😈Guardian Ghost😈 Part -3 ༆ കർണൻ(rahul)༆ 342

ഒഹ് ഇതിനും മാത്രം കൊട്ടിഘോഷിക്കാൻ ആരാ അങ്ങേര്? ശ്രയ ചെറിയൊരു പുച്ഛം പോലെ അഭിനയിച്ചുക്കൊണ്ട് അതിലേറെ ആകാംഷയോടെ ചോദിച്ചു.

നീ ഗോസ്റ്റിനെ കുറിച്ച് കേട്ടിട്ടില്ലേ? മുംബൈ അണ്ടർ വേൾഡിൽ ഒറ്റ രാത്രികൊണ്ട് സംഹാര താണ്ടവം നടത്തിയ ഗോസ്റ്റ്….

ഏത് ആ കൊച്ചിന്റെ കേസിൽ പ്രശ്നം ആയിട്ട് പത്തൻപത്തോളം പേരെ കൊന്ന അയാളോ? അയാളുടെ ആരാ ഇങ്ങേർ? ശ്രയ എയ്ഞ്ചൽ പറഞ്ഞുകൊണ്ടിരുന്നതിനു ഇടയ്ക്ക് കയറി ചോദിച്ചു.

ഹാ പഷ്ട്ട് സത്യത്തിൽ നീ നേഴ്സ് ജോലി കള്ള സർട്ടിഫിക്കറ്റ് വച്ചു വാങ്ങിയതാണോ. നിന്റെ രീതി കണ്ടിട്ട് തുണ്ട് വച്ചാൽ പോലും അത് ഏത് ഭാഗം ആണെന്ന് അറിയാൻ ടെക്സ്റ്റ്ബുക്ക്‌ കൂടെ കൊണ്ട് പോകുന്ന ഇനമായിട്ടാ തോന്നുന്നേ. ഡി കൊച്ചേ ആ ഗോസ്റ്റിന്റെ മുന്നിൽ കിടന്ന നീ ഇത്രയും നേരം തിരുവാതിര കളിച്ചത്. അവനെങ്ങാനും ഇടഞ്ഞിരുന്നെങ്കിൽ ആ കൊച്ച് കിടക്കുന്നതിന്റെ അടുത്തായി ഞാൻ നിനക്ക് വേണ്ടി കൂടെ ഒരു ബെഡ് ബുക്ക് ചെയ്യേണ്ടി വന്നേനെ. എയ്ഞ്ചൽ പറഞ്ഞു നിർത്തി.

ശ്രയയുടെ മുഖത്ത് അപ്പോൾ ഭയവും എന്നാൽ അതിലേറെ അമ്പരപ്പും നിറഞ്ഞു നിന്നു.

ICU നു പുറത്ത്…..

ഡാ ജോണേ എന്റെ മോൻ എന്നെ ഒരു നോക്ക് പോലും തിരിഞ്ഞു നോക്കിയില്ലെടാ. അവൻ അത്രയ്ക്ക് വെറുത്തുപോയോ എന്നെ. അവൻ എന്നോട് ഒന്ന് മിണ്ടിയിട്ട് ഇപ്പോ എട്ട് വർഷമായി. അമ്മച്ചി തേങ്ങലോടെ പറഞ്ഞു.

അമ്മച്ചി മറന്നുപോയോ അവനോട് അന്ന് പറഞ്ഞതൊക്കെ. ഏറ്റവും കൂടുതൽ വിശ്വസിക്കേണ്ട കൂടെ നിൽക്കേണ്ട നമ്മളല്ലേ അവനെ തള്ളി പറഞ്ഞത്. അവളെ മോളെപോലെ അല്ല സ്വന്തം മോളായി തന്നെ കാണുന്നത്കൊണ്ട് മാത്രമാണ് അവൻ ഇവിടെ. അത് പറയുമ്പോഴും ജോണച്ചായന്റെ തല താഴ്ന്നിരുന്നു.