മിഥുനമാസത്തിലെ കാറ്റ് (അപ്പൂസ്) 2030

പണ്ടവൾ പറഞ്ഞത് മനസ്സിൽ ഓർമ വന്നു… കാമുകനും കാമുകിയും ഒരുമിച്ചു നടയിൽ അടഞ്ഞുകിടക്കുന്ന കമ്പിയഴിയിൽ കെട്ടുന്ന മഞ്ഞച്ചരടിൽ കോർത്ത ആലില കല്യാണഭാഗ്യം നൽകും.. ഗന്ധർവ്വനു വേണ്ടിയെങ്കിൽ തനിച്ചു കെട്ടണമത്രേ…

എട്ടാമത്തെ വട്ടമാണ് അവർ ഒരുമിച്ച് വരുന്നത് തന്നെ… ഏഴുവട്ടവും അവൾ താലിചരട് കെട്ടിയത് അവനിപ്പോളും ഓർമയുണ്ട്….

“മടുത്തു….. ഇനിയും കെട്ടുന്നില്ല….. പ്രതീക്ഷ നശിച്ച പോലെ… ”

അവൾ പതിവില്ലാതെ ഖിന്ന ആയി കാണപ്പെട്ടു.. പടിഞ്ഞാറൻ ചക്രവാളത്തിലേക്ക് നീങ്ങുന്ന അസ്തമയ സൂര്യന്റെ വെയിൽ മുഖത്തടിച്ചപ്പോൾ മുഖത്തേക്ക് വീണു കിടക്കുന്ന മുടികൾക്കിടയിലൂടെ അവളുടെ കണ്ണുകൾ നിറഞ്ഞു കാണപ്പെട്ട പോലെ അവനു തോന്നി..

“പിന്നെന്തിനാ നീ താലിചരട് കൊണ്ടു വന്നേ???”

അവളുടെ കൈകൾ പിണച്ചു കളിക്കുന്ന മഞ്ഞച്ചരടിലെ ആലിലതാലി ചൂണ്ടി അവൻ ചോദിച്ചു…

“എന്നാ നീയും കൂടി വായോടാ..”

അവൾ എണിറ്റു അവനെ പിടിച്ചു വലിച്ചു. അവളുടെ നിർബന്ധത്തിനു വഴങ്ങി അവനും ആ പാറക്കെട്ടുകൾക്ക് ഇടയിലൂടെ മുകളിലേക്ക് വലിഞ്ഞു കയറി…

മുകളിലെത്തി അവൾ അരയാലിനു അടുത്തേക്ക് നടന്നു…
അവൻ ചുറ്റുമുള്ള എത്ര കണ്ടാലും മടുക്കാത്ത കാഴ്ചകൾ കൺ കുളിർക്കെ നോക്കി നിന്നു..

തേനാടും കുന്നു പള്ളിയുടെ കുരിശും ബീഡിയിൽ നിന്നെന്ന പോലെ മുകളിലേക്ക് പുക വിടുന്ന ഓട്ടു ഫാക്ടറിയും ചേർന്ന തേനാടും കുന്ന് ടൌൺ കിഴക്കു ഭാഗത്തു മനോഹര ദൃശ്യമെങ്കിൽ കടലോളം വിരിച്ച പച്ചപ്പ് പടിഞ്ഞാറ് ഭാഗം അതിമനോഹരമാക്കി….

മുത്തപ്പൻ പാറ.. അവളുടെ ഗ്രാമമായ തേനാടുംകുന്നിന്റെ അതിർത്തിയിലെ സഹ്യന്റെ വാലു പോലെ കാണുന്ന കുഞ്ഞു മലനിരക്കും തേനാടുംകുന്ന് എന്ന് തന്നെ ആണ് പേര്.