ഹൃദയരാഗം 26 [Achu Siva] 1047

” കാറിൽ നിന്നു ഇറങ്ങിയപ്പോ തന്നെ ഞങ്ങൾ കണ്ടായിരുന്നു…. ദേവിക ഡോക്ടറും ഉണ്ടാരുന്നല്ലോ കൂടെ…. മേഡത്തിന് നേരത്തെ പരിചയമുണ്ടോ ഡോക്ടറെ ? “….

രാജി തെല്ല് ആശങ്കയോടെ ചോദിച്ചു….

ആഹാ…. അങ്ങനെ നല്ല ചോദ്യങ്ങൾ ചോദിക്ക് മക്കളേ…. എങ്ങനെ അതൊന്നു അവതരിപ്പിക്കുമെന്ന് ഓർത്തു നിൽക്കുമ്പോഴാ…. ഇനി ഇതിലങ്ങു പിടിച്ചു കയറാം…. അപ്പൊ അവള് വിനയേട്ടന്റെ റിലേറ്റീവ് ആണെന്ന് ഇവറ്റകൾക്ക് അറിയില്ലേ ?…. അങ്ങനെ വരാൻ വഴിയില്ലല്ലോ…. ആ, അത് എന്ത് കൊണ്ടും നന്നായി….

ഓ…. അല്ലേലും അവള്‍ അത് ഇവിടെ കാണിക്കാറില്ല എന്നാണല്ലോ വിനയേട്ടൻ എപ്പോഴോ പറഞ്ഞിട്ടുള്ളത്…. സർ എന്ന് വിളിക്കുന്നതിന് വഴക്ക് പറയുന്നത് ഞാനും കണ്ടിട്ടുള്ളതാണല്ലോ….

വീണ്ടും വാസുകി ആലോചിച്ചു, പിന്നെ അവർക്ക് നേരെ നോക്കി….

” ഹേയ്…. അങ്ങനെ നേരത്തെ പരിചയമൊന്നുമില്ല…. ഇവിടെ വരുമ്പോ കണ്ടിട്ടുള്ളതാ…. പിന്നെ വിനയേട്ടൻ പറഞ്ഞ് അറിയാം…. ഡോക്ടറുടെ വണ്ടിക്ക് എന്തോ ഒരു ട്രബിൾ…. വഴിയിൽ വച്ചു കണ്ടപ്പോ കൂട്ടിയതാ…. അല്ല നിങ്ങളെന്താ ഈ വേഷത്തിൽ ?…. ഇന്ന് ഡ്യൂട്ടി ഇല്ലേ ?…. അതോ കഴിഞ്ഞിട്ട് പോകാൻ നിൽക്കുവാണോ ? “….

നേഴ്സ്മാരുടെ വേഷത്തിൽ അല്ലാതെ നിൽക്കുന്ന അവരെ രണ്ടു പേരെയും ഒന്നു സംശയത്തോടെ അടിമുടി നോക്കിക്കൊണ്ടു വാസുകി തിരക്കി….

” ഒന്നും പറയണ്ട മേഡം….ഞങ്ങൾ ആകെ പെട്ടിരിക്കുവാ…. ഇപ്പോ പറഞ്ഞ ഈ ദേവിക ഡോക്ടർ കാരണമാ ഞങ്ങൾ ഈ ഗതിയിൽ ആയത്…. ചെയ്യാത്ത തെറ്റിന് ഞങ്ങൾക്ക് ശിക്ഷ അനുഭവിക്കേണ്ടി വരുന്നത് “….

രാജി ഇല്ലാത്ത സങ്കടവും, നിഷ്കളങ്കതയും മുഖത്ത് കുത്തി കേറ്റിക്കൊണ്ട് പറഞ്ഞു….

” എന്താ…. എന്ത് പറ്റി ?…. എന്താണ് കാര്യം ? ”

വാസുകി അവരോട് തിരക്കി….

” ഒരു പേഷ്യന്റിനെ വേണ്ട വിധത്തിൽ കെയർ ചെയ്തില്ല എന്ന് പറഞ്ഞു ഞങ്ങൾക്ക് രണ്ടിനും പണിഷ്മെന്റ് മെമ്മോ തന്നു…. ഞങ്ങളുടെ ഭാഗത്തെ ന്യായം ഒന്നു കേൾക്കാൻ പോലും തയ്യാർ ആകാതെ അന്ന് ഡ്യൂട്ടിൽ ഉണ്ടാരുന്ന ദേവിക ഡോക്ടർ ആണു അത് റിപ്പോർട്ട്‌ ചെയ്തത്…. ഞങ്ങൾ ഒരു തെറ്റും ചെയ്തിട്ടില്ല…. ഇന്ന് അതിന്റെ എക്സ്പ്ലെനേഷൻ കൊടുക്കാൻ വിളിപ്പിച്ചിരുന്നു…. അതിനാ ഇപ്പൊ വന്നത് “….

രാജി ദൈന്യത കലര്‍ത്തി പറഞ്ഞു….

സർവ്വ സമയവും മറ്റുള്ളവരുടെ കാര്യം തിരക്കി നടപ്പല്ലേ…. പിന്നെങ്ങനെ രോഗിയെ ശ്രദ്ധിക്കും….

വാസുകി മനസ്സിൽ പുച്ഛിച്ചു….