ഹൃദയരാഗം 26 [Achu Siva] 1047

അത് കേട്ട് വാസുവും, അഞ്ജുവും പരസ്പരം നോക്കി ചമ്മിയ ഒരു ചിരി ചിരിച്ചു…. വല്ല ആവശ്യവും ഉണ്ടായിരുന്നോ എന്ന മട്ടില്‍ വാസു അഞ്ജുവിനെ കൈ കൊണ്ട് ആംഗ്യം കാണിച്ചു….

” നീ എന്താ നേരത്തെ പറഞ്ഞത് ? “….

ഗീതു കാണിക്കുന്നത് ഒക്കെ കണ്ട് ചിരിച്ചോണ്ട് വാസു അവളോടായി ചോദിച്ചു….

” ആ…. അതോ…. അല്ലാ…. ഇനി വിനയേട്ടന് വല്ല സംശയവും ആയി കാണുമോ എന്ന്…. അരുണേട്ടൻ വന്നതൊക്കെ “….

ഗീതു അത് പറഞ്ഞപ്പോള്‍ വാസുകി ചോദ്യ ഭാവത്തില്‍ അഞ്ജുവിന് നേരെ നോക്കി….

” ഇല്ലെടീ…. നീ ഫോണിലൂടെ സൂചിപ്പിച്ചപ്പോൾ തന്നെ ഞാന്‍ അരുണേട്ടനോട് നൈസായി ചോദിച്ചായിരുന്നു…. എന്നെ കൂട്ടാന്‍ എന്ന് പറഞ്ഞു തന്നെയാണ് ഏട്ടൻ ഓഫീസിൽ നിന്ന് ഇറങ്ങിയത് “….

അഞ്ജു അവളെ സമാധാനിപ്പിച്ചു കൊണ്ട്‌ പറഞ്ഞു….

” നീ അപ്പൊ വിനയേട്ടൻ കണ്ടതും, എന്നോട് ചോദിച്ചതുമൊക്കെ അരുണേട്ടനോട് പറഞ്ഞോ ? “….

വാസുകി ആശങ്കയോടെ ചോദിച്ചു….

” ഹേയ്…. ഇല്ല പെണ്ണേ…. വെറുതേ ഏട്ടനെ ടെന്‍ഷന്‍ ആക്കണ്ട എന്ന് കരുതി…. ഞാന്‍ പറഞ്ഞില്ലേ, ഞാന്‍ നൈസായി ചോദിച്ചറിഞ്ഞതാ…. നീ ചുമ്മാ ഓരോന്നും ചിന്തിച്ചു കൂട്ടണ്ട…. വിനയേട്ടൻ കണ്ടത് കൊണ്ട് ജസ്റ്റ് ചോദിച്ചു എന്ന് മാത്രമാവും…. അരുണേട്ടൻ പറഞ്ഞത് സത്യവും ആണല്ലോ…. അപ്പോ പിന്നെ എന്ത് പ്രശ്നം “….

അഞ്ജു പറഞ്ഞു നിര്‍ത്തി….

അതുകേട്ട് അല്‍പ്പം ആശ്വാസത്തോടെ വാസുകി ഒന്ന് പുറകിലേക്ക് ചാഞ്ഞിരുന്നു….

” അല്ല…. ആ നേഴ്സുമാര് പറഞ്ഞത് ശരിയാണോടീ…. ദേവിക പ്രശ്നമാണോ ? “….

ലേയ്സ് പാക്കറ്റിൽ നിന്ന് വീണ്ടും ഒരെണ്ണം എടുത്ത് തിന്നോണ്ട് ഗീതു ചോദിച്ചു….

” അറിയില്ല…. അവരുടെ സ്വഭാവം വെച്ച് പരദൂഷണ പരമ്പരയുടെ പുതിയ എപ്പിസോഡ് ആരംഭിച്ചതാവും, എന്നാലും അതൊക്കെ കേട്ടപ്പോള്‍ എന്തൊക്കെയോ അതില്‍ ഇല്ലേ എന്നൊരു തോന്നല്‍…. ചിലതൊക്കെ ഞാനും കണ്ടതാണല്ലോ “….

വാസുകി അതെല്ലാം വീണ്ടും ഓര്‍ത്ത് വിഷമത്തോടെ ഇരുന്നു….