❤️ദേവൻ ❤️part 17 [Ijasahammed] 184

കൂട്ടിനൊരാളായിട്ടല്ല..
ജീവിതലക്ഷ്യങ്ങൾക്ക് ഒരു തടസ്സമായി മാത്രമേ എന്നെ കണ്ടിട്ടുള്ളൂ..
അതുകൊണ്ടാണ് ഞങ്ങൾക്കിടയിലേക്ക് മറ്റൊരാളെ കൊണ്ട് വരാൻ ദേവേട്ടൻ ശ്രമിച്ചുകൊണ്ടിരിക്കുന്നത്…

ശെരിയാണ്..,

ദേവേട്ടനെ സന്തോഷിപ്പിക്കാനോ, വേദനകളെ ആ മനസ്സിൽ നിന്ന് ഇല്ലാതാക്കാനോ എനിക്ക് നാളിത് വരെ കഴിഞ്ഞിട്ടില്ല…
എങ്കിലും ഇടയിലേക്ക് മറ്റൊരാളെ കൊണ്ട് വരുക എന്ന് പറയുമ്പോൾ…?

ആ സ്നേഹം പങ്കിട്ടുപോകുമെന്നതിലുള്ള ഭയമൊന്നുമല്ല..
ഒറ്റക്കുള്ള ദൈർഘ്യമേറിയ പകലുകളുടെ ഏകാന്തത മടുക്കാഞ്ഞിട്ടുമല്ല..

ആരെന്നോ, എന്തെന്നോ അറിയാത്ത ഏതോ ഒരു പെൺകുട്ടിയോട് താലിചാർത്തിയ പെണ്ണിനേക്കാൾ അടുപ്പവും കരുതലും കാണിക്കുന്നത് കാണെ മനസ്സ് വല്ലാതെ മുറിഞ്ഞുകൊണ്ടിരുന്നു..
സ്നേഹിക്കാനും, ആശ്വസിപ്പിക്കാനും, തലോടാനും ഒന്നും ആ കരങ്ങൾ മറന്നിട്ടില്ല…

പിന്നാലെ തേടിവന്നു വാശിപിടിച്ചു സ്വന്തമാക്കിയത്കൊണ്ടാകാം വേണമെങ്കിൽ ആ മറവി എന്നിലേക്ക് മാത്രമായി ചുരുങ്ങിയത്..

ഒരു ദീർഘനിശ്വാസം പോലും എന്നിലിനിഅവശേഷിക്കുന്നില്ലെന്ന് തോന്നി..

ആശ്വാസങ്ങളും പ്രതീക്ഷകളുമെല്ലാം അസ്തമിച്ചുകൊണ്ടിരിക്കുകയാണ്…

ദിവസങ്ങൾ കഴിയും തോറും വിധി വീണ്ടും വീണ്ടും തളർത്തികൊണ്ടിരിക്കുകയാണ്…

വിഷാദഭാവം അല്പം പോലും നിഴലിക്കാത്ത ആ മുഖത്തു സന്തോഷത്തിന്റെ അംശം മാത്രമേ കാണാൻ സാധിച്ചുള്ളൂ..

അവർക്ക് ഇടയിൽ ആയിരിക്കുമ്പോൾ പഴയ ദേവനെ ഞാൻ കണ്മുന്നിൽ കാണുകയായിരുന്നു..