അനാമിക 4 [Jeevan] 284

അന്നേ ദിവസം അങ്ങനെ പോയി , ഒന്നിനോടും താൽപര്യം തോന്നിയില്ല . വൈകീട്ട് ക്ലബ് പരുപാടികള്‍ക്കും മറ്റും പോയിരുന്നു എങ്കിലും മനസ്സ് ഉറച്ചില്ല , അത് കൊണ്ട് നേരത്തെ തന്നെ വീട്ടില്‍ കയറി. രാത്രി ഭക്ഷണം കഴിഞ്ഞു കിടന്നപ്പോളും ആ മുഖം മാത്രമായിരുന്നു മനസ്സില്‍, നിദ്രാദേവി പുല്‍കുന്നതും കാത്തു അങ്ങനെ കിടന്നു.. എപ്പോളോ ഉറങ്ങിപ്പോയി. പിന്നീടുള്ള ദിവസങ്ങളിലും ഒന്നിനുമൊരു ഉഷാര്‍ ഉണ്ടായിരുന്നില്ല, എങ്ങനെയൊക്കെയോ ദിവസങ്ങള്‍ തള്ളി നീക്കിക്കൊണ്ടിരുന്നു , ഇതിന്‍റെ ഇടക്ക് പല തവണ അമ്മയുടെ തറവാട്ടില്‍ പോയിരുന്നു എങ്കിലും അവളെ ഒരുതവണപോലും കാണാനായില്ല.  അത് പിന്നേയും എന്നെ തളര്‍ത്തി . ഒരു നോട്ടം  മാത്രം കൊണ്ട് അവള്‍ എന്‍റെ ഹൃദയത്തില്‍ എത്രമാത്രം ആഴത്തില്‍ കുടിയേറി എന്നുള്ള ഒരു തിരിച്ചറിവു കൂടെ ആയിരുന്നു അത്.

ആരോടെങ്കിലും ഇത് പറയാം എന്നു വിചാരിച്ചു വിഷ്ണുവിനെ വിളിക്കാന്‍ തുടങ്ങിയപ്പോള്‍ അവന്‍ ഫാമിലി ആയി ടൂര്‍ പോയിരിക്കുകയാണെന്ന് അറിഞ്ഞത്. അങ്ങനെ മനസ്സില്‍ ഉള്ളത് പറയാന്‍ ആയി കുഞ്ഞുസ് തന്നെയേയുള്ളൂ എന്നു മനസ്സിലാക്കി നേരെ തറവാട്ടില്‍ പോയി അവളെയും പൊക്കി ചുറ്റിപാറയില്‍ പോയി ഇരുന്നു. എന്‍റെ ഇരിപ്പും ഭാവവും കണ്ടപ്പോളേ സ്പെല്ലിങ്ങ് മിസ്റ്റേക്ക് അടിച്ച കക്ഷി ഇങ്ങോട്ട് ചോദിച്ചു-

” എന്താണ് മാഷെ പ്രശ്നം , പതിവില്ലാത്ത ഒരു വൈക്ലഭ്യം മുഖത്ത് … വല്ല പ്രേമ പനിയും പിടിച്ചോ … ”

ഞാന്‍ അവളുടെ മുഖത്ത് നിരാശ നിറഞ്ഞ ഒരു നോട്ടം നോക്കി നടന്നത് മുഴുവന്‍ പറഞ്ഞു. അവള്‍ അത് കേട്ടു പൊട്ടിചിരിക്കാനും . എന്‍റെ ടെംബര്‍ തെറ്റിയെങ്കിലും ഞാന്‍ കണ്‍ട്രോള്‍ ചെയ്തു. അവള്‍ ചിരി നിര്‍ത്തി പറഞ്ഞു തുടങ്ങി-

” എന്‍റെ ഏട്ടാ … ഇങ്ങനെ ഒരു പ്രേമം ഞാന്‍ ആദ്യം ആയി കേള്‍ക്കുവാ … ഒരു നോട്ടം ആകെ കണ്ടു … അങ്ങനെ അട്രാക്റ്റഡ് ആയത് ഒരുപാട് കേട്ടിട്ടുണ്ട് … പക്ഷേ ഇത്രേം മൂത്തത് ആദ്യമായാ കേള്‍ക്കുന്നത് …

അതിരികട്ടെ കാണാന്‍ വലിയ നാടന്‍ ലുക്ക് ഒക്കെ സങ്കല്‍പം എന്നു പറഞ്ഞയാള്‍ അതൊക്കെ മറന്നോ … ഇത് പറഞ്ഞു കേട്ടിട്ടു അല്പം മോഡേണ്‍ ആണല്ലോ … അതും പോട്ടെ ഇത്രേം നാളും എന്തോരം പെണ്‍പിള്ളേര്‍ ഇഷ്ടം ആണെന്ന് പറഞ്ഞു വന്നതാണ് … അവളുമാരുടെ ഒക്കെ ശാപം ആകും … ”

ഞാന്‍ ദയനീയമായി അവളെ നോക്കി, അവള്‍ തുടര്‍ന്നു –

” വിഷമിക്കേണ്ട … തറവാടിനപ്പുറമുള്ള വീട് എന്നല്ലേ പറഞ്ഞേ … അവിടെ ആരെയേലും പരിചയമുണ്ടോ … ”

” അവിടങ്ങനെ പരിചയം ഇല്ല … പക്ഷേ അവിടെ ഉള്ളവരെയെനിക്കറിയാം , ഒരു ഭാസ്കര പിള്ള എന്ന ആളും ഭാര്യയും ആണ് താമസം , എന്‍റെ അപ്പൂപ്പന്‍റെ ഏജ് ഉണ്ട് . അവർക്ക് രണ്ടു പെണ്‍മക്കള്‍ ആണെന്നറിയാം അവരൊക്കെ എവിടെയാ എന്നൊന്നും അറിയില്ല … ”