മിഥുനമാസത്തിലെ കാറ്റ് (അപ്പൂസ്) 2021

മൈലാഞ്ചി കളം വരച്ച കുപ്പിവള ഇട്ട കൈകൾ അവനു നേരെ നീണ്ടപ്പോൾ അത് അവഗണിച്ചു അവൻ എണിറ്റു നടന്നു..

പക്ഷെ അടുത്തദിവസവും അതിനടുത്ത ദിവസവും എന്നുവേണ്ട എല്ലാദിവസവും അവന്റെ ഫേവറൈറ് സീറ്റിൽ ഇരിക്കുന്ന അവളും അവൻ അവളെ ഒഴിവാക്കി വേറെ എവിടെ ചെന്നിരുന്നാലും എതിരെ ചെന്നിരിക്കുന്ന അവളും സ്ഥിരം സംഭവമായി..

പതിയെ അവന്റെ മടുപ്പ് മാറി.. അവന്റെ അടുത്തു വന്നിരിക്കുന്ന അവൾക്കെതിരെ അവന്റെ ഫേവറിറ്റ് ടേബിളിൽ അവൻ ചെന്നിരുന്നു തുടങ്ങി..

ലൈബ്രറിയിൽ ബുക്ക് എടുക്കാനും വയ്ക്കാനും സൊറ പറയാനും പ്രേമിക്കാനും വരുന്നവരുടെ ശബ്ദങ്ങൾക്കിടയിലും അവർ തമ്മിൽ നിലനിന്ന മൗനം തന്നെ ആയിരുന്നു അവരുടെ ഏറ്റവും വലിയ സംഗീതം..

അവന്റെ ഫേവറൈറ്റ് ബെഞ്ചിന് എതിർവശത്ത് വെളിച്ചക്കുറവ് വരുത്തുന്ന നിഴൽ അവളെ അവനൊപ്പം ഒരേ ബെഞ്ചിൽ സ്ഥാനകയറ്റം നൽകി..

സമയചക്രം അതിനെ ഏതെങ്കിലും ബുക്ക്‌ ഒരാൾ വായിച്ചു കഴിഞ്ഞത് മറ്റൊരാൾക്ക് നൽകുന്നതിലേക്കും പിന്നെയും ദിവസങ്ങൾ കഴിഞ്ഞപ്പോൾ ഒരേ ബുക്ക്‌ ഒരുമിച്ചു വായിക്കുന്നതിലേക്കും വരെ എത്തിച്ചു.

ഒരു ദിവസം അവൾ വന്നില്ല.. അതിനടുത്ത ദിവസവും.. രണ്ടാഴ്ച അവൾ തുടർച്ച ആയി മുടങ്ങി.. ലൈബ്രറിയിൽ മാത്രമല്ല കോളേജിലും..

എന്നും ലൈബ്രറിയുടെ കവാടത്തിൽ വന്നു ഉള്ളിലേക്ക് നോക്കി തിരിഞ്ഞു നടക്കുന്ന അയാളെ ലൈബ്രെറിയൻ അൽപ്പം അതിശയത്തോടെ നോക്കി.. പുസ്തകങ്ങളെ… എഴുത്തിനെ പ്രണയിക്കുന്ന അവനോട് അയാൾക്ക് ബഹുമാനം ആയിരുന്നു…

അടുത്ത ദിവസവും പ്രതീക്ഷയോടെ അകത്തേക്ക് നോക്കി നിരാശയോടെ പുറത്തേക്ക് തിരിഞ്ഞ അവനു തൊട്ടുമുന്പിൽ ആ വിഷാദം നിറഞ്ഞ കണ്ണുകൾ ഉണ്ടായിരുന്നു.. പതിവിലും കവിഞ്ഞ ശോകം അവളെ കൂടുതൽ സുന്ദരി ആക്കിയതായി അവനു തോന്നി..

അവനു പുറകിൽ അവളും അകത്തേക്ക് നടന്നു… ഒരായിരം ആവർത്തി വായിച്ചു വരികൾ പോലും മനഃപാഠമാക്കിയ നീർമാതളം പൂത്തപ്പോൾ അവന്റെ നേർക്ക് നീക്കി വച്ചു അവൻ ഇരുന്നു..