ഹൃദയരാഗം 26 [Achu Siva] 1047

” ആ പറഞ്ഞത് ശരിയാ ഞാനും പലപ്പോഴും ശ്രദ്ധിച്ചിട്ടുണ്ട്…. ഏതായാലും ചേച്ചിയുടെ കാര്യം കൊള്ളാം …. ഏതായാലും നമിക്കുന്നു ഞാൻ…. ശരി, നടക്ക്…. നടക്ക് “….

അര്‍ച്ചന രാജിയുടെ കൈയില്‍ പിടിച്ച് വലിച്ചോണ്ടു നടന്ന് പോയി….

======== ======== ======== ======== ========

രാജിയും അർച്ചനയും പറഞ്ഞ കാര്യങ്ങൾ മനസ്സിലിട്ട് ഹരിച്ചും, ഗുണിച്ചുമൊക്കെ നോക്കി വിനയ്ടെ ക്യാബിനിൽ ഇരിക്കുകയായിരുന്നു വാസുകി….

ഇതിപ്പോ ഉള്ള മനസമാധാനം കൂടി പോയല്ലോ ഈശ്വരാ…. ആ ദേവിക ഇത്രക്ക് മോശമായിരുന്നോ…. എനിക്കങ്ങോട്ട് വിശ്വസിക്കാൻ പറ്റുന്നില്ല….

അവള്‍ മനസ്സിലോർത്തു….

ഈ പറഞ്ഞ പാർട്ടികളുടെ ലക്ഷണം കണ്ടിട്ട് അത്ര വെടിപ്പാണെന്നു തോന്നുന്നില്ല…. പുകഴ്ത്തലും. പരദൂഷണവും മാത്രമേ അറിയൂ എന്നാ തോന്നണേ…. അത് കൊണ്ടു എല്ലാം അങ്ങ് തൊണ്ട തൊടാതെ വിഴുങ്ങാൻ കഴിയില്ല…. എങ്കിലും അവർ പറഞ്ഞതിലും കാര്യമില്ലാതില്ല….കുറെയൊക്കെ ഞാനും കൺമുന്നിൽ കണ്ടതല്ലേ….

അവർ പറഞ്ഞതെല്ലാം തള്ളണോ, കൊള്ളണോ എന്നറിയാതെ അവള്‍ ഇരുന്നു….

ഹോ ഓർത്തിട്ട് തലക്ക് ഭ്രാന്ത് പിടിക്കുന്നു …എന്താണ് സത്യം…. എന്തൊക്കെയാണ് ചുറ്റും നടക്കുന്നത്…. ആരെയാണ് വിശ്വസിക്കേണ്ടത്…. എന്താണിനി ചെയ്യേണ്ടത്…. ജീവിതത്തിനു ആകെപ്പാടെ ഒരു അർത്ഥമില്ലാതാകുന്നത് പോലെ….

ഒരു നിരാശയോടെ അവൾ മുന്നിലുള്ള ടേബിളിലേക്ക് മുഖം ചായ്ച്ചു കിടന്നു….

കുറച്ചു സമയം കഴിഞ്ഞപ്പോൾ ആരോ കൈയിൽ തട്ടി വിളിക്കുന്നത് പോലെ തോന്നിയപ്പോൾ വാസുകി ഞെട്ടി കണ്ണുകൾ തുറന്നു….

മുന്നിൽ നിൽക്കുന്ന വിനയ്നെ കണ്ടപ്പോൾ അവൾ ചെയറിൽ നിന്നും ചാടി എഴുന്നേറ്റു….

” അത്…. സോറി…. കാത്തിരുന്നു ബോറടിച്ചപ്പോ അറിയാതെ ഒന്നു മയങ്ങി പോയി “….

വാസുകി ചെറിയ ചമ്മലോടെ പറഞ്ഞു …