??നീ…. സ്വയം തീ ആവുക?? [ചെകുത്താനെ സ്നേഹിച്ച മാലാഖ ] 303

 

ലക്ഷ്മി പുതിയ വാടക വീട്ടിൽ ചായ ഒക്കെ ഇട്ട് കപ്പുകളിൽ ആക്കി അജയ് ശങ്കറിനും ഗോപാലൻ നായർക്കും കൊടുത്തു . ഓരോ കപ്പ് ചായയും എടുത്ത് ലക്ഷ്മിയും അർച്ചനയും അവരോടൊപ്പം ഹാളിലെ ചെയറിൽ ഇരുന്നു ….

 

” നല്ല സ്ഥലം ആണല്ലോടോ ഇവിടം മുഴുവൻ …… ”

 

ഗോപാലൻ നായർ അജയ് ശങ്കറിനോട് ചോദിച്ചു . അതിന് അവൻ ഒന്ന് ചിരിക്കുക മാത്രം ചെയ്തു.

 

” താൻ എന്താ ചെയ്യുന്നത് …. അന്ന് വീട് കാണാൻ വരാൻ എനിക്ക് പറ്റിയില്ലല്ലോ … സ്കൂളിലെ പ്യൂണാ പറഞ്ഞത് താൻ എല്ലാ കാര്യവും നോക്കിക്കോളും എന്ന് ……. ”

 

ഗോപാലൻ നായർ പറഞ്ഞു .

 

” സർ ഞാൻ കൃഷിയും പാർട്ടി പ്രവർത്തനവും അല്ലറ ചില്ലറ ഇതു പോലെ വീട് വാടകയ്ക്ക് ഏർപ്പാടാക്കി കൊടുത്തും ഒക്കെ അങ്ങനെ പോണു…… ”

 

അജയ് ശങ്കർ ഒരു പുഞ്ചിരിയോടെ പറഞ്ഞു .

 

” അതെന്താടോ ….. തനിക്ക് കുറച്ചു കൂടി നല്ലൊരു ജോലിക്ക് ശ്രമിച്ച് കൂടെ …..? ”

 

ഗോപാലൻ നായർ അജയ് ശങ്കറിനോട് ചോദിച്ചു .

 

” സർ എനിക്ക് ടെക്നോ പാർക്കിൽ HR എക്സിക്യൂട്ടീവായി ജോലി ഉണ്ടായിരുന്നതാ ….. ഞാൻ അത് കളഞ്ഞു … എനിക്ക് ഒരു ഫാനിന്റെ ചുവട്ടിൽ ഇരുന്ന് ജോലി എടുക്കുന്നത് ഇഷ്ടമല്ല . കൃഷി അതാ ഇഷ്ടം ….. ”

 

അജയ് ശങ്കർ ഒരു പുഞ്ചിരിയോടെ പറഞ്ഞു …. അതിന് ഗോപാലൻ നായരും ഒന്ന് പുഞ്ചിരിച്ചു , ഇപ്പോഴും ഇതു പോലെ ചിന്തിക്കുന്ന ചെറുപ്പക്കാർ
ഉണ്ടല്ലോ എന്ന അതിശയത്തിൽ .

 

” അയൽക്കാരൊക്കെ എങ്ങനെയാ മോനെ ….. ?”

 

ലക്ഷ്മിയാണ് അജയിയോട് …. ചോദിച്ചത്

 

” ആന്റി …. ഇവിടെ അപ്പുറത്ത് ആ ഒരു വീടെ തൊട്ട് അടുത്തതായി ഉള്ളൂ …. ബാക്കിയൊക്കെ രണ്ട് മൂന്ന് നിലങ്ങൾക്ക് അപ്പുറത്താ ….. ”

 

അജയ് ജനാലയിലൂടെ തൊട്ടപ്പുറത്തെ ഒരു ഓടിട്ട വീട് നോക്കിക്കൊണ്ട് പറഞ്ഞു ……

 

” അവരെങ്ങനെയാ മോനേ ….. ആരൊക്കെ ഉണ്ട് അവിടെ …..? ”

 

ലക്ഷ്മി വീണ്ടും ചോദിച്ചു.

 

അവിടെ നിങ്ങളുടെ പ്രായത്തിലുള്ള ദമ്പതികൾ മാത്രമേ ഇപ്പൊ ഉള്ളൂ ……

 

അജയ് പറഞ്ഞു .

 

” മോനേ അവർക്ക് മക്കൾ ഇല്ലേ …… ”

 

ലക്ഷ്മി വീണ്ടും ചോദിച്ചു.

 

” ഉണ്ടായിരുന്നു , ഇളയത് അശ്വതി അവൾ രണ്ട് വർഷം മുൻപ് മരിച്ചു . പിന്നെ മുത്തത് ജീവൻ എന്റെ കൂട്ടുകാരനാ…. അവൻ ഇപ്പൊ ജയിലിലാ …. ”

 

അജയ് അൽപം സങ്കടത്തോടെ പറഞ്ഞു.