Jwala [Aadhi] 2271

എന്നിലവൾ എന്താണ് കണ്ടത് എന്നെനിക്കറിയില്ല, ആരുടേയും വാക്കുകൾക്ക് ചെവികൊടുക്കാത്ത അവൾ ഞാൻ പറയുന്ന പല കാര്യങ്ങളും, ഒരൽപം കുറുമ്പുകാണിച്ചാലും മടികൂടാതെ ചെയ്യാൻ തുടങ്ങി..

ആ സമയത്തായിരിക്കും എനിക്കെന്റെ പഴയ ഗേൾഫ്രണ്ടിനെ ഓര്മ വന്നത്, അവളും ഇതേപോലെയായിരുന്നു. കാമുകിക്കപ്പുറം, എന്റെ ബെസ്റ്റ് ഫ്രണ്ടായിരുന്നു അവൾ, എനിക്കെന്തും പറയാൻ കഴിയുന്ന ആൾ.. ചില സമയങ്ങളിൽ അവൾ ഒരു സുഹൃത്തായി എന്റെ കാര്യങ്ങൾ കേട്ടുനിന്നിരുന്നു, ചില സമയങ്ങളിൽ ഒരു ചേച്ചിയായി എന്നോട് ദേഷ്യപ്പെട്ടിരുന്നു, ചില സമയങ്ങളിൽ ഒരമ്മയെപ്പോലെ എന്റെ കൂടെ നിന്ന് ആശ്വസിപ്പിച്ചിരുന്നു, ഉപദേശിച്ചിരുന്നു. പക്ഷേ മിക്കവാറും സമയങ്ങളിൽ അവളെനിക്ക് ഒരു അനിയത്തിയെപ്പോലെയുമായിരുന്നു, എന്നെ വെറുതെ ദേഷ്യം പിടിപ്പിക്കാൻ, നേരിൽ കാണുമ്പോൾ കയ്യിൽ പിടിച്ചു വലിച്ചു വേഗത്തിൽ നടക്കാൻ, ദേഷ്യം വരുമ്പോൾ പുറം നോക്കി നല്ലൊരടി തരാനെല്ലാം അവൾക്ക് വലിയ ഉത്സാഹമായിരുന്നു.

അന്ന് ഞാനനുഭവിച്ച അതേ സന്തോഷവും, ഉത്സാഹവും ജ്വാലയോട്  സംസാരിക്കുമ്പോഴും എനിക്ക് തോന്നാൻ തുടങ്ങി. പക്ഷേ സന്തോഷത്തേക്കാളപ്പുറം പേടിയാണ് എനിക്ക് തോന്നിയത്. അത്രയും അടുത്ത്, ഭ്രാന്തമായി പരസ്പരം മത്സരിച്ചു സ്നേഹിച്ചിട്ടും സാമൂഹികമായ ചില കാരണങ്ങളാൽ അകലാനായിരുന്നു ഞങ്ങളുടെ വിധി. ഒരുപാട് കാലമെടുത്താണ് ആ മുറിവുണങ്ങിയത്, പൂർണമായല്ലെങ്കിലും.

ഇപ്പോഴും പലരും അടുത്തേക്ക് വരുമ്പോൾ, സ്നേഹം കാണിക്കുമ്പോൾ, എനിക്ക് തിരിച്ചു സ്നേഹം കാണിക്കാൻ തോന്നുമ്പോൾ ആ മുറിവിൽ നിന്നും വീണ്ടും ചോരപൊടിഞ്ഞിരുന്നു.. ഉള്ളിന്റെയുള്ളിൽ ഞാൻ ആസ്വദിക്കുന്ന വേദനയാണെങ്കിലും മറ്റുള്ളവരുടെ മുന്നിൽ, വേറൊരാൾക്ക് വേണ്ടി ആ വേദന സഹിക്കാനെനിക്ക് മനസുണ്ടാവാറില്ല.

നേരത്തെ പറഞ്ഞില്ലേ ജ്വാലയെന്തോ മാജിക്ക് കാണിച്ചെന്ന്. അതെ, അവളൊരു മാജിക്കുകാരി തന്നെയായിരുന്നു. വരണ്ടുകിടക്കുന്ന മരുഭൂമിയിലേക്ക് പുതുമഴ കൊണ്ടുവരുന്ന മാജിക്കുകാരി.

ഒരിക്കൽ പ്രണയത്തെക്കുറിച്ചുള്ള ചർച്ചക്കിടയിലാണ് ജ്വാല, അവളുടെ സുഹൃത്തിനെ കുറിച്ച് എന്നോട് പറയുന്നത്. പരസ്പരം ഇഷ്ടമാണ് എന്ന് പറഞ്ഞുകൊണ്ടുള്ള ഒരു ബന്ധം ആണെങ്കിലും, ജ്വാലക്കിപ്പോഴും അയാളൊരു സുഹൃത്താണോ, അതോ ഭാവിയിൽ കൂടെ ജീവിക്കേണ്ട ആളാണോ എന്ന് വ്യക്തമായി നിശ്ചയിക്കാനായിട്ടില്ല.. അതിലെന്താണ് മറുപടി പറയേണ്ടതെന്നറിയാതെ ഞാനൊരു നിമിഷം ആലോചിച്ചു നിന്നു. എങ്കിലും, അത് സ്വയം കണ്ടുപിടിക്കണമെന്നു പറഞ്ഞു ഞാനവളിൽ നിന്നും അകലാൻ ശ്രമിച്ചു.

പേടിയായിരുന്നു, അവളെന്തെങ്കിലും എന്നോട് ചോദിച്ചാൽ, ഞാൻ മറുപടി പറഞ്ഞാൽ അവരുടെ ബന്ധത്തിനെന്തെങ്കിലും പറ്റുമോ എന്ന്..

എന്റെ ശബ്ദത്തിലെ തീരെ ചെറിയ മാറ്റം പോലും  തിരിച്ചറിയാൻ കഴിയാറുള്ള അവൾ അന്നെന്നിൽ നിന്നും ആ സത്യമറിഞ്ഞു.

എപ്പോഴോ, എന്നോ ഞാനവളെ പ്രണയിച്ചുതുടങ്ങിയിരുന്നെന്ന്..

ഞാനവളോടത്‌ എന്നെങ്കിലും പറയുമായിരുന്നോ? സംശയമാണ്.

ഒരുപക്ഷേ അവളോടൊരു വാക്ക് പോലും പറയാതെ ഞാൻ അകന്നേനെ..