രണ്ടാം ജന്മം 3 [അജി] 170

 

അവൻ കൈകൾ പിണച്ച് അടി തടുക്കാൻ പറ്റുന്ന പോസിഷനിൽ നിന്നു. എനിക്ക് ഇത് എന്താ സംഭവം എന്ന് മനസ്സിലായില്ല. ഞാൻ ഇത് എന്താന്ന് അറിയാൻ അനുവിനെ നോക്കി. അനു അത്‌ കണ്ട് ചിരിക്കാൻ തുടങ്ങി.

 

“അയ്യോ…. പേടിക്കേണ്ടാ.. ചേട്ടൻ ഒന്നും ചെയ്യില്ല… ഇപ്പോ പഴയ ആളെ അല്ലാ ആകെ മാറി…”

 

അവൻ അത്‌ മുഴുവൻ വിശ്വസിച്ചു എന്ന് തോന്നുന്നില്ല. എന്നിൽ നിന്നും കുറച്ച് അകന്ന് നിന്ന് സാധനങ്ങൾ ഇറക്കി വേഗം കാശും വാങ്ങി പോയി.

 

ഞാൻ അവൻ കൊണ്ട് വന്ന സാധനങ്ങൾ ഒതുക്കി വെക്കാൻ തുടങ്ങി. അനു അത്‌ എവിടെയെല്ലാം വെക്കേണ്ടത് എന്ന് കാട്ടി തന്നു.

 

“അനു അയാൾ എന്തിനാ…. എന്നെ കണ്ടപ്പോൾ പേടിച്ചേ…”

ഞാൻ എന്റെ സംശയം അനുവിനോട് ചോദിച്ചു.

 

“അതോ… ഒരിക്കൽ കിച്ചുവേട്ടൻ കുടിച്ച് വന്നിരിക്കുന്ന സമയത്ത് അവനെ എന്റെ ജാരൻ എന്ന് പറഞ്ഞ് തല്ലി ”

 

“കിരൺ ആള് പ്രശ്നക്കാരൻ ആയിരുന്നുല്ലേ…”

 

“ഉമ്മ്…”

 

“നിന്നെ അവൻ ഉപദ്രവിക്കുമായിരുന്നോ….”

 

“ഉമ്മ് ”

 

അവളിൽ വിഷമം നിറയുന്നത് ഞാൻ കണ്ടു. കിരണിൽ നിന്ന് അവൾക്ക് ഒരുപാട് യാതനകൾ അനുഭവിച്ചിട്ടുണ്ട് എന്ന് തോന്നുന്നു.

 

“അനു… സോറി….”

 

“എന്തിനാ സോറി പറഞ്ഞേ ….”

 

“അത്‌ ഞാൻ കിരണിന് വേണ്ടി പറഞ്ഞതാ…. ചിലപ്പോൾ ഇതിനൊക്കെ വേണ്ടിയാവും എന്നെ ഇവിടെ എത്തിച്ചത്….”

 

അവൾ ഒന്ന് ചിരിച്ചു. ആ ചിരിയുടെ അർത്ഥം എനിക്ക് പിടിക്കിട്ടിയില്ല. അകത്ത് നിന്ന് പൊന്നുവിന്റെ കരച്ചിൽ കേട്ടപ്പോൾ അവൾ അകത്തേക്ക് പോയി. കുറച്ച് കഴിഞ്ഞ് അവൾ കുഞ്ഞിനെയുമായി അവിടേക്ക് വന്നു.

 

“ഞാൻ പൊന്നുവിനെ ഒന്ന് എടുക്കട്ടെ…?”

 

പൊന്നു എന്നെ നോക്കി ചിരിക്കുന്നത് കണ്ടപ്പോൾ ഞാൻ അനുവിനോട് ചോദിച്ചു.അനു എനിക്ക് പൊന്നുവിനെ എടുത്ത് കൈയിലേക്ക് തന്നു. ഞാൻ പൊന്നുവിനെ എടുത്ത് കൊഞ്ചിക്കാൻ തുടങ്ങി.