😈Guardian Ghost😈 Part -3 ༆ കർണൻ(rahul)༆ 342

 

 

               😈Guardian Ghost – 3😈

By

                  ༆ കർണൻ(rahul)༆

Previous part

 

 

ആ വണ്ടി സിറ്റി ഹോസ്പിറ്റലിലേക്ക് ചീറി പായുമ്പോഴും അവൻ അവളുടെ കുഞ്ഞിന്നാൾ മുതലുള്ള കാര്യങ്ങൾ ഓർക്കുകയായിരുന്നു. അവൻ പോലും അറിയാതെ ആ ചെകുത്താന്റെ കണ്ണുകളിൽ നിന്ന് അവൾക്കായി ഒരുതുള്ളി കണ്ണുനീർ ഒഴുകി കാറ്റിൽ അലിഞ്ഞു ചേർന്നു. തന്റെ കുഞ്ഞിന് ഒരാപത്തും വരുത്തരുതേ എന്നുള്ള പ്രാർഥനയുടെ കണ്ണുനീർ.

തുടരുന്നു…..

അവന്റെ ഥാർ ഹോസ്പിറ്റൽ കോമ്പൗണ്ടിലേക്ക് കുതിച്ചു കയറി.
താക്കോൽ സെക്ക്യുരിറ്റിക്ക് കൊടുത്ത് അവൻ ഉള്ളിലേക്ക് പാഞ്ഞു.

അയാൾ ആ താക്കോലുമായി വണ്ടി ഒതുക്കി പാർക്ക് ചെയ്യാൻ പോയി.
അവൻ ഏവർക്കും സുപരിചിതൻ ആയതുകൊണ്ട് തന്നെ അവിടെ അവന്
മുന്നിൽ ചോദ്യങ്ങൾ ഉയരാറില്ല.

അവൻ ധൃതഗതിയിൽ ഉള്ളിലേക്ക് പാഞ്ഞു.അപ്പോഴേക്കും അപ്പച്ചൻ അമ്മച്ചിക്കും ഷെറിനും ഉള്ള ചായയും മറ്റും വാങ്ങാനായി ക്യാന്റീനിലേക്ക് പോകുകയായിരുന്നു. പെട്ടെന്ന് അവനെ മുന്നിൽ കണ്ടപ്പോൾ അദ്ദേഹം ഒന്ന് നിന്നു. അവന്റെ മുഖത്തേക്ക് ഉറ്റു നോക്കി. പക്ഷെ അവൻ അദ്ദേഹത്തെ കണ്ടിട്ടും കാണാത്തതുപോലെ ഉള്ളിലേക്ക് പോകാനായി തുനിഞ്ഞു.

മോനെ മിഖാ…. അദ്ദേഹം അവനെ വിളിച്ചു. ആ വിളിയിൽ ഒരു അപ്പന്റെ ദയനീയത ക്ഷമാപണം എല്ലാം അടങ്ങിയിരുന്നു.

ആ വിളി കേട്ടതും അവൻ പോലും അറിയാതെ അവന്റെ കാലുകൾ ഒരു നിമിഷം നിശ്ചലമായി. എന്നിട്ട് പിന്നെയും അവൻ നടന്നു മുന്നോട്ട് പോയി.

അദ്ദേഹത്തിന്റെ കണ്ണുകളിലെ പ്രതീക്ഷ അസ്തമിച്ചു. ആ കണ്ണുകൾ നിറഞ്ഞു അത് മറ്റുള്ളവർ കാണാതിരിക്കാനായി തല താഴ്ത്തി മുന്നോട്ട് പോയി.

അവൻ നേരെ ICU വിനു മുന്നിലേക്ക് പോയി.

അവിടെ അമ്മച്ചിയും ഷെറിനും ജോണച്ചായനും ഉണ്ടായിരുന്നു. അവനെ കണ്ടതും അവർ എഴുന്നേറ്റു. പക്ഷെ അവർ അവിടെ ഉണ്ടെന്നുള്ളത് പോലും വകവയ്ക്കാതെ അവൻ ഉള്ളിലേക്ക് പോകാനായി ഡോർ തുറന്നു.

അപ്പോഴേക്കും അവിടെ ഉണ്ടായിരുന്ന നേഴ്സ് ഓടിപിടച്ചു വന്ന് അവനെ തടഞ്ഞു.

അല്ല ഇത് എങ്ങോട്ട ഈ തള്ളികേറി പോകുന്നെ. പുറത്തെങ്ങാനും പോയി നിൽക്കെടോ. ഇതേ ICU ആണ് അല്ലാണ്ട് മ്യൂസിയം ഒന്നുമല്ല വഴിയേ പോകുന്നവർക്കും വരുന്നവർക്കും ഓടിക്കേറി വരാൻ.

നീ ഏതാ ഇവിടെ പുതിയതാണോ?
നേഴ്സിന്റെ സംസാരം ഇഷ്ട്ടപ്പെടാതെ അവൻ ചോദിച്ചു.