Jwala

Author : Aadhi

ആകസ്മികമായിട്ടാണ് പപ്പേട്ടന്റെ ലോലയിലേക്ക് വീണ്ടുമെന്റെ കണ്ണുടക്കിയത്. എപ്പോഴും കൂടെക്കൊണ്ടു നടക്കണമെന്നു വിചാരിച്ചു ലോലയെ PDF ആക്കി ഞാനെന്റെ ടാബിൽ ഒളിപ്പിച്ചുവെച്ചിരുന്നു. ഇന്നലെയെന്തോ കാര്യത്തിന് ഫയൽ മാനേജറെടുത്തു പഴയ കുറെ ഫോട്ടോകളും, വീഡിയോകളും ഡിലീറ്റ് ആക്കിയപ്പോഴാണ് കുറച്ചുകാലത്തെ പൊള്ളയായ ചിരികൾക്ക് ശേഷവും കണ്ണിലൊരു എരിവും, നെഞ്ചിലൊരു വിങ്ങലുമുണ്ടായത്.

വിധി എന്നൊന്നുണ്ടോ? ഉണ്ടാവുമല്ലേ? ഉത്തരം കിട്ടാത്ത പല സമയങ്ങളിലും ഞാനുമാ രണ്ടക്ഷരങ്ങളെ കൂട്ടുപിടിച്ചിരുന്നു, കാടുകയറിയുള്ള എന്റെ ചിന്തകൾക്ക് തടയിടാൻ..

സോഷ്യൽ മീഡിയയിലെ ചൂടേറിയ വാഗ്‌വാദങ്ങളിൽ പലരുമെന്നെ പ്രാക്ടിക്കലായ, വളരെയധികം ചിന്തിക്കുന്ന, ബോൾഡായ മനുഷ്യനായി കണ്ടിരുന്നെങ്കിലും ഉള്ളിന്റെയുള്ളിൽ എനിക്കാ പേടിയെപ്പോഴുമുണ്ടായിരുന്നു – ചില വാക്കുകളിലും ചിന്തകളിലും പ്രവൃത്തികളിലും ശക്തനെന്നു കാണിക്കുന്ന എന്റെയുള്ളിലെ ഭീരുവായ യഥാർത്ഥ ഞാൻ പുറത്തുവരുമോ എന്നത്. അതിനാലാണ് പല പരിചയപ്പെടലുകളെയും എന്റെയാ ഫേക് നാമത്തിനപ്പുറം ഞാൻ കടത്തിവിടാതെയിരുന്നതും.

ഓൺലൈനായി കിട്ടിയൊരു സൗഹൃദമായിരുന്നു ജ്വാലയുമായിണ്ടായിരുന്നത്. ഒരു സോഷ്യൽ മീഡിയ ലൈവ് ഡിബേറ്റിനിടയിൽ എന്റെ വാദഗതികളോട് ചേർന്ന്‌നിൽക്കുന്ന ചിന്തകളുള്ള ഒരു പെൺകുട്ടി. അവളുടെ വാക്കുകളും ചിന്തകളും അവളോടൊരു ബഹുമാനം തോന്നിപ്പിച്ചു, എങ്കിലും ആ വാക്കുകൾക്കിടയിലെവിടെയോ എന്തോ ഒരു സങ്കടം ഒളിഞ്ഞിരിക്കുന്നതായി എനിക്ക് തോന്നി.

ചിലപ്പോൾ തോന്നലുകളാവാം, ഭൂതകാലത്തിലെ ചില അനുഭവങ്ങൾ കപടമായ ലോകത്തിൽ ആരുമായും ഒരു പരിധിയിൽ കവിഞ്ഞൊരു ബന്ധം വെച്ചുപുലർത്താൻ എന്നെ അനുവദിച്ചിരുന്നില്ല. എനിക്കിഷ്ടമല്ലായിരുന്നു, നേരിൽ കാണാത്ത, പരിചയമില്ലാത്ത ഒരാളെ വിശ്വസിക്കാനോ, അവരുമായി എന്തെങ്കിലും തരത്തിലുള്ള ബന്ധം സ്ഥാപിക്കാനോ…

അതെല്ലാം ഒരിക്കൽ യാഥാർഥ്യങ്ങളോട് സമരസപ്പെട്ടുകൊണ്ടുള്ള എന്റെ സമാധാനപൂർണമല്ലാത്ത ജീവിതത്തിലേക്ക് വീണ്ടും ദുഖമോ ആകുലതകളോ കൊണ്ടുവരുമോ എന്നതായിരുന്നു എന്റെ പേടി.

വാശിയേറിയ ഡിബേറ്റിനപ്പുറം, പരസ്പരം ബൈ പറഞ്ഞു എല്ലാവരും അവരവരുടെ സ്വകാര്യ ജീവിതത്തിലേക്ക് മടങ്ങിയെങ്കിലും എനിക്കെന്തോ അവളുടെ ചില വീക്ഷണങ്ങളോട്, ചിന്തകളോട്, അവളുപയോഗിച്ച ചില വാക്കുകളോട് ഒരടുപ്പം തോന്നി. അതുകൊണ്ടാണ്, വീണ്ടുമാ വിൻഡോ ഓപ്പൺ ചെയ്തു അവളുടെ പോയിന്റുകൾ വായിച്ചുനോക്കിയതും. അതിനിടയിലാണ് ആകസ്മികമായി അവളുടെ മെസേജ് വരുന്നത്..

” നിങ്ങളുടെ പോയിന്റുകളെല്ലാം വളരെ ശരിയാണ്, വളരെ മനോഹരമായി നിങ്ങളത് പറയുന്നുണ്ട് ”