മിഥുനമാസത്തിലെ കാറ്റ് (അപ്പൂസ്) 2021

തലേന്ന് താഴെ ആരംഭിച്ച പൂജയിലെ ഹോമകുണ്ഡത്തിൽ നിന്നും കൊണ്ട് വന്ന അഗ്നിയുമായി തീരുമേനി ഹോമകുണ്ഡത്തിലേക്ക് നടന്നു.. പക്ഷെ പെട്ടെന്ന് വന്ന ചെറുകാറ്റിൽ എങ്ങുനിന്നോ വന്ന ഒരു തീപ്പൊരി ഹോമകുണ്ഡത്തെ പുകഞ്ഞു കത്തിച്ചു…

അതിലേക്ക് മങ്ങിയ വെള്ളയിൽ രക്തം കട്ടപ്പിടിച്ച ഒരു തുണിക്കീറു വീണു കത്തി.. അതിൽ നിന്നും വമിച്ച ദുർഗന്ധവും പുകയും അവരെ അവിടെ നിന്നും അകറ്റി..

അൽപനേരം കഴിഞ്ഞു ഹോമകുണ്ഡം നൂലിഴ പുക പോലും ഉയർത്താതെ കത്തി ജ്വലിക്കാൻ തുടങ്ങി.. നേരത്തെ വന്ന ദുർഗന്ധം മാറി അനിർവജനീയമായ സുഗന്ധം എങ്ങും പരന്നു..

“എല്ലാവരും പുറകിലോട്ട് മാറ്വാ.. ദേവചൈതന്യം കാണുന്നു നാം.. ആസുരജന്മങ്ങൾ ഒടുങ്ങി ദേവവിജയം പോലെ.. ആരും ഒന്നും തൊട്ട് അശുദ്ധമാക്കരുത്.. ഒന്ന് പ്രശ്നം വച്ച് നോക്കിയിട്ട് മതി ഇനിയെല്ലാം…”

പ്രശ്നം വക്കാൻ പലകയിൽ കവടി ചെരിഞ്ഞപ്പോൾ അവ കളത്തിൽ തനിയെ നിരന്നു.. അൽപനേരം കഴിഞ്ഞു അദ്ദേഹം പറഞ്ഞു..

“എല്ലാം ശുഭം.. ഇനി ഒരു പൂജയുടെയും ആവശ്യം പോലും കാണുന്നില്ല…..”

കൂടെ ഉള്ളവരെല്ലാം ആശ്വാസത്തിൽ നിശ്വസിക്കുമ്പോൾ അയാൾ തുടർന്നു…

“ഭഗവാൻ ശിവൻ ഗന്ധർവരൂപത്തിൽ നേരിട്ട് അവതരിച്ചു എന്നാ കാണുന്നേ… കൂടെ നാരീസാനിധ്യവും ഉണ്ട്.. ശിവപ്രതിഷ്ഠയോട് ചേർന്നു പാർവതിക്കും സ്ഥലം നൽകിയാൽ ബഹുകേമം..”

അതുകേട്ടു അവരെ തഴുകി പോയ ഇളംതെന്നലിൽ മഞ്ഞച്ചരടിൽ കോർത്തൊരു ആലിലത്താലി അരയാലിന്റെ ശിഖിരത്തിൽ നിന്നും ശിവലിംഗത്തിലേക്ക് വീണു..

അതെ സമയം മുത്തപ്പൻപാറക്ക് മറുവശം ശവം കണ്ട കഴുകന്മാർ വട്ടമിട്ടു പറക്കാൻ തുടങ്ങി.. അധികം വൈകാതെ അവിടെ നിന്നും കണ്ടെടുത്ത വൃഷണവും ലിംഗവും നഷ്ടപ്പെട്ട വസൂരികലയുള്ള ആളെ ഐഡന്റിഫൈ ചെയ്യാനുള്ള ശ്രമം തുടങ്ങി പോലീസ്.