അനാമിക 4 [Jeevan] 285

അങ്ങനെ വണ്ടി നീങ്ങുന്നതിനു ഒപ്പം ഞങ്ങളുടെ സംസാരവും നീങ്ങിക്കൊണ്ടിരുന്നു. ജീവിതം, കുടുംബം, സുഹൃത്തുക്കൾ, ഹോബി അങ്ങനെ ഓരോ കാര്യങ്ങൾ ഞങ്ങൾ സംസാരിച്ചു വളരെ അടുത്തു. ആദ്യം ഉണ്ടായിരുന്ന ടെൻഷൻ ഒന്നുമില്ലാതെ വളരെ റിലാക്സ്ഡ്‌ ആയിരുന്നു ഞാൻ.

അവളും നല്ല ഓപ്പൺ ആയി സംസാരിച്ചു തുടങ്ങിയിരുന്നു. പക്ഷെ ഇഷ്ടം ആണെന്നുള്ള കാര്യം ഞാൻ അവളോട്‌ പറഞ്ഞില്ല. അവൾ നല്ല ഒരു ഡാൻസർ ആണെന്ന് അറിഞ്ഞു, വെറുതെ അല്ല അവളുടെ നടത്തത്തിലും ഭാവത്തിലും ഒരു നർത്തകിയുടെ രീതികൾ വന്നത് എന്ന് മനസ്സിലോർത്തു.

ഉദ്ദേശം 7 മണി ആകാറായപ്പൊളേക്കും ഞങ്ങൾ ക്ഷേത്രത്തിനു മുൻപിൽ എത്തിയിരുന്നു. മാർക്കണ്ഡേയ മുനി പ്രതിഷ്ഠിച്ച ഈ ക്ഷേത്രം ഒരു കുന്നിൻ മുകളിൽ ആണ്. കുന്നിനു താഴെയായി ഭൈരവി നദി ഒഴുകുന്നു. ഏറ്റവും മുകളിൽ ആണ് പ്രധാന പ്രതിഷ്ഠ.

അവിടേക്കു കയറാൻ 456 പടവുകൾ ഉണ്ട്. അതിൽ ഓരോ 8 പടവുകൾ കയറുമ്പോളും ഒരു ചെറിയ ശ്രീ കോവിൽ ഉണ്ട് അതിൽ ഉപഭൈരവ പ്രതിഷ്ഠയും. അഷ്ട ഭൈരവരുടെ ഓരോരുത്തരുടെയും താഴെ 7 ഭൈരവന്മാർ ഉണ്ട്, അവരെ ആണ് ഉപഭൈരവർ എന്ന് വിളിക്കുന്നത്. അങ്ങനെ 49 ഭൈരവ ക്ഷേത്രം താണ്ടി മുകളിൽ എത്തുമ്പോൾ അഷ്ട ഭൈരവരുടെയും മഹാകാല ഭൈരവന്റെയും പ്രതിഷ്ഠയും വിശ്രമ മണ്ഡപം ഒക്കെയുണ്ട്.

താഴെ കുന്നിൻ ചുവട്ടിൽ ചെറിയ കുറച്ചു  കടകൾ മാത്രം ആണ് ഉള്ളത്. പൂജ സാധനങ്ങൾ വിൽക്കുന്ന കട , ചായക്കട, പൂക്കട, കരിക്കും മറ്റും വിൽക്കുന്ന കട, ഇത്രയൊക്കെ തന്നെ.

ക്ഷേത്രത്തിന്റെ താഴെ വണ്ടി പാർക്ക്‌ ചെയ്തു യാത്രാ ക്ഷീണം കൊണ്ടു ഒന്ന് മൂരി നിവർന്നു അവളെയും വിളിച്ചു ഒരു ചായ കുടിച്ചു. തൊഴാൻ പോകുന്നതിനു മുൻപ് ഭൈരവി നദിയിൽ ഇറങ്ങി കാലും കയ്യും കഴുകണം എന്നുണ്ട്.

ഞങ്ങൾ പടി കെട്ടിയ കടവിൽ ചെന്നു കയ്യും കാലും കഴുകി. തെളിഞ്ഞ തണുത്ത വെള്ളത്തിൽ മുഖം കഴുകിയപ്പോൾ അത്രയും നേരം ഉണ്ടായിരുന്ന യാത്ര ക്ഷീണം പമ്പ കടന്നു.

പതിയെ ഞങ്ങൾ ക്ഷേത്രത്തിലേക്കുള്ള പടവുകൾ കയറി തുടങ്ങി. ആദ്യ 8 പടവു എത്തിയപ്പോൾ ചെറിയ ഒരു പരന്ന ഭാഗം, അവിടെ ഇടത് വശം ചെറിയ ശ്രീകോവിൽ അവിടെ ധൂപവും വിളക്കും ഉണ്ട്. ഭസ്മാലംകൃതമായ പ്രതിഷ്ഠ.

അവിടെ തൊഴുതു പിന്നെയും 8 പടവുകൾ കഴിഞ്ഞു അതെ പോലെ ഒരു പരന്ന ഭാഗം, എന്നാൽ ഇവിടെ വലതു വശത്തു ആയിരുന്നു ശ്രീ കോവിൽ. അങ്ങനെ ഒന്നിടവിട്ട് ഇടത്തും വലത്തുമായി ശ്രീ കോവിൽ ഉണ്ട്.

അങ്ങനെ പടവുകൾ കയറിയും തൊഴുതും ഞങ്ങൾ ഏറ്റവും മുകളിലേക്കു പൊയ്‌ക്കൊണ്ടിരുന്നു, കുറെ ആയപ്പോള്‍ അവള്‍ നന്നായി തളര്‍ന്നിരുന്നു, എന്‍റെ വലതു കയ്യില്‍ രണ്ടു കൈകൊണ്ടും പിടിച്ച്  പണിപ്പെട്ടാണ് അവള്‍ നടന്നത്.

അങ്ങനെ നടക്കുമ്പോള്‍ ഇടക്ക് മുഖം താത്തി അവളുടെ മുഖത്തേക്ക് നോക്കിയപ്പോള്‍ അവളും എന്‍റെ കണ്ണുകളിലേക്ക് നോക്കി, ഞങ്ങളുടെ മിഴികള്‍ പരസ്പരം ഉടക്കിയപ്പോള്‍ എന്‍റെ മനസ്സില്‍ ഒരു കൊള്ളിയാന്‍ മിന്നി, അവളും ഞാനും ഒന്നിച്ചു നോട്ടം മാറ്റി. പിന്നീട് രണ്ടു പേരും ഒന്നും മിണ്ടിയില്ല കുറച്ചു സമയം.

അങ്ങനെ നടന്ന്‍ ഞങ്ങള്‍ ഏറ്റവും മുകളിലെത്തി, അവിടെ പരന്ന പ്രതലമാണ്. അവിടെ ഇടത്തെ അറ്റം വിശ്രമ മണ്ഡപം അതിന്റെ അടുത്തു തന്നെ കാര്യാലയം മറ്റുമുണ്ട്. വിശ്രമ മണ്ഡപം കഴിഞ്ഞാൽ അഗാധമായ കൊക്കയാണ്, താഴെ ഭൈരവി നദി ഒഴുകുന്നത് കാണാനാകും.