✮കൽക്കി࿐ (ഭാഗം – 12 ) വിച്ചു [ചെകുത്താനെ സ്നേഹിച്ച മാലാഖ ] 1297

അനുവും അഭിയും ശ്രിയയും ഭയത്തോടെ ആകംഷയോടെ ഒപ്പം ചെറിയ പ്രതീക്ഷയോടെ ആ നദിയിലേക്ക് തന്നെ നോക്കി നിന്നു ….. പെട്ടെന്ന് ആ യുവാവ് വെള്ളത്തിന് പുറത്തേയ്ക്ക് നീന്തി വന്നു ഒപ്പം അവന്റെ ഒരു കൈ അവളുടെ അരയിലൂടെ ചുറ്റി അവളെ തന്നോട് ചേർത്ത് പിടിച്ചിട്ടുമുണ്ട് …. നീന്തി നദിയുടെ ആഴം കുറഞ്ഞ ഭാഗത്ത് എത്തിയതും അവനവളെ തന്റെ കൈകളിൽ കോരിയെടുത്ത് കരയിലേക്ക് വേഗത്തിൽ ഓടിക്കയറി , അതും ഒരുതരം ഭയത്തോടെ പരവേശത്തോടെ …

അൽപ്പം നീണ്ട് വളർന്ന മുടിയും താടിയും ഒപ്പം ശരീരത്തിൽ ശക്തമായ ഉറച്ച പേശികളുമുള്ള ഒരു യുവാവ് , അവന്റെ പേര് ആദിത്യനാഥ് ….. തന്റെ അന്വേഷണങ്ങൾക്കൊടുവിൽ പല സത്യങ്ങളും കേട്ട് കഴിഞ്ഞപ്പോൾ ഒരിക്കലെങ്കിലും നേരിട്ട് കാണണമെന്ന് ദക്ഷ മനസ്സുകൊണ്ട് ആഗ്രഹിച്ച അതെ ആദിത്യനാഥ് .

ആദി ബോധമറ്റ അവളെയും കൊണ്ട് വേഗത്തിൽ കരയിലേക്ക് ഓടിക്കയറി . ശേഷം അവളെ പരന്ന ഒരു പാറ പുറത്ത് പതിയെ നിലത്തായി കിടത്തി .

” ദക്ഷേച്ചി …… ”

അനു ഭയത്തോടെ അവളെ തട്ടി വിളിച്ചു പക്ഷെ ഒരു അനക്കവുമില്ലാത്ത അവസ്ഥ ഒപ്പം ശ്വാസവും എടുക്കുന്നില്ല അതവരുടെ പേടി വർദ്ധിപ്പിച്ചു ….. ആദി വേഗത്തിൽ തന്റെ ഒരു കൈയ്യുടെ പുറത്ത് മറ്റൊരു കൈയ്യായി പിടിച്ച് ദക്ഷയുടെ വയറിലും ശേഷം നെഞ്ചിന്റെ ഭാഗത്തായും ചേർത്ത്‌ വച്ച് ശക്തമായി അമർത്താൻ തുടങ്ങി , തുടരെ തുടരെ അമർത്തിയതും അവളുടെ വായിൽക്കൂടി കുറച്ച് വെള്ളം പുറത്തേയ്ക്ക് പോയി ….. പക്ഷെ എന്നിട്ടും അവളിൽ ഒരു അനക്കവുമുണ്ടായില്ല ….

” ചേട്ടാ …… ദക്ഷേച്ചീ …… ”

കുഞ്ഞു അതും പറഞ്ഞ് പൊട്ടിക്കരയാൻ തുടങ്ങി …..