അനാമികയുടെ കഥ 6 [പ്രൊഫസർ ബ്രോ] 213

ഗൗതം സംസാരം അവസാനിപ്പിച്ചപ്പോൾ അവൾ ആ മുറിയുടെ ചുറ്റും കണ്ണോടിച്ചു, വൃത്തിയായി അടുക്കും ചിട്ടയോടും കൂടി സൂക്ഷിച്ചിരിക്കുന്ന മുറി ചുവരിൽ അങ്ങിങ്ങായി കുറച്ചു മെഡിക്കൽ ഫീൽഡ് സംബന്ധമായ ക്വറ്റേഷൻ ഉള്ള ഫോട്ടോകൾ തൂക്കിയിരിക്കുന്നു,  ഗൗതമും ലക്ഷ്മിയും ഒരുമിച്ചുള്ള ചെറുപ്പം മുതൽ ഉള്ള ഫോട്ടോകൾ ചെറുതിൽ നിന്നും വലുതിലേക്ക് എന്ന കണക്കിൽ ഫ്രെയിം ചെയ്ത് ഉറപ്പിച്ചിരിക്കുന്നു അതിൽ അവസാനത്തെ ഫോട്ടോ കണ്ടപ്പോൾ അവളുടെ കണ്ണുകൾ സന്തോഷം കൊണ്ട് ഈറനണിഞ്ഞു, ആശുപത്രി വാസത്തിന്റെ അവസാനദിവസം ഗൗതം അനാമികയുടെ ഒപ്പം എടുത്ത ഒരു സെല്ഫി ആയിരുന്നു അത്

“അപ്പൂ… വാ ഭക്ഷണം കഴിക്കാം ”

താഴെ നിന്നുമുള്ള ലക്ഷ്മിയുടെ വിളി വന്നപ്പോഴാണ്  അവൾ ആ ഫോട്ടോയിൽ നിന്നും കണ്ണ് പരിക്കുന്നത്

“അനൂ… അമ്മ വിളിക്കുന്നുണ്ട് പോകാം…”

“ശരിയേട്ടാ…”

ഗൗതമും അനാമികയും കൂടി താഴേക്ക് നടന്നു

*******

‘അവളുടെ അച്ഛന്റെ കാൾ വന്നിട്ട് കുറച്ചായല്ലോ, ഞാൻ വിളിച്ചിട്ട് എടുക്കുന്നുമില്ല. എന്താണ് സംഭവിച്ചത് എന്ന് മനസ്സിലാകുന്നില്ല, അവൾ അവസാനം അച്ചുവിന് അയച്ച മെസ്സേജ് പ്രകാരം അവൾ ആശുപത്രിയിൽ ആയിരുന്നു എന്താണ് കാരണം എന്നറിയില്ല,  അച്ചു അവളെ വഴക്ക് പറയുകയായിരുന്നു ഇനിയിപ്പോ അവൾ വല്ല അബദ്ധവും കാണിച്ചോ… ഇപ്പൊ രണ്ട് ദിവസമായി അവളുടെ വാട്സാപ്പിലും കയറാൻ പറ്റുന്നില്ല, എവിടെയാണ് എനിക്ക് തെറ്റ് പറ്റിയത്… എന്തൊക്കെ സംഭവിച്ചാലും അനാമിക അവൾ എനിക്ക് തന്നെ ഉള്ളതാണ്…, അവളുടെ അഹങ്കാരത്തിനുള്ള മറുപടി ഞാൻ കൊടുക്കുക തന്നെ ചെയ്യും’

“ഡാ അരുണേ… നീ എന്താലോചിച്ചുകൊണ്ട് നിൽക്കുവാ… കളിക്കുകയാണെങ്കിൽ ഇവിടെ ശ്രദ്ധിക്ക് ”

“ഓഹ്‌… സോറി ഡാ… ”

നോൺ സ്‌ട്രൈക്കർ എൻഡിൽ ബാറ്റും പിടിച്ചുകൊണ്ടു ചിന്തിച്ചിരുന്ന അരുൺ രാഹുൽ വഴക്ക് പറഞ്ഞപ്പോഴാണ് സ്വബോധത്തിലേക്ക് വരുന്നത്, അനാമികയെക്കുറിച്ചുള്ള ചിന്തകളെ പാതിവഴിയിൽ ഉപേക്ഷിച്ചു അവൻ വീണ്ടും കളിയിലേക്ക് തിരിഞ്ഞു

“എന്താടാ ഭയങ്കര ചിന്ത ആയിരുന്നല്ലോ… ഏതെങ്കിലും പെണ്ണ് പണി തന്നോ…”

കളി കഴിഞ്ഞു വഴി പിരിയുന്നതിനു മുൻപ് രാഹുൽ അവന്റെ സംശയം അരുണിനോട് ആരാഞ്ഞു

“ആ… ഒരു പെണ്ണ് തന്നെ, പക്ഷെ എനിക്ക് പണി തന്നതല്ല ഞാൻ ഒരു പണി കൊടുത്തതാ… പക്ഷെ അതത്ര ഏറ്റില്ല എന്ന് തോന്നുന്നു…”

“നിനക്ക് നിന്റെ ഈ സ്വഭാവം ഇത് വരെ നിർത്താറായില്ലേ അരുണേ… കോളേജിന് ശേഷം നീ പെണ്ണുങ്ങളെ കുറിച്ചൊന്നും പറയാത്തത് കേട്ടപ്പോൾ ഞാൻ കരുതി നീ നന്നായിക്കാണും എന്ന്…”

“കോളേജിന് ശേഷം വേറെ പെണ്ണുങ്ങൾ ഒന്നും ഉണ്ടായിരുന്നില്ല കാരണം ഇവൾ തന്നെ ആണ്, ഇവൾ അത്രക്കെന്നെ അപമാനിച്ചിരുന്നു. ഏത് പെണ്ണിനെ കണ്ടാലും എനിക്കവൾ അവസാനം പറഞ്ഞ വാക്കുകൾ ആണ് ഓർമ വരുന്നത്., അപ്പൊ ഉറപ്പിച്ചതാ അവൾക്ക് ഒരു പണി കൊടുത്തിട്ടേ ഉള്ളു ബാക്കി കാര്യം എന്ന്”

“ഇതൊന്നും ശരിയല്ല, അവൾ എന്തെങ്കിലും നിന്നോട് പറഞ്ഞിട്ടുണ്ടെങ്കിൽ അത് നിന്റെ സ്വഭാവത്തിന്റെ ആണ് അതിന് അവളോട് പക പൊക്കുക എന്നൊക്കെ പറഞ്ഞാൽ ഭയങ്കര മോശമാണ്”