?മയൂരി? [The Beginning][ഖല്‍ബിന്‍റെ പോരാളി ?] 823

എന്നിട്ടും അവൾ എങ്ങനെ എന്റെ ഏട്ടനെ കല്യാണം കഴിക്കാൻ സമ്മതിച്ചു. വിളിച്ച് ചോദിച്ചാലോ എന്ന് വിചാരിച്ചു. പോരാ… നേരിട്ട് മുഖത്ത് നോക്കി തന്നെ ചോദിക്കണം. അതാണ്‌ അതിന്റെ ഒരു ഇത്…

രാത്രി അത്താഴ സമയത്ത്‌ അമ്മ വിളിച്ചപ്പോഴാണ് ഞാൻ പിന്നെ അങ്ങോട്ട് പോയത്. താഴെ ചേട്ടനടക്കം എല്ലാരും എത്തിയിട്ടുണ്ട്. ഭക്ഷണം വിളമ്പി കഴിഞ്ഞപ്പോഴാണ് അച്ഛൻ മായുവിന്റെ കാര്യം പറയുന്നത്. ഈശ്വരാ ചേട്ടന് വേറെ പ്രണയം ഉണ്ടാവണേ എന്ന് ഞാൻ പ്രാര്‍ത്ഥിച്ചു. എവിടെ…

““നിങ്ങള്‍ക്കൊക്കെ സമ്മതം ആണെങ്കിൽ എനിക്കും ഈ വിവാഹത്തിന് സമ്മതമാണ്….”” ഇതായിരുന്നു ചേട്ടന്റെ മറുപടി. എന്റെ അവസാന പ്രതീക്ഷയും അതോടെ അപ്രത്യക്ഷമായി…

വല്യ പഠിപ്പും ജോലിയും സൗന്ദര്യവും തേങ്ങയും മാങ്ങയും ഒക്കെ ഉണ്ടായിട്ട് എന്ത് കാര്യം… ഇത്‌ വരെ ഒരു പ്രണയം പോലും ഇല്ല… ക്ണപ്പൻ… ഞാൻ എന്റെ ദേഷ്യം എന്റെ മനസില്‍ ചേട്ടനെതിരെയുള്ള തെറി ആക്കി മാറ്റി. കുടെ അവള്‍ക്കെതിരെയും… പറഞ്ഞ വാക്കിന് വില ഇല്ലാത്ത ജന്തു. അല്ലേലും പണത്തിനും സൗന്ദര്യത്തിനും ജോലിക്കും മുന്നില്‍ എന്ത് വാക്ക്…

ചേട്ടന്റെ വാക്ക് കേട്ടതോടെ എല്ലാം ശടപടെന്ന് ആയിരുന്നു. അച്ഛനും അമ്മയും അമ്മാവനും അമ്മായിയും ഹാപ്പി. ഞാൻ മാത്രം നനഞ്ഞ പടക്കം പോലെ…

ഒഫീഷ്യൽ പെണ്ണ്കാണൽ ചടങ്ങില്‍ അവൾ ചായയുമായി വന്നപ്പോ ഞാൻ അവളെ സൂക്ഷിച്ച് നോക്കി. ഇല്ല… അറിയാതെ പോലും അവൾ എന്നെ നോക്കിയില്ല. മുഖത്ത് പുഞ്ചിരിയും ഇല്ല. ഓ… ഞാൻ ഉള്ളത് കൊണ്ടാവും. അവൾ മുന്നില്‍ കൊണ്ട്‌ വെച്ച ഒരു ലഡു എടുത്ത് എന്റെ വായില്‍ കുത്തി കയറ്റി ചവച്ചരച്ച് എന്റെ വിഷമവും സങ്കടവും ദേഷ്യവും എല്ലാം ഞാൻ പിടിച്ചു വെച്ചു.

കല്യാണം ഒരു മാസത്തിനകം എന്ന് അവർ ഉറപ്പിച്ചു. വീട്ടുകാരെ ക്ഷണിക്കുന്നതിലും ഡ്രെസ് എടുക്കുന്നതിലുമായി എല്ലാവരും തിരക്കിലായി. ഞാൻ പതിയെ എല്ലാത്തിലും നിന്ന് മാറി നിന്നു. ഇത്രയും നാള്‍ മനസില്‍ കൊണ്ട്‌ നടന്ന ആഗ്രഹം മനസില്‍ നിന്ന് വിട്ടുപോയതെ ഉണ്ടായിരുന്നില്ല. ചേട്ടന് വലിയ ഒരു വർക്ക് കിട്ടിയതിനാൽ ഫോൺ വിളി ഒക്കെ കുറവായിരുന്നു. അത് കുറച്ചെങ്കിലും ആശ്വാസം നല്‍കി. അതിനിടെ എന്റെ ഡിഗ്രീ റിസൾട്ട് വന്നു. വിചാരിച്ചതിലും നല്ല മാർക്കിൽ ഞാൻ ജയിച്ചെങ്കിലും എനിക്ക് സന്തോഷിക്കാൻ കഴിഞ്ഞില്ല. എന്തിന്‌ റിസൾട്ടിന്റെ കാര്യം വീട്ടില്‍ പറഞ്ഞത് പോലും ഇല്ല. അവർ ചോദിച്ചതും ഇല്ല.

ആ വീട്ടില്‍ ഞാൻ ആരും അല്ല എന്നൊരു പ്രതീതി എനിക്ക് ഉണ്ടായി. അതോടെ മനസ് പൂര്‍ണമായി കൈമോശം വന്നു. അങ്ങനെ അവരുടെ സന്തോഷത്തിന്റെ ദിനം വന്നു. ചേട്ടന്റെ കല്യാണം.

അവർ എനിക്കായ് വാങ്ങി തന്ന ഡ്രെസ്സ് ഇട്ട് ഒരു പാവയെ പോലെ കല്യാണമണ്ഡപത്തില്‍ ചെന്നിരുന്നു. ഇവന്റ് മാനേജ്മെന്റിനെ ഏല്പിച്ചതിനാൽ എനിക്ക് പണി ഒന്നുമുണ്ടായിരുന്നില്ല. അവൾ അലങ്കാരങ്ങളോടെ വന്നു. ചേട്ടനരികിൽ ഇരുന്നു.

അവളുടെ മുഖത്ത് നാണമോ ഭയമോ അങ്ങനെ എന്തോ വികാരം. പൂജാരി ക്രിയ കഴിഞ്ഞപ്പോ താലിയെടുത്ത് ചേട്ടന്റെ കൈയിൽ കൊടുത്തു. നാദസ്വരം ചെവിയിൽ അലയടിച്ചു. ചേട്ടൻ താലി അവളുടെ കഴുത്തിലേക്ക് കൊണ്ട്‌ പോയി. ആ കാഴ്‌ച കണ്ടിരിക്കാൻ സാധിക്കാതെ ഞാൻ കണ്ണുകൾ അടച്ചു. അതും കുടെ കണ്ടിരുന്നു എങ്കിൽ അടുത്ത നിമിഷം ഹൃദയാഘാതം വന്ന് മരിച്ചു പോവും എന്ന് എനിക്ക് തോന്നി.