✮കൽക്കി࿐ (ഭാഗം – 32) വിച്ചു [ചെകുത്താനെ സ്നേഹിച്ച മാലാഖ ] 364

ഒരു രുദ്ര താണ്ഡവമായിരുന്നു പിന്നീട് അങ്ങോട്ട് അരങ്ങേറിയത് ….. രക്തം ചീന്തിത്തെറിക്കുന്ന രംഗങ്ങൾ ഒരു ഞെട്ടലോടെയാണ് വേണി മരത്തിന് മറവിൽ നിന്ന് നോക്കിക്കണ്ടത് …

ഒന്നാമൻ വാൾ വീശിയെങ്കിലും അത് ആത്രേയൻ്റെ അടുത്ത് പോലും എത്തിയില്ല അതിന് മുൻപ് തന്നെ വാൾ പിടിച്ച അവൻ്റെ വലത് കൈപ്പത്തി നിലത്ത് പതിച്ചിരുന്നു . ഇതേ സമയം തന്നെ അവൻ്റെ വലത് കൈയ്യിലെ മഴു മറ്റൊരുവൻ്റെ നെഞ്ച് പിളർത്തി …. തൻ്റെ നേർക്ക് വന്ന ഓരോരുത്തരുടെയും കയ്യിലേക്കും കാലിലേക്കും കഴുത്തിലേക്കും അങ്ങനെ ശരീരത്തിൻ്റെ ഓരോ ഇഞ്ചിലേക്കും അവൻ്റെ കയ്യിലെ വാളും മഴുവും തുന്നിച്ചേർക്കാൻ കഴിയാത്ത രീതിയിലുള്ള മുറിവുകൾ ഉണ്ടാക്കിക്കൊണ്ടേയിരുന്നു , ജീവനെടുക്കാൻ പോന്ന മുറിവുകൾ , പതിയെ മണ്ണിൽ വെള്ളത്തിന്റെ നനവിന് പകരം പലയിടത്തും രക്തം തളം കെട്ടി , അവിടുത്തെ കാറ്റിൽ പോലും രക്തത്തിന്റെ ഗന്ധം പടർന്നു …

ആ സമയം രാജ മറ്റ് ചിലർക്ക് കണ്ണുകൊണ്ട് എന്തോ നിർദ്ദേശം കൊടുക്കുന്നത് മരത്തിൻ്റെ മറവിൽ നിന്ന വേണി കണ്ടു . നോക്കുമ്പോൾ ചിലർ ഒളിച്ചിരുന്ന് വില്ലിൽ അമ്പ് എയ്യാൻ ഒരുങ്ങുകയാണ് , എയ്യുന്നതിന് മുൻപ് അമ്പിൽ എന്തോ വിഷം പുരട്ടുകയാണവർ …..

അത് കണ്ടതും ……

വേണി പെട്ടെന്ന് കണ്ണുകൾ മുറുക്കിയടച്ചു ,

‘ ഓം ശ്രീ നാഗരാജായ നമ:

ഓം ശ്രീ നാഗകന്യായ നമ:

ഓം ശ്രീ നാഗയക്ഷ്യെെ നമ: ‘

കണ്ണടയ്ച്ച് ഉരുവിട്ട മന്ത്രങ്ങൾക്കൊപ്പം അവൾ ആ സമയം തൻ്റെ നാഗ രൂപത്തിലേക്ക് മാറുകയും ചെയ്തു ……

മരത്തിൻ്റെ മറവ് പറ്റി നിന്ന ആ അമ്പെയ്ത്തുകാരിൽ ഒരുത്തൻ വിഷം പുരട്ടിയ തൻ്റെ അമ്പ് എയ്യാൻ ഒരുങ്ങിയതും …

” …… ആ …… ”

ഒരു നിലവിളിയോടെ അവൻ തൻ്റെ കയ്യിലിരുന്ന അമ്പും വില്ലും നിലത്തേയ്ക്കിട്ടുകൊണ്ട് താഴേയ്ക്ക് നോക്കി , തൻ്റെ കാലിൽ നിന്ന് രക്തം പൊടിഞ്ഞിറങ്ങുകയാണ് ഒപ്പം തൊട്ടടുത്തായി ഫണ വിടർത്തി നിൽക്കുന്ന ഒരു നാഗവും …

ആ കാഴ്ച കണ്ട് ഒരു നടുക്കത്തോടെ അവൻ ഭയന്ന് പുറകിലേക്ക് വേച്ച് വീണതും ആ നാഗം അവൻ്റെ കയ്യിലേക്ക് വീണ്ടും ദംശിച്ചു .

ഉടനെ തന്നെ ആ നാഗം മറ്റൊരു ഭാഗത്തേയ്ക്ക് ഇഴഞ്ഞ് നീങ്ങി , ആത്രേയന് നേരെ അമ്പെയ്യാൻ ലക്ഷ്യം പിടിക്കുന്ന മറ്റൊരുവൻ്റെ കാലിൽ ദംശിച്ചു …..

” ആ …… ”

ആ വേദനയിലും ഭയത്തിലും അവൻ എയ്ത അമ്പ് ലക്ഷ്യം തെറ്റി വേറെ എങ്ങോട്ടോ പോയി പതിച്ചു …..

