ഹൃദയരാഗം 26 [Achu Siva] 1045

കഴിഞ്ഞദിവസം കോഫീ ഷോപ്പിൽ നിന്ന് ഇറങ്ങിയിട്ട് അവർ അരുണിന്റെ കൂടെ കാറിൽ കയറി പോയ ശേഷം വിനയ് വന്നതും, ഒപ്പം ദേവിക ഉണ്ടായിരുന്നതും, പിന്നീട് മീറ്റിംഗ് കഴിഞ്ഞു വന്ന വിനയ് അരുണിനെ കണ്ട കാര്യം തിരക്കിയതുമൊക്കെ പറയുകയായിരുന്നു വാസുകി അവരോട്….

ദേവിക കാറിൽ വിനയ്ടെ കൂടെ വന്നതും, വിനയ് കൊടുത്ത മൂക്കുത്തി അവൾ ഇട്ടിരുന്നതും, ഹോസ്പിറ്റലിലെ നേഴ്സുമാർ പറഞ്ഞതും, അവസാനം ദേവികയുടെ അമ്മയ്ക്ക് വയ്യ എന്നറിഞ്ഞ് അവളെ ഹോസ്പിറ്റലിൽ ഒറ്റയ്ക്കാക്കി അവർ പോയതും ഒക്കെ പറഞ്ഞപ്പോള്‍ അവളുടെ മുഖത്തെ മ്ലാനതയും, ഉള്ളില്‍ നിറയുന്ന സങ്കടവും ഒക്കെ അവർ ശ്രദ്ധിച്ചു….

ഗീതുവിന്റെ കൈയില്‍ വലിയൊരു ലേയ്സ് പാക്കറ്റ് ഉണ്ടായിരുന്നു…. സംസാരത്തിന് ഇടയിലും സാമാന്യം നല്ല രീതിയില്‍ അവള്‍ തട്ടുന്നുണ്ടായിരുന്നു…. ഇടയ്ക്കിടെ വാസുകിയും, അഞ്ജുവും അതിൽ നിന്ന് എടുത്ത് കഴിക്കുന്നുണ്ടായിരുന്നു….

” അല്ലെടീ മോളേ…. വിനയേട്ടൻ ഞങ്ങൾ അരുണേട്ടന്റെ ഒപ്പം പോകുന്നതും, നമ്മൾ സംസാരിക്കുന്നതും ഒക്കെ കണ്ടു എങ്കില്‍ എന്താ നിന്റെ അടുത്ത് ആദ്യമേ തന്നെ ചോദിക്കാതിരുന്നത് ? “….

അഞ്ജു അല്‍പ്പം സംശയത്തോടെ വാസുവിനോട് ചോദിച്ചു….

” അറിയില്ലെടീ…. ചിലപ്പോള്‍ ദേവിക അപ്പോൾ കാറിൽ ഉണ്ടായിരുന്നതോണ്ടാവും “….

അതും പറഞ്ഞ് വാസുകി കൈ മലര്‍ത്തി….

” അജ്ജാ…. ഇതി ബിദയേത്തത് ബജ്ജ തംചചം കാതുമോ ? “….

ലേയ്സ് വായില്‍ നിറയെ കുത്തി കേറ്റിയിട്ട്, അടുത്തത് ഒരെണ്ണം പകുതി കടിച്ചോണ്ട് ഗീതു ചോദിച്ചു….

” എന്തോന്ന് ??? “….

ഇവള്‍ എന്ത് തേങ്ങയാണ് പറയുന്നത് എന്ന മട്ടില്‍ വാസുവും അഞ്ജുവും മുഖം ചുളിച്ചോണ്ട് ഒരുമിച്ച് ചോദിച്ചു….

” ആദ്യം ആ വായില്‍ ഉള്ളത് ഇറക്കെടീ പോത്തേ…. എന്നിട്ട് അടുത്തത് കേറ്റ് “….

അഞ്ജു ദേഷ്യത്തോടെ ഗീതുവിനോട് പറഞ്ഞു….

അത് കേട്ട് ഒന്ന് ഇളിച്ചു കാണിച്ചിട്ട് ഗീതു വേഗം വായില്‍ കിടന്ന ലേയ്സ് ചവച്ചിറക്കാൻ തുടങ്ങി….

” ഹോ…. ഇങ്ങനെ ഒരു സാധനം…. അവളുടെ തീറ്റ കണ്ടാൽ തോന്നും ആരാണ്ട് തട്ടിപ്പറിച്ചോണ്ട് പോകുമെന്ന് “….

അഞ്ജു വീണ്ടും പറഞ്ഞിട്ട് ഗീതുവിന്റെ കവിളിൽ വേദനിപ്പിക്കാതെ ഒരു കുത്ത് കൊടുത്തു….

” ഓ…. പിന്നേ…. ഈ പറയുന്ന ടീംസ് ഒക്കെ പഷ്ട് ആണല്ലോ…. ഒഞ്ഞ് പോയേ നീ “….

ഗീതു പുച്ഛത്തോടെ അത് പറഞ്ഞിട്ട് കൈയുടെ പുറകുവശം കൊണ്ട് വായുടെ അവിടെ തുടച്ച്, പതിയെ ലേയ്സിന്റെ പൊടി ഒക്കെ തട്ടി കളഞ്ഞു….