ഹൃദയരാഗം 26 [Achu Siva] 1045

ദേവിക പിന്നെ ഒന്നും മിണ്ടാതെ അയാളെ അനുഗമിച്ചു…. പോകുന്നതിന് മുന്നേ വാസുകിയേ നോക്കി കണ്ണ് കൊണ്ട് പോകുവാണെന്ന് ആംഗ്യം കാണിച്ചു…. വാസുകിയും മറുപടിയായി തലയാട്ടി….

അവർ കാറിൽ കയറി പോകുന്നതും നോക്കി വാസുകി പുറത്തേക്കുള്ള പടവുകൾ ഇറങ്ങി….

ബസ് കയറി പോകാൻ നിന്ന എന്നെ കൂട്ടി കൊണ്ടു വന്നു ഇവിടെ വായി നോക്കി ഇരുത്തീട്ട് അവളെയും കൂട്ടി പോയിരിക്കുന്നു…. എന്റെ കാര്യത്തിൽ ആണെങ്കിൽ ഇത്രയ്ക്കും വേദനയും വെപ്രാളവും കാണിക്കില്ലല്ലോ…. ഛെ….

വേണമെങ്കില്‍ അവളെ ഇവിടെ നിന്ന് ആരെയെങ്കിലും കൂട്ടി വിടാമല്ലോ…. ചെയർമാൻ തന്നെ കൊണ്ട് പോകണമെന്നുണ്ടോ…. എന്നിട്ട് എന്നെ കൂട്ടി വിടാൻ നോക്കുന്നു….

വാസുകിക്ക് സങ്കടവും, ദേഷ്യവും ഒക്കെ വന്നു…. ഓര്‍ക്കുന്തോറും ഉള്ളില്‍ വിഷമം നിറയുന്നതായി അവള്‍ക്ക് തോന്നി…. രാജിയും, അര്‍ച്ചനയും ഒക്കെ നേരത്തെ പറഞ്ഞ കാര്യങ്ങള്‍ അവളുടെ മനസ്സിലേക്ക് വന്നു….

നിറഞ്ഞ് വന്ന കണ്ണുകൾ ആരും കാണാതിരിക്കാൻ തുടച്ച് അവള്‍ ഓട്ടോ പിടിക്കാനായി ഹോസ്പിറ്റലിന് പുറത്തേക്ക് നടന്നു….

അവള്‍ വീട്ടില്‍ എത്തിയപ്പോഴേക്കും വിനയ് ശാരദാമ്മയോട് കാര്യങ്ങള്‍ വിളിച്ചു പറഞ്ഞിരുന്നു…. അല്‍പ്പനേരം ശാരദാമ്മയോട് വിശേഷങ്ങള്‍ സംസാരിച്ച ശേഷം അവള്‍ കുളിക്കാനായി മുകളിലേക്ക് പോയി….

രാത്രി ഭക്ഷണം കഴിഞ്ഞ് അവര്‍ കിടന്നപ്പോഴും വിനയ് എത്തിയിട്ടുണ്ടായിരുന്നില്ല…. ഇടയ്ക്ക് അവള്‍ വിളിച്ചെങ്കിലും കിട്ടുന്നുണ്ടായിരുന്നില്ല….

======== ======== ======== ======== ========

പിറ്റേദിവസം അവര്‍ക്ക് ക്ലാസ്സ് ഇല്ലായിരുന്നു…. അതിന്റെ അടുത്ത ദിവസം എക്സാം കഴിഞ്ഞ് കോളേജിലെ ഗ്രൗണ്ടിന്റെ സൈഡിലുള്ള സ്റ്റെപ്പിൽ അഞ്ജുവിനും, ഗീതുവിനും ഒപ്പം ഇരിക്കുകയായിരുന്നു വാസുകി….

അധികം ആളുകള്‍ ഒന്നും ഗ്രൗണ്ടിലോ, സമീപത്തോ ഇല്ലായിരുന്നു…. വാസുകി ഇരുന്ന സ്റ്റെപ്പിനു തൊട്ടു താഴെ ഉള്ള സ്റ്റെപ്പിൽ അവളുടെ കാലിനോട് ചേര്‍ന്നാണ് അഞ്ജുവും, ഗീതുവും ഇരുന്നത്….