ഈ സമയമൊക്കെയും ആത്രേയൻ തൻ്റെ നേർക്ക് വരുന്നവരെ ഓരോന്നോരോന്നായി വെട്ടി വീഴ്ത്തുകയായിരുന്നു , വേണി രൂപം മാറിയതോ അമ്പെയ്ത്തുകാരെ ദംശിച്ചതോ ഒന്നും അവൻ കണ്ടതുമില്ല

അവൻ്റെ ആ അലർച്ച കേട്ട് തിരിഞ്ഞ് നോക്കിയപ്പോഴാണ് രാജ കാണുന്നത് ഒരു സർപ്പം തന്റെ ആൾക്കാരെ ദംശിക്കുന്ന ആ കാഴ്ച … ഉടനെ തന്നെ അവൻ മറ്റുള്ള അമ്പെയ്ത്തുകാർക്ക് നിർദ്ദേശം നൽകിയതും …….

രണ്ടാമനെയും ദംശിച്ച് ജീവനെടുത്ത വേണി മൂന്നാമന് നേരെ തിരിഞ്ഞ സമയം ,

പെട്ടെന്ന് …

മുന്നിൽ നിന്ന് വേഗത്തിൽ പറന്ന് വന്ന വിഷം പുരട്ടിയ ഒരു അമ്പ് അവളുടെ ശരീരത്തിലേയ്ക്ക് തറയ്ച്ച് കയറി , ആ നിമിഷം തന്നെ അവൾ തനിയെ മനുഷ്യരൂപത്തിലേക്കാവുകയും നിലത്തേയ്ക്ക് വീഴുകയും ചെയ്തു .

“…….. ആ …….. ഏ …… ട്ടാ ……. ”

അവളുടെ ആ അലർച്ച കേട്ട് ആത്രേയൻ ഞെട്ടലോടെ തിരിഞ്ഞ് നോക്കിയതും .

അവൻ കണ്ടത് അമ്പ് ശരീരത്തിൽ തറയ്ച്ച് നിലത്ത് വീണ് കിടക്കുന്ന അവളുടെ മനുഷ്യരൂപത്തെയായിരുന്നു , ആ വിഷം പുരട്ടിയ അമ്പ് വന്ന് പതിച്ചിരിക്കുന്നത് അവളുടെ ഇടനെഞ്ചിലും . ഹൃദയത്തിൽ തറയ്ച്ച് കയറിയതു പോലെ ……. ആ കാഴ്ച കണ്ട അവൻ ആദ്യം ഒന്ന് നിശ്ചലമായിപ്പോയി , കണ്ടത് വിശ്വസിക്കാൻ കഴിയാതവണ്ണം അവൻ്റെ ശരീരം പോലും മരവിച്ച് നിന്നു പോയി ….

” … വേ …… വേണീ ……….. ”

ആ രംഗം കണ്ട് ഒരലർച്ചയോടെ നെഞ്ചിലെ പിടച്ചിലോടെ അവൻ മുന്നോട്ട് ഓടി ….. ആ സമയം തൻ്റെ നേരെ വാളുമായി വന്ന ഒരുവൻ്റെ വയറ്റിലേക്ക് വാൾ കുത്തിക്കയറ്റിയ ശേഷം അവനെ ആത്രേയൻ ചവിട്ടി നിലത്തിട്ടു . ആ നിമിഷം മറ്റൊരു ഭാഗത്ത് നിന്ന് വന്ന ഒരമ്പ് പകുതി ബോധത്തിൽ നിലത്ത് വീണ് കിടന്ന വേണിയുടെ വയറ്റിലേയ്ക്ക് തറയ്ച്ച് കയറി …….

” …….. ടേ ……… ടേയ്…….. ”

ഒരലർച്ചയോടെ ഉറക്കെ വിളിച്ചു കൊണ്ട് അവൻ തന്റെ കയ്യിലെ മഴു മുന്നിലേക്ക് വലിച്ചെറിഞ്ഞു അത് ആ അമ്പെയ്ത്തുകാരെൻ്റെ നെറ്റി പിളർത്തിക്കൊണ്ട് തറയ്ച്ച് കയറി . ഒപ്പം തൻ്റെ കയ്യിലെ വാൾ വീശി എറിഞ്ഞതും മറ്റൊരു അമ്പെയ്ത്തുകാരൻ്റെ ഇട നെഞ്ചിൽ അത് കുത്തി പുറക് വശം തുളയ്ച്ച് വന്നു .

ഓടി അവളുടെ അടുത്ത് എത്തിയ അവൻ നിലത്തേയ്ക്ക് വീണ് അവളെ തൻ്റെ മടിയിലേക്ക് വലിച്ച് കയറ്റി …..
അവൻ്റെ കണ്ണുകളിൽ നിന്ന് ഉതിർന്ന് വീഴുന്ന കണ്ണുനീർ അവളുടെ ശരീരത്തിൽ വീണു കൊണ്ടേയിരുന്നു .
എന്തിനേയും ഒരു പുഞ്ചിരിയോടെ നേരിട്ടിരുന്ന അവൻ്റെ മുഖത്ത് ആദ്യമായി ആ സമയം ഭയം എന്ന വികാരം വന്ന് നിറഞ്ഞു .