ഹൃദയരാഗം 26 [Achu Siva] 1047

” എന്താ വാസുകി…. എന്തൊക്കെയോ ചോദിക്കാനും, അറിയാനുമുണ്ടെന്ന് ഇവള് പറഞ്ഞു “….

കൈ ടേബിളിലെക്ക് വെച്ചിട്ട് അഞ്ജുവിന് നേരെ കണ്ണ് കാണിച്ചോണ്ട് അവന്‍ അവളോട് ചോദിച്ചു….

അതോടെ ഗീതുവില്‍ നിന്ന് ശ്രദ്ധ മാറി വാസുകിയും, അഞ്ജനയും അരുണിന് നേരെ നോക്കി….

” അത്…. അരുണേട്ടാ…. ഞാന്‍…. “….

വാസുകിക്ക് എവിടെ തുടങ്ങണം, എന്ത് ചോദിക്കണം എന്നൊരു രൂപം കിട്ടുന്നില്ലായിരുന്നു….

ഈ ചോദിക്കുന്നതിനും, അന്വേഷിക്കുന്നതിനും, വിനയേട്ടൻ അറിയരുതെന്ന് പറയുന്നതിനുമൊക്കെ എന്ത്‌ കാരണം പറയും എന്ന് അവള്‍ക്ക് അറിയില്ലായിരുന്നു….

” വാസുകി…. വിഷമിക്കേണ്ട…. അഞ്ജു എന്നോട് എല്ലാം പറഞ്ഞു…. എനിക്ക് മനസ്സിലാകും “….

അരുണ്‍ പറയുന്നത് കേട്ട് അവള്‍ അല്‍പ്പം വിഷമത്തോടെ തല താഴ്ത്തി….

” വീട്ടുകാരുടെ അപ്രതീക്ഷിതമായ മരണവും, മറ്റു പ്രശ്‌നങ്ങളും ഒക്കെയായി അതിന്റെ ഇടയില്‍ ഒട്ടും മാനസികമായ തയ്യാറെടുപ്പ് പോലും ഇല്ലാതെ നടന്ന കല്യാണം ആയതിന്റെയും, പിന്നെ ആ പ്രായവ്യത്യാസവും ഒക്കെയാവാം…. “…..

അരുണ്‍ അവളെ നോക്കി പറഞ്ഞു….

കാര്യം അഞ്ജുവിനും, ഗീതുവിനും എല്ലാം അറിയാമെങ്കിലും, അരുണ്‍ അഞ്ജനയുടെ ഏട്ടന്‍ ആണെങ്കിലും, തന്റെ പ്രശ്‌നങ്ങള്‍ അങ്ങനെ തുറന്ന് അവതരിപ്പിക്കപ്പെടുന്നതിൽ മാനസികമായി അല്‍പ്പം ബുദ്ധിമുട്ട് വാസുകിക്ക് ഉണ്ടായി….

എന്നാല്‍ മറ്റ് വഴികള്‍ ഇല്ലല്ലോ കാര്യങ്ങൾ അറിയാന്‍ എന്നോര്‍ത്തപ്പോ അത് സഹിക്കുക അല്ലാതെ വേറെ വഴിയില്ല എന്ന് തോന്നി…. അവന്‍ പറയുന്നത് എല്ലാം അവള്‍ തല കുനിച്ച് കേട്ടുകൊണ്ടിരുന്നു….

” അതാണ് വിനയ് സാറിനോട് എല്ലാ കാര്യങ്ങളും നേരിട്ട് ചോദിച്ചറിയാനുള്ള ഒരു മടിയും, പേടിയും ഒക്കെ അല്ലേ? “…..

അരുണ്‍ വീണ്ടും തുടര്‍ന്നു….

” പക്ഷേ, വാസുകി ഈ ചെയ്യുന്നത് വളരെ നല്ല കാര്യമാണ്…. അപ്രതീക്ഷിതമായി ഒരു കുടുംബജീവിതത്തിലേക്ക് ഇത്ര ചെറിയ പ്രായത്തില്‍ കടക്കേണ്ടി വന്നെങ്കിലും, ഭര്‍ത്താവിനെ കൂടുതല്‍ ഉള്‍ക്കൊള്ളാനും, സ്നേഹിക്കാനുമായി, അയാളുടെ കാര്യങ്ങള്‍ ഒക്കെ സ്വയം അറിയുവാനും, മനസ്സിലാക്കാനും ശ്രമിക്കുന്നതൊക്കെ, വാസുകിയുടെ പ്രായത്തേക്കാൾ കൂടുതല്‍ ഉള്ള മെച്ച്യൂരിറ്റിയെയാണ് കാണിക്കുന്നത്…. എല്ലാവരും അങ്ങനെ ആയിരുന്നെങ്കില്‍ പല പ്രശ്‌നങ്ങളും ഉണ്ടാവില്ലായിരുന്നു നമ്മുടെ ഒക്കെ ജീവിതത്തില്‍…. ഐ റിയലി അപ്രീഷിയേറ്റ് ദാറ്റ്….!! “….