ഭാഗ്യ സൂക്തം 03 [ഏക-ദന്തി] 78

” എങ്ങനെ ? എന്റെ അനിസാറോ ? അങ്ങേരതിന് എന്നെ കാണാനാണോ വരുന