ഹൃദയരാഗം 26 [Achu Siva] 1047

” എന്നാൽ വാ…. അരുണേട്ടൻ കാത്ത് നിന്നു മുഷിഞ്ഞു കാണും “….

അവള്‍ അവരുടെ രണ്ടുപേരുടേയും കൈയില്‍ പിടിച്ചു കൊണ്ട് അരുണിന് അടുത്തേക്ക് നടന്നു….

എന്തായിരിക്കും അവള്‍ക്ക് പറയാനുള്ളതെന്ന് കരുതി അവരും അവളുടെ ഒപ്പം അരുണിന്റെ അടുത്തേക്ക് നടന്നു….

======== ======== ======== ======== ========

കോഫി ഷോപ്പിന് മുന്നിലായി നിര്‍ത്തിയിട്ടിരുന്ന കാറിൽ ചാരി ഫോണിൽ എന്തോ നോക്കിക്കൊണ്ടിരുന്ന അരുണിനെ അവർ കണ്ടു….

തല ഉയര്‍ത്തി നോക്കിയപ്പോള്‍ അവരെ കണ്ട് അവന്‍ ഒരു ചിരിയോടെ ഫോൺ പോക്കറ്റിലേക്കിട്ടിട്ട് അവരെ കൈ പൊക്കി കാണിച്ചു….

അവർ മൂന്നു പേരും തിരിച്ചും അവനെ കൈ കാണിച്ച് ചിരിച്ചു…. എന്നാൽ മൂന്നു പേരുടെയും ചിരിക്ക് അത്ര തെളിച്ചമില്ലായിരുന്നു….

” ആഹാ…. ത്രിമൂര്‍ത്തികള്‍ മൂന്നും ഉണ്ടല്ലോ…. എന്താണ്‌ വൈകിയത് ?…. ഞാന്‍ കട്ട പോസ്റ്റ് ആയിരുന്നു “…..

അരുൺ അവരെ കളിയാക്കിക്കൊണ്ട് ചോദിച്ചു…. ഒപ്പം തന്നെ വാസുകിയെയും, ഗീതുവിനെയും പ്രത്യേകം നോക്കി ചിരിച്ചുകൊണ്ട് ഹായ് പറഞ്ഞു…. അവർ തിരിച്ചും….

ഗീതു ആകെ ഒരു വെപ്രാളത്തോടെ വാസുകിയുടെ കൈയില്‍ മുറുക്കി പിടിക്കുന്നുണ്ടായിരുന്നു…. അവളുടെ പെട്ടന്നുള്ള ഭാവമാറ്റമൊക്കെ കണ്ട് വാസു ഒന്ന് അമ്പരന്നു…. എന്നാല്‍ അത് ചോദിക്കാന്‍ പറ്റാത്ത സാഹചര്യമായതിനാൽ അവളതപ്പോ അത്ര കാര്യമാക്കിയില്ല….

” എന്റെ ഏട്ടാ…. ബസ്സൊക്കെ കിട്ടി ഇങ്ങെത്തണ്ടേ…. എക്സാം കഴിഞ്ഞു കോളേജിൽ നിന്ന്‌ ഒന്ന് ഇറങ്ങിയപ്പോ തന്നെ ഒരു സമയമായി “….

അഞ്ജനയാണ് അവനോട് മറുപടി പറഞ്ഞത്….

” ഉവ്വ…. എനിക്കറിഞ്ഞൂടേ നിങ്ങളെ…. വാ…. വാ…. “….

അവൻ ചിരിച്ചുകൊണ്ട് കോഫീ ഷോപ്പിലേക്ക് കയറാന്‍ ആംഗ്യം കാണിച്ചിട്ട് അവരുടെ ഒപ്പം നടന്നു….