക്കരുത്. ഒഴിഞ്ഞ് പോണം അവരുടെ നല്ലതിനായി. പക്ഷേ തിരിച്ച് വരണം ഒരിക്കൽ പക്ഷേ അതൊരിക്കലും പോയ പോലെ ആവരുത്. മനസില്‍ ചിന്തിച്ച് വെച്ച പ്ലാനുമായി ഞാൻ അവിടെ നിന്ന് എണീറ്റു.

നേരെ മണ്ഡപത്തിലേക്ക് ചെന്നു. അവിടെ ഫോട്ടോ സെക്ഷന്‍ തുടങ്ങിയിരുന്നു. മനസിലെ ദുഃഖങ്ങള്‍ മറച്ച് വെച്ച് കുറച്ച് ഫോട്ടോക്ക് നിന്ന് കൊടുത്തു. പരമാവധി സന്തോഷത്തോടെ ഇരിക്കാൻ ശ്രമിച്ചു.

അതിനായി അവളെ നോക്കുകപോലും ചെയ്തിരുന്നില്ല. ഇനിയും അതാണ്‌ നല്ലതെന്ന് മനസ്സിനെ പറഞ്ഞ്‌ മനസ്സിലാക്കാൻ ശ്രമിച്ചു.

എല്ലാം അവര്‍ക്ക് മംഗളമായി തീര്‍ന്നു. വീട്ടില്‍ നിലവിളക്കും പിടിച്ചു അവൾ അകത്ത് കയറി. എന്റെ കുടെ കയറാന്‍ ഞാൻ ആഗ്രഹിച്ചവൾ പക്ഷേ ചേട്ടന്റെ കുടെ കയറി എന്ന് മാത്രം. ഇനി ആ മോഹങ്ങള്‍ വേണ്ട എന്ന് മനസിനെ പറഞ്ഞ്‌ വിശ്വസിപ്പിക്കാന്‍ ഞാൻ ഇനി ശ്രമിച്ചു…

വൈകുന്നേരം ഒരു തലവേദന എന്ന് പറഞ്ഞ്‌ റൂമിൽ കയറി ഇരുന്നു. ഒഴിഞ്ഞ് മാറിയതാണ്. ഇനി കുറച്ച് നേരം കുടെ മാറി നില്‍ക്കണം. രാത്രി എല്ലാവരും ഉറങ്ങിയോ എന്ന് നോക്കാനായി ഒന്ന് പുറത്തിറങ്ങിയപ്പോഴാണ് പാൽ ഗ്ലാസ്സുമായി ചേട്ടന്റെ മുറിയിലേക്ക് പോകുന്ന മയൂരിയെ കാണുന്നത്. കുറച്ച് നേരം നോക്കി നിന്നു. കണ്ണ് നിറയും എന്ന് തോന്നിയപ്പോ പിന്‍ തിരിഞ്ഞ് റൂമിലേക്ക് ചെന്നു. നാല്‌ ജോഡി ഡ്രെസ്സും പോക്കറ്റ് മണിയായി കിട്ടിയ പൈസയും ശെരിയാക്കി കാത്തിരുന്നു.

താഴത്തെ നിലയിലെ ലൈറ്റ് ഓഫാക്കിയപ്പോ ഒരു തുണ്ട് പേപ്പറില്‍ കുറച്ച് വരികള്‍ കുത്തി കുറച്ചിട്ട് റൂമിന് പുറത്തേക്ക്‌ ഇറങ്ങി. ശേഷം ബാഗ് തോളില്‍ എടുത്ത് പമ്മി പമ്മി താഴേക്ക് ഇറങ്ങി. മുന്‍ വാതിലുടെ പോകാതെ അടുക്കള വാതിൽ വഴി പുറത്തേക്ക്‌ ഇറങ്ങി. പിന്നെ ആ വീട്ടിലേക്ക് ഒരു നോക്ക് നോക്കി തിരിഞ്ഞ് ഇരുട്ടിലേക്ക് നടന്നു നീങ്ങി.