♨️മനസ്വിനി 🪔6️⃣

Author : 𝓢𝓪𝓲 𝓥 𝓐𝓼𝓱𝓪𝓷 | Previous Part

 

ഞായറാഴ്ച രാവിലെ അമ്മച്ചിയോടൊപ്പം ചെറുപുഴയ്ക്ക് തിരിച്ചു….

മഴപ്പേടി ഉള്ളത് കൊണ്ട് ബസിലാണ് യാത്ര. ചെറുപുഴ സ്റ്റാൻഡിൽ ഇറങ്ങുമ്പോൾ കോരിച്ചൊരിയുന്ന മഴയാണ്…. കിഴക്കോട്ട് കഴിഞ്ഞ രണ്ട് മൂന്ന് ദിവസം ആയിട്ട് ശക്തമായ മഴ ആണെന്ന് വിളിച്ചപ്പോൾ പറഞ്ഞിരുന്നു….

തറവാട്ടിൽ എത്തിയപ്പോൾ ഞങ്ങൾ വരുന്നതും പ്രതീക്ഷിച്ചു അമ്മാമ്മച്ചി ഇറയത്ത് തന്നെ ഇരിപ്പുണ്ട്….എന്നെ കണ്ടതും കെട്ടിപ്പിടിച്ചു ഉമ്മ തന്നു… ഒപ്പം പരിഭവവും…

 

“വല്യ തിരക്ക്കാരൻ ആയി അല്ലെ മോനെ… ഈ വയസ്സത്തിയെ ഒന്ന് വിളിക്കാൻ കൂടി നേരം ഇല്ല അല്ലെ….”

 

ശെരിയാണ്… അമ്മമ്മച്ചിനെ വിളിച്ചിട്ട് കുറെ നാളുകൾ ആയി…. എപ്പോഴും വിചാരിക്കും വിളിക്കണം എന്ന്.. മറ്റു കാര്യങ്ങൾക്കിടയിൽ വിട്ടു പോകും….

ഞങ്ങൾ എത്തിയത് അറിഞ്ഞു മാമന്മാരും മാമിമാരും ഒക്കെ തറവാട്ടിലേക്ക് വന്നു …. ഇച്ചേച്ചിയുടെ കല്യാണകാര്യം തന്നെയാണ് വിഷയം….

അന്ന് ഇച്ചേച്ചി വിളിച്ചപ്പോൾ പറഞ്ഞത് പോലെ ഞായറാഴ്ച അവര് തമ്മിൽ കണ്ടിരുന്നു…

അന്ന് രാത്രി ചെക്കന്റെ അച്ഛൻ വിളിച്ചു… അവർക്കു പൂർണ സമ്മതം ആണെന്ന്…. ഇചേച്ചിക്കും ചെറുക്കനെ ഇഷ്ടപ്പെട്ടു എന്ന് പറഞ്ഞത് കൊണ്ട് അപ്പോ തന്നെ ഞങ്ങളും സമ്മതം അറിയിച്ചു….

അടുത്തയാഴ്ച ചെറുക്കന്റെ കുടുംബക്കാര് വീടുകാണാൻ വരുന്നുണ്ടെന്നു പറഞ്ഞിരുന്നു… അപ്പൊ അതിന്റെ കാര്യങ്ങൾ എല്ലാവരുമായിട്ട് സംസാരിക്കാൻ ആണ് തിരക്കിട്ട് തറവാട്ടിലേക്ക് പോന്നത്….

 

“ഈവ മോളെ കെട്ടാൻ പോകുന്ന ചെക്കന്റെ പേരെന്താ മോനെ…. എത്ര പറഞ്ഞിട്ടും എനിക്ക് ഓർമ നിൽക്കുന്നില്ല….”

“ജോഹാൻ…”

“എനിക്ക് വായിൽ കിട്ടുന്നില്ല…. ”

അമ്മാമ്മച്ചിക്ക് ചെക്കന്റെ പേരു പറയാൻ കിട്ടാത്തതിലാണ് സങ്കടം….

“അമ്മാമ്മച്ചി ജോക്കുട്ടാന്ന് വിളിച്ചോ… അവർ വീട്ടിൽ അങ്ങനെയാ വിളിക്കുന്നെ….”

“അത് നല്ല പേരാ… ഈ വയസ്സിടെ വായിൽ കിട്ടും….”

“ആർക്കാ വയസ്സായേ… അമ്മാമ്മച്ചിക്കോ… ഒന്ന് ഉടുത്തോരുങ്ങി നിന്നാൽ ഇപ്പോളും സുന്ദരിയാ….”

ഞാൻ അമ്മമ്മച്ചിക്ക് ഇട്ടൊന്നു താങ്ങി… സ്പോട്ടിൽ തിരിച്ചും പണി കിട്ടി… അത് പതിവാ….

അമ്മച്ചിയെ തറവാട്ടിൽ ആക്കി വൈകിട്ട് ഞാൻ തളിപ്പറമ്പിലേക്ക് തിരിച്ചു….അടുത്ത ആഴ്ച എന്തായാലും വീണ്ടും വരണം… വെറുതെ എന്തിനാ അമ്മച്ചിയെ യാത്ര ചെയ്യിപ്പിക്കുന്നെ…. വീട്ടിൽ ഒറ്റയ്ക്ക് നിർത്തുന്നതിലും നല്ലതു തറവാട്ടിൽ നില്കുന്നതാ….