💘 അരികത്തായാരോ – 8 💘 വിച്ചു [ ചെകുത്താനെ സ്നേഹിച്ച മാലാഖ ] 1183

അൽപ്പ സമയം കഴിഞ്ഞതും ….

” മിസ് മേ ഐ ഗെറ്റ് ഇൻ ….. ”

പരിചിതമായ ആ ശബ്ദം കേട്ട് അജു വേഗം മുഖമുയർത്തി നോക്കി , അവന്റെ മുഖത്ത് അവൻ പോലുമറിയാതെ ഒരു പുഞ്ചിരി വിടർന്നു . മിസ്സ് അകത്തേയ്ക്ക് കയറാൻ പറഞ്ഞതും അഹാനയും ദേവുവും ക്ലാസ്സിൽ കയറി അവരുടെ സീറ്റുകളിൽ ഇരുന്നു ….

” എന്താടാ നിന്റെ മുഖം ഇപ്പൊ നൂറ് വാട്ട് ബൾബ് കത്തിച്ചത് പോലെയുണ്ടല്ലോ ? ”

അജുവിന്റെ തോളിൽ തട്ടിക്കൊണ്ട് യദു ഒരു പുഞ്ചിരിയോടെ ചോദിച്ചു . അതിന് അവൻ ഒരു പുഞ്ചിരിയോടെ അഹാന ഇരിക്കുന്ന ബഞ്ചിലേയ്ക്ക് തിരിഞ്ഞ് നോക്കി …

സമയം കടന്ന് പോയി …. ഇന്റർവെല്ലിന്റെ ബെൽ മുഴങ്ങിയതും അജുവും യദുവും തങ്ങളുടെ സ്ഥിരം സങ്കേതത്തിലേയ്ക്ക് നീങ്ങി ….
ക്യാമ്പസിനകത്തെ ആ മരച്ചുവട്ടിലെ കരിങ്കൽ കെട്ടിന് പുറത്ത് ആ മരത്തിന്റെ തണലിൽ അവരിരുവരും ഇരുന്നു …..

” എന്താടാ അവളോടൊന്നും സംസാരിക്കാതെ നേരെ ഇങ്ങ് പോന്നത് … നിന്റെ പിണക്കം മാറിയില്ല എന്നുണ്ടോ …. ? ”

യദു അവനോട് ചോദിച്ചു …

” പിണക്കമൊന്നുമില്ല … പക്ഷെ ഞാനൊരു വാക്ക് കൊടുത്തിട്ടുണ്ട് ഒരു ശല്യത്തിനും ഞാനായിട്ട് ചെല്ലില്ല എന്ന് പിന്നെ ഇഷ്ടമാണെന്ന് അവൾ എന്നോട് വ്യക്തമായി പറഞ്ഞിട്ടില്ലല്ലോ ….. അത് തന്നെയാ കാരണം . ”

അവനതും പറഞ്ഞ് ദൂരേയ്ക്ക് നോക്കി ഇരുന്നു ….
അൽപ്പ സമയം കഴിഞ്ഞതും അഹാനയും ദേവികയും അവരിരിക്കുന്ന സ്ഥലത്തേയ്ക്ക് വന്നു …..