??മയിൽപീലി ?? [Jeevan] 251

സമയം 10.30 ആയിട്ടുണ്ടാകും . എന്നും നേര്ത്തേ കിടക്കുന്ന മോള്‍ ആണ്  ഇന്ന് അച്ഛനെ കാണാന്‍ ഉള്ള സന്തോഷത്തില്‍ അവളുടെ മുഖത്ത് ഉറക്കം വരുന്നത്തിന്റെ ഒരു ലക്ഷണങ്ങളും കാണുന്നില്ല .

കുറച്ചു സമയം കഴിഞ്ഞു അവിടെ ഒരു കാര്‍ വന്നു നിന്നു . എന്‍റെ ഉണ്ണിയേട്ടന്‍ … കണ്ട അതേ നിമിഷം അച്ഛാ ….. എന്നു വിളിച്ച് മോള്‍  ഓടി പോയി കെട്ടിപ്പുണര്‍ന്നു നിന്നു. രണ്ടു കൈകളിലും അവളെ കോരിയെടുത്ത് അവളുടെ കവിളുകളിലും, നെറ്റിയിലും ഒക്കെ ഒരുപാട് വാത്സല്യ മുത്തങ്ങള്‍ നല്‍കി എന്നെയും ചേര്‍ത്ത് പിടിച്ചു . അവളെ നിലത്തു നിര്‍ത്തി ബാഗും മറ്റ് സാധങ്ങളും ഒക്കെ എടുത്തു അകത്തു കൊണ്ട് വച്ച് അമ്മയോടും ഒരു 10 മിനിട്ടു സംസാരിച്ച് ഒന്നു ഫ്രെഷ് ആയി വരാന്‍ ആയി റൂമിലേക്ക് പോയി .

റൂമില്‍ എത്തി ” പൊന്നൂ … ” എന്നു വിളിച്ചു . ( ആഹ്  വിളി തുടങ്ങിയല്ലോ , ഞാന്‍ മനസ്സില്‍ ചിന്തിച്ചു ) അത് അങ്ങനെയാ .. അവിടെ ഒറ്റയ്ക്ക് ഉള്ള ജീവിതം ആണ് . എല്ലാം സ്വന്തം ആയി ചെയ്യാന്‍ അറിയാം. എങ്കിലും നാട്ടില്‍ വന്നു കഴിഞ്ഞാല്‍ എന്തിനും ഏതിനും ഞാന്‍ വേണം എന്നുള്ള അവസ്ഥയാ …

റൂമില്‍ പോയി , ” എന്താ ഉണ്ണിയേട്ട ” എന്നു ചോദിച്ചു

” എന്‍റെ ഡ്രസ് ഒക്കെ എടുത്തു തന്നെ ” എന്നു പറഞ്ഞു .

ഡ്രസ് എടുത്തു കൊണ്ടിരുന്ന എന്നെ പിന്നില്‍ നിന്നും കൈകള്‍ കൊണ്ട് വട്ടം പിടിച്ച്  അടുത്തേക്ക് ചേര്‍ത്ത് നിര്‍ത്തി കവിളില്‍ ഒരു ചുംബനം നല്‍കി.

ഏറെ നാളിന് ശേഷം കിട്ടുന്നത് ആണ് . അതിനു അതിന്റേതായ മൂല്യം ഉണ്ട് എങ്കിലും ഉണ്ണിയേട്ടന്‍റെ കൈകള്‍ മാറ്റി കൊണ്ട് തിരിഞ്ഞു ആ മുഖത്തേക്ക് നോക്കി പറഞ്ഞു ” അതേ സ്നേഹ പ്രകടനം ഒക്കെ പിന്നെ ആകാം . ഇപ്പോ എന്‍റെ പൊന്നു മോന്‍ പോയി  വേഗം കുളിച്ചു  വന്നേ .

ഏട്ടന്‍ വരും എന്നു പറഞ്ഞത് കൊണ്ട് അമ്മയും , മോളും കഴിച്ചിട്ടില്ല . എല്ലാവരും ഒന്നിച്ചു കഴിക്കാം എന്നു വിചാരിച്ചു ഇരിക്കുവായിരുന്നു . (ആ സമയം എന്നില്‍ ഒരു ഭാര്യ എന്നതില്‍ ഉപരി കൂടുതല്‍ പ്രകടം ആയത് ഒരു മകള്‍ക്ക് അമ്മയോടുള്ള  പരിചരണവും , അമ്മയ്ക്ക്  മകളോടുള്ള കരുതലും ആയിരുന്നു )  അത് കൊണ്ട് ആദ്യം കുളി .. ”

എന്നു പറഞ്ഞു കൈയ്യില്‍ ഡ്രെസ്സും കൊടുത്തു  ബാത് റൂമില്‍ കൊണ്ട് പോയി വിട്ടു ഭക്ഷണം വിളമ്പി വെക്കാന്‍ ആയി താഴേക്കു വന്നു .

കുളി കഴിഞ്ഞു വന്നു എല്ലാവരും ഒന്നിച്ചു ഭക്ഷണം കഴിക്കാന്‍ ഇരുന്നു . സന്തോഷം ആയി കഴിച്ചു ഏട്ടനും മോളും  റൂമിലേക്ക് പോയി . അച്ഛനെ കണ്ടപ്പോള്‍ അവള്‍ക്ക് അച്ഛന്‍ മതി . ഒത്തിരി നാളുകള്‍ക്ക് ശേഷം കാണുന്നത് അല്ലേ .. അതിന്‍റെ സന്തോഷം ആണ്.