ഹൃദയരാഗം 26 [Achu Siva] 1047

ആകെപ്പാടെ ഒരു വശപ്പിശക് ഉണ്ടല്ലോ…. വായിൽ നാക്കിടാത്ത ഇവൾക്കിതെന്ത്‌ പറ്റി ?…. ഇത്ര പെട്ടന്ന് ഡീസന്റ് ആയോ…. ഇത് വരെ കാണാത്ത ഒരു നാണവും വെപ്രാളവും…. എന്തോ ഒന്നു ചീഞ്ഞു നാറുന്നുണ്ടല്ലോ മോളേ….

ഗീതുവിന്റെ കാട്ടി കൂട്ടലുകൾ തുടക്കം മുതലേ ശ്രദ്ധിച്ചിരുന്ന വാസുകി സംശയത്തോടെ അവളെ നോക്കികൊണ്ടു മനസ്സിൽ ചിന്തിച്ചു….

ഹാ…. എന്റെ ഇൻവെസ്റ്റിഗേഷനിൽ അപ്പൊ ഒരെണ്ണം കൂടെ ഉൾപെടുത്തേണ്ടി വരും….

അവള്‍ അതോർത്ത് മനസ്സില്‍ ചിരിച്ചു….

” ശരി…. ശരി…. ഇനിയും നിന്നു സമയം കളയണ്ട നിങ്ങള് പൊയ്ക്കോ” ….

വാസുകി അഞ്ജുവിനെ നോക്കി പറഞ്ഞു….

” നിനക്ക് ബസ്സ് കിട്ടിയിട്ടേ ഞങ്ങൾ പോകുന്നുള്ളൂ “….

അഞ്ജു വാശി പിടിച്ചു നിന്നു….

” എന്റെ പൊന്നു മോളേ, എത്രയും വേഗം ഈ സ്വപ്ന ജീവിയേം വിളിച്ചോണ്ട് ഒന്നു പോകാൻ നോക്ക്…. അല്ലെങ്കില് എന്റെ പിന്നാലെ വലിഞ്ഞു കേറി വരും “….

വാസുകി ഗീതുവിനെ നോക്കി തൊഴുതു കൊണ്ടു പറഞ്ഞു….

എല്ലാവരും കൂടെ തനിക്ക് ഇട്ട് കൊട്ടുന്നത് സഹിച്ചു ഒരു പാവത്തിനെ പോലെ ഗീതു അതെല്ലാം കേട്ടു നിന്നു….

വാസുകി അവളെ നിർബന്ധിച്ചു കാറിൽ കയറ്റി…. അവർ മൂന്ന് പേരും അവളോട്‌ യാത്ര പറഞ്ഞു പോയി…..

======== ======== ======== ======== ========

എന്തൊരു ചൂട്…. എത്രയും പെട്ടന്ന് ഒന്നു വീട്ടിൽ ചെന്നാ മതിയാരുന്നു….

അവർ പോകുന്നത് നോക്കി, ആ ചിന്തയോടെ അവൾ റോഡ് ക്രോസ്സ് ചെയ്യാനായി നിന്നു….

പെട്ടന്ന് അവളുടെ അടുത്തായി ഒരു കാർ വന്നു നിന്നു….

ബസ്സ് വരുന്നുണ്ടോ എന്ന് നോക്കി നിൽക്കുകയായിരുന്നത്
കൊണ്ടു അവൾ ആദ്യമൊന്നു ചെറുതായി ഞെട്ടി പുറകിലേക്ക് മാറി….

ആ കാറ് കണ്ടതും അവളുടെ നെഞ്ചിലൂടെ ഒരു കൊള്ളിയാന്‍ പാഞ്ഞു…. അല്‍പ്പം ഭയം അവൾക്ക് തോന്നാതിരുന്നില്ല….