വൈഷ്ണവം 9(മാലാഖയുടെ കാമുകൻ) 1253

വിഷ്ണു ഒരു കുതിപ്പിന് മുകളിൽ എത്തി ചിരിയോടെ എന്തോ പറഞ്ഞുകൊണ്ട് അവളെ കോരി എടുക്കുന്ന കാഴ്ച കണ്ടപ്പോൾ വൈഷ്ണവിക്ക് കണ്ണിൽ ഇരുട്ട് കയറി.

ഭദ്രയും അത് കണ്ടപ്പോൾ ആകെ എന്തോപോലെ ആയി..

അവൻ ആ പെൺകുട്ടിയെ താഴേക്ക് കൊണ്ടുവന്നു കാറിൽ ഇരുത്തി അവളുടെ മുടി കൈ കൊണ്ട് ഒതുക്കി വച്ചു നെറ്റിയിൽ ഒരു ഉമ്മ കൊടുത്തു ഡോർ അടച്ചതും

അവൻ വന്ന് ഡ്രൈവിംഗ് സീറ്റിൽ കയറുന്നതും അവളോട്‌ എന്തോ പറഞ്ഞു ചിരിച്ച് ആ വണ്ടി അകന്ന് പോകുന്നതും വൈഷ്ണവി പകുതി അടഞ്ഞ കണ്ണുകൾ കൊണ്ടാണ് കണ്ടത്..

ആ കാർ അകന്ന് പോയപ്പോൾ പുറകിലേക്ക് മറിഞ്ഞ അവളെ ഭദ്ര ചേർത്ത് പിടിച്ചു..

പിടക്കുന്ന ഹൃദയത്തോടെ..

•••

വൈഷ്ണവി സീറ്റിൽ ചാരി ഇരുന്നു വാവയെ മുറുക്കെ പിടിച്ചു..

ഒരു സ്വപ്നത്തിൽ എന്നവണ്ണം അവൾ പാവ പോലെ ഇരുന്നു.

അവളുടെ ആ ഇരിപ്പ് കണ്ടിട്ട് ഭദ്രക്ക് സഹിക്കാൻ ആയില്ല.. അവളുടെ കണ്ണുകൾ നിറഞ്ഞു ഒഴുകി..

അത് വിഷ്ണുവാണ് എന്ന് ഭദ്ര പറഞ്ഞപ്പോൾ ഞാൻ അനേഷിച്ചു വരാം എന്ന് പറഞ്ഞ് റോഡ് ക്രോസ്സ് ചെയ്യാൻ പോയ ജോഷിനെ വേണ്ട പോകാം എന്ന് മാത്രം പറഞ്ഞ് വൈഷ്ണവി കാറിലേക്ക് കയറുകയായിരുന്നു..

അപ്പോൾ തുടങ്ങിയ ഇരിപ്പാണ് അവളുടെ..

അത് കണ്ടിട്ട് ആർക്കും സഹിക്കുന്നില്ലായിരുന്നു..

വണ്ടി മുൻപോട്ട് പൊയ്ക്കൊണ്ടിരുന്നു..

•••