അനാമികയുടെ കഥ 3 [പ്രൊഫസർ ബ്രോ] 189

“ഡോക്ടർ… എനിക്ക് കുറച്ചു സംസാരിക്കാൻ ഉണ്ടായിരുന്നു”

“വരൂ… ”

രാഘവന്റെ മുഖഭാവത്തിൽ നിന്നും അയാൾ സംഭവിച്ചതെല്ലാം പറയാൻ പോകുകയാണെന്ന് ഗൗതമിന് മനസ്സിലായി

ഗൗതം അയാളെയും കൂട്ടിക്കൊണ്ട് തന്റെ കൺസൾട്ടിങ് റൂമിലേക്ക് നടന്നു.

“ഇരിക്കൂ…”

രാഘവനോട് ഇരിക്കുവാനായി പറഞ്ഞുകൊണ്ട് അയാൾക്കെതിരെയുള്ള കസേരയിൽ ഗൗതമും ഇരുന്നു

രാഘവൻ പറഞ്ഞ് തുടങ്ങി

“സീത പറഞ്ഞതനുസരിച്ചു വീട്ടിലേക്കുള്ള സാധനങ്ങൾ വാങ്ങാൻ പോയതായിരുന്നു ഞാൻ, വീടിനു മുന്നിൽ പരിചയമില്ലാത്ത വണ്ടി കണ്ട് ആരോ വന്നിട്ടുണ്ടെന്ന് മനസ്സിലാക്കിയാണ് ഞാൻ വീട്ടിലേക്ക് കയറിയത്

സീതയാണ് അവന്റെ പേര് അരുൺ എന്നാണെന്നും അനുവിന്റെ സുഹൃത്താണെന്നും പറഞ്ഞ് അവനെ പരിചയപ്പെടുത്തിയത്

അവന്റെ മുതിർന്നവരോടുള്ള ബഹുമാനവും സംസാരത്തിലുള്ള ഭവ്യതയും എന്നെ സ്വാധീനിച്ചു. അവനോടുള്ള സംസാരത്തിൽ ഉടനീളം അവൻ ആ ബഹുമാനം കാത്തുസൂക്ഷിച്ചിരുന്നു

അനുവും അവനും തമ്മിൽ പ്രണയത്തിൽ ആണെന്ന് പറഞ്ഞപ്പോൾ എനിക്കാദ്യം ഒരു ഞെട്ടൽ ആയിരുന്നു. എന്റെ മോളെ ഞാൻ അത്ര അധികം വിശ്വസിച്ചിരുന്നു എന്നുള്ളതാണ് സത്യം.

എന്നാൽ അവൻ പിന്നീട് പറഞ്ഞ കാര്യങ്ങളാണ് എന്നെ തകർത്ത് കളഞ്ഞത്. എന്റെ മോളോട് എനിക്കുണ്ടായിരുന്ന വിശ്വാസങ്ങൾ എല്ലാം തകർക്കാൻ പോന്നതായിരുന്നു അവൻ പറഞ്ഞ കഥകളും അവൻ അതിനു കാണിച്ച തെളിവുകളും

അനുവിന്റെ കല്യാണം ഞങ്ങൾ ഉറപ്പിച്ചു എന്നും അവളുടെ അമ്മാവന്റെ മകൻ ആണ് വരൻ എന്നും അവൾ അരുണിനോട് പറഞ്ഞു എന്നാണ് അവൻ ഞങ്ങളോട് പറഞ്ഞത്

അവൻ അതിന് തെളിവായി കാണിച്ചത് അവർ തമ്മിലുള്ള വാട്സ്ആപ്പ് ചാറ്റ് ആയിരുന്നു. അത് കാണുന്നത് വരെയും അവൻ പറയുന്നത് നുണയാകും എന്നൊരു ചെറിയ പ്രതീക്ഷ എനിക്കുണ്ടായിരുന്നു.

ഒരു മാതാപിതാക്കളും കാണാൻ ആഗ്രഹിക്കാത്ത തരത്തിൽ ഉള്ള മെസ്സേജുകൾ ആയിരുന്നു അതിനുള്ളിൽ മുഴുവൻ. അവൻ കാണിച്ചതിൽ നിന്നും എപ്പോഴും അതിന് മുൻകൈ എടുത്തിട്ടുള്ളത് അനു ആണെന്ന് ഞങ്ങൾക്ക് മനസ്സിലാവുകയായിരുന്നു

ആ ചാറ്റിന്റെ അവസാനത്തിൽ അവൻ അവളോട് കേഴുകയായിരുന്നു. അവനെ ഉപേക്ഷിക്കരുത് എന്നും അവൻ വന്നു ഞങ്ങളോട് സംസാരിക്കാം എന്നും…

അപ്പോഴും അവളുടെ മറുപടി അവളുടെ കല്യാണം വീട്ടുകാർ ഉറപ്പിച്ചു വീട്ടുകാരെ ധിക്കരിക്കാൻ പറ്റില്ല എന്നായിരുന്നു

ഇതെല്ലാം കണ്ട് തകർന്നിരുന്ന ഞങ്ങളെ സമാധാനിപ്പിക്കുകയാണ് അരുൺ ചെയ്തത്… അവൾ പറഞ്ഞതെല്ലാം കള്ളമാണ് എന്നറിഞ്ഞിട്ടും അവൾ അവനെ ചതിച്ചു എന്നറിഞ്ഞിട്ടും അവളെ കല്യാണം കഴിക്കുവാൻ തയാറാണ് എന്നാണ് അവൻ പറഞ്ഞത്

വീട്ടിൽ നിന്നും തിരികെ പോകുന്ന സമയത്ത് അവൻ കരയുകയായിരുന്നു