ഹരിചരിതം 3 [Aadhi] 1392

സ്‌കൂട്ടർ പതുക്കെ തള്ളി പുറത്തിറക്കി സ്റ്റാർട്ട് ചെയ്തു.. എന്റെ പിറകിൽ ശ്രീയും അതിന്റെ പിറകിൽ ആയി അഭിയും കേറി..

പാതിരാത്രി, സ്ട്രീറ്റ് ലൈറ്റുകൾ വെളിച്ചം വിതറുന്ന മെയിൻ റോഡ്..തണുത്ത കാറ്റ്..ഞാൻ പതുക്കെ മുന്നോട്ടെടുത്തു…

” എന്റെ ശങ്കൂ..റോഡിലൊന്നും ആരുമില്ലല്ലോ.. ഇത്ര പതുക്കെ ആണോ പോവുന്നത്?? ഒന്ന് വേഗം ഓടിക്ക്… ”

കൈ രണ്ടും രണ്ടു സൈഡിലേക്ക് ആയി വിടർത്തി ആകാശത്തേക്ക് നോക്കി ഇരുന്നു കൊണ്ടാണ് ശ്രീയുടെ പറച്ചിൽ.. ഒരൽപം സ്പീഡിൽ ഞാൻ ഓടിച്ചു.. അഭി കണ്ണടച്ചുപിടിച്ചു പിന്നിൽ ഇരിക്കുന്നത് കണ്ണാടിയിലൂടെ കാണാം.

” എങ്ങോട്ടാടീ പോവേണ്ടത്?? പറ.. ”

” നമുക്കാദ്യം ബുഹാരി.. അവിടെ പോയി ഒരു ഷേക്ക് കുടിക്കാം..എന്നിട്ട് പറയാം അടുത്തത്…”

രാത്രിയിൽ തുറന്നിരിക്കുന്ന നഗരത്തിലെ ചുരുക്കം ചില കടകളിൽ ഒന്നാണ് ‘ ബുഹാരി’.. ഇളനീർ ഷേക്ക് ആണ് മെയിൻ… കടയുടെ മുന്നിലെത്തി സ്‌കൂട്ടർ റോഡ് സൈഡിൽ നിർത്തി ഇറങ്ങി. അത്യാവശ്യം തിരക്കുണ്ട്..

” നിനക്കെന്താ വേണ്ടത്?? ”

” എനിക്കൊന്നും വേണ്ട..ഈ രാത്രി ഇനി തണുത്തത് കുടിച്ചാൽ തൊണ്ടവേദന വരും.. ” അഭി പറഞ്ഞു.

” എന്റെ ചേച്ചി… നീ എപ്പോഴും ഇങ്ങനെ ഡോക്ടർ ആവല്ലേ ട്ടോ..ഒരു ദിവസം ഷേക്ക് കുടിച്ചു തൊണ്ടവേദന വരുവാണെങ്കിൽ വരട്ടെ.. 3 കരിക്കിൻ ബൂസ്റ്റ് പറ ശങ്കൂ.. ”

കടയിൽ നിന്നിരുന്ന ചേട്ടനു ഓർഡർ കൊടുത്തിട്ട് ഞങ്ങൾ റോഡിലേക്ക് ഇറങ്ങിനിന്നു സംസാരിക്കാൻ തുടങ്ങി.. റോഡിലൊന്നും വണ്ടികൾ ഇല്ല, വല്ലപ്പോഴും ഏതെങ്കിലും വണ്ടി ഒന്ന് പോയാൽ ആയി.. മിക്കവാറും ആളുകൾ ഇങ്ങോട്ട് തന്നെ ആയിട്ടാണ് വരുന്നത്..

” ഇന്നേതായാലും നമ്മൾ ഇറങ്ങിയില്ലേ…? എനിക്ക് വേറൊരു ആഗ്രഹം കൂടി ഉണ്ട് ” ശ്രീയാണ്..

ഞാനും അഭിയും ഇനി എന്താണ് ഇവൾ പറയുന്നത് എന്നറിയാൻ അവളുടെ മുഖത്തേക്കു നോക്കി…

” ഏട്ടാ.. ആ മൂന്നു ഷേക്ക് ക്യാൻസൽ ചെയ്തിട്ട് ഒരെണ്ണം മതിയെന്ന് പറ… വേറൊരു സ്ഥലത്തു പോവാനുണ്ട്.. ”

തർക്കിക്കാൻ നിൽക്കാതെ ചേട്ടനോട് പോയി ഒരു ഷേക്കിൽ മൂന്നു സ്‌ട്രോ ഇട്ടു തരാൻ പറഞ്ഞു.. ജ്യൂസിലോക്കെ രണ്ടു സ്‌ട്രോ ഇട്ടുകുടിക്കുന്ന കമിതാക്കളെ കണ്ടിട്ടുണ്ട്, എന്നാൽ 3 സ്‌ട്രോ ഇട്ടുകുടിക്കുന്ന ദരിദ്രവാസികളെ കണ്ടിട്ടില്ല എന്ന ഭാവത്തിൽ ചേട്ടൻ എന്നെ ഒന്ന് നോക്കി ഗ്ലാസ് കയ്യിലേക്ക് തന്നു..

കുടിച്ചുകഴിഞ്ഞു സ്‌കൂട്ടറിൽ കേറി വണ്ടി എടുക്കാൻ നോക്കുമ്പോൾ ആണ്, രണ്ടു പോലീസുകാർ ഒരു ബൈക്കിൽ പട്രോളിങ്ങിന് വരുന്നത്… അവരുടെ മുന്നിൽ നിന്ന് ട്രിപ്പിൾസ് കേറുന്നത് പണിയാവുമെന്നു അറിയാവുന്നതുകൊണ്ട് സ്‌കൂട്ടർ തള്ളി കുറച്ചു അപ്പുറത്തേക്ക് മാറ്റിവെച്ചിട്ടാണ് രണ്ടു പേരെയും കയറ്റിയത്.. കയറിക്കഴിഞ്ഞു മുന്നോട്ട് എടുക്കുമ്പോഴാണ്

” പൊലീസുകാരെ…കൂയ്…. ” എന്നും പറഞ്ഞു ശ്രീയുടെ കൂക്കിവിളി… ഞാൻ തിരിഞ്ഞുനോക്കിയപ്പോൾ ശ്രീ പൊലീസുകാരെ നോക്കി കളിയാക്കി ചിരിക്കുകയാണ്.. അതുകണ്ടു അവിടെ ജ്യൂസ് കുടിക്കാൻ വന്നവരൊക്കെ ചിരിക്കുന്നുണ്ട്. അഭി ആണെങ്കിൽ എന്തോ കണ്ടു ഞെട്ടിയത് പോലെ നിൽക്കുകയാണ്… പക്ഷെ ഏമാന്മാർ സൂപ്പർ ആയിരുന്നു, ഒരാൾ ബൈക്കിലേക്ക് കേറുന്ന നേരം കൊണ്ട് മറ്റെയാൾ ഓടി ഞങ്ങളുടെ അടുത്തേക്ക് വന്നു…