മിഥുനമാസത്തിലെ കാറ്റ് (അപ്പൂസ്) 2030

കാലങ്ങൾക്ക് ശേഷം… അന്ന് സ്വന്തം പേര് പറഞ്ഞതിന് ശേഷം ആദ്യമായി അവൾ സംസാരിച്ചു..

അന്ന് അവൻ അവളുടെ കയ്യിൽ അനുവാദം ഇല്ലാതെ പിടിച്ചു.. പക്ഷേ ശബ്ദമുണ്ടാക്കി ശല്യപ്പെടുത്താൻ ആ കൈകളിൽ കുപ്പിവളകൾ ഇല്ലായിരുന്നു.. മുഖത്തെ വിഷാദഛവി പകർന്നത് പോലെ ആ കൈവെള്ളയിലെ മൈലാഞ്ചി നിറം മങ്ങി തുടങ്ങിയിരുന്നു..

“തനിക്ക് ഇഷ്ടമെങ്കിൽ ഞാനുണ്ട്.. ഞാൻ മാത്രമല്ല… സ്നേഹം മാത്രം നൽകാൻ അറിയുന്ന ഒരു അമ്മയും അനുജത്തിയും കൂടെ കിട്ടും തനിക്ക്….”

അൽപ്പം പരിഭ്രമം കലർന്ന പ്രതീക്ഷയോടെ അവൻ അവളെ നോക്കി..

അവളുടെ കൈവിരലുകൾ ഒരു നിമിഷം അൽപ്പം ബലമായി അവന്റെ കയ്യിൽ അമർന്നു.. ശേഷം അവന്റെ കൈകൾ വിടുവിച്ചു അവൾ എണിറ്റു പോയി…

പക്ഷെ പിന്നീട് ഉള്ള ദിവസങ്ങളിൽ എല്ലാം അവർ പതിവുപോലെ ലൈബ്രറിയിലെ ഒരേ ബെഞ്ചിൽ പുസ്തകം പങ്കുവച്ചു പോന്നു..

പിന്നീടൊരിക്കൽ ഒരേ ബുക്കിൽ തല പൂഴ്ത്തി ഇരിക്കുമ്പോൾ അവൾ അൽപ്പം നീങ്ങി ഇരുന്നു.. എന്തെന്ന് സംശയത്തോടെ അവളെ നോക്കിയ അവനിൽ നിന്നും മുഖം കുനിച്ച അവൾ അൽപ്പം കഴിഞ്ഞു ഒരു തുണ്ട് കടലാസ് അവന്റെ മുൻപിൽ ബുക്കിലേക്ക് ഇട്ടു..

കോളേജിന് പുറത്തെ കടയിലേക്ക് ഓടി നാണം മറന്ന്, ചുറ്റും പരിഹസിക്കുന്ന മുഖങ്ങൾ ഗൗനിക്കാതെ, ഒരു പാക്കറ്റ് സ്റ്റേഫ്രീ വാങ്ങി അവളിലേക്ക് ഓടിയെത്തുമ്പോൾ വേദന കൊണ്ട് പുളയുന്ന ആ മുഖത്തു അവനു നേരെ നന്ദിയുടെ ഒരു പുഞ്ചിരി മിന്നിമറഞ്ഞു..

പുറകിലെ ഷെൽഫിനു ഇടയിലേക്ക് ഊളിയിട്ട അവൾക്കരികിലേക്ക് ആരെങ്കിലും വരുമോ എന്ന പരിഭ്രമത്തിൽ നോക്കി ഇരിക്കുന്ന അവനെ അല്പം കഴിഞ്ഞു പുറത്ത് വന്നു അവൾ കളിയാക്കി..

“വേറെ ആരേലും ആണെങ്കിലവസരം ഉപയോഗപ്പെടുത്തി ഞാൻ എന്ത് ചെയ്യുന്നെന്ന് ഒളിഞ്ഞു നോക്കിയേനെ.. ഇയാൾ ഇതെന്തു പുരുഷനാ…”