ഹൃദയരാഗം 26 [Achu Siva] 1047

” ആഹാ…. അങ്ങനെ ആയിരുന്നോ…. അതിനിപ്പോ എന്താ ?…. ഇനി വിചാരിച്ചാലും മതിയല്ലോ “….

ദേവിക വീണ്ടും അവളെ നോക്കി പറഞ്ഞു …

പെട്ടന്നാണ് വാസുകിയുടെ നോട്ടം ദേവികയുടെ മൂക്കിലെ വെള്ളക്കൽ മൂക്കുത്തിയിലേക്ക് നീണ്ടത്…. ദേവിക മുൻപ് ഉപയോഗിച്ചിരുന്ന മൂക്കുത്തി അല്ല ഇപ്പോൾ ഉള്ളത് എന്നവൾ തിരിച്ചറിഞ്ഞു….

വേദനയോടെ ആണെങ്കിലും മറക്കാൻ ശ്രമിച്ചു കൊണ്ടിരുന്ന ചില ചിത്രങ്ങൾ അവൾക്കു മുന്നിൽ പിന്നെയും തെളിഞ്ഞു വന്നു….

പിന്നെയും, പിന്നെയും അവൾ ആ മൂക്കുത്തിയിലേക്ക് നോക്കി…. ആ വജ്രക്കല്ലിന്റെ തിളക്കം വാസുകിയുടെ കണ്ണുകളിൽ നനവ് പടർത്താൻ തുടങ്ങിയിരുന്നു….

ദേവിക പിന്നെയും അവളോട്‌ ഓരോ വിശേഷങ്ങൾ ചോദിച്ചു കൊണ്ടേയിരുന്നു…. അതിനൊക്കെ വെറും ചുരുങ്ങിയ വാക്കുകളിൽ എന്തൊക്കെയോ മറുപടി കൊടുത്തു വാസുകി പുറത്തേക്ക് നോക്കി ഇരുന്നു….

ദേവിക വിനയ്നോട് കാര്യമായി എന്തൊക്കെയോ സംസാരിക്കുകയോ ചിരിക്കുകയോ ഒക്കെ ചെയ്യുന്നുണ്ട്…. പക്ഷേ അതൊന്നും ശ്രെദ്ധിക്കാനുള്ള ഒരു അവസ്ഥയിൽ അല്ലായിരുന്നു വാസുകി….

ഒരു തളര്‍ച്ചയോടെ അവള്‍ സീറ്റിലേക്ക് ചാരി ഇരുന്നു….

======== ======== ======== ======== ========

ഹോസ്പിറ്റലിൽ എത്തി കാറിൽ നിന്നിറങ്ങിയ അവർ മൂന്ന് പേരും അതിനുള്ളിലേക്ക് നടന്നു….

പെട്ടന്ന് വാസുകിയുടെ മൊബൈൽ ഫോണ്‍ ശബ്ദിച്ചു…. അവൾ കോൾ എടുത്ത് നടത്തം അല്പം സാവധാനത്തിൽ ആക്കി….

അവള്‍ക്ക് ബസ്സ് കിട്ടിയോ എന്നറിയാൻ അഞ്ജന ആയിരുന്നു വിളിച്ചത്…. വിനയ് ടെ കൂടെ ആണെന്ന കാര്യം അറിയിച്ചപ്പോൾ അതെങ്ങനെ എന്ന് അവള്‍ ഞെട്ടലോടെ ചോദിച്ചു….

വിശദമായി പിന്നെ പറയാമെന്ന് പറഞ്ഞ് അവൾ വേഗത്തിൽ ഫോൺ വെച്ചു…. വിനയ് യും ദേവികയും അപ്പോഴേക്കും കുറച്ചു ദൂരം പിന്നിട്ടിരുന്നു….

അവരുടെ ഒരുമിച്ചുള്ള നടപ്പു കണ്ടു അറിയാതെ അവൾ അവിടെ ഒന്നു നിന്നു പോയി….

തന്റെ ഉള്ളിലെ വേദനയുടെ തോത് അനുനിമിഷം കൂടി വരുന്നത് അവൾ തിരിച്ചറിഞ്ഞു…. അവർക്കൊപ്പം എത്താൻ വാസുകി അല്പം വേഗത്തിൽ മുന്നോട്ട് നടന്നു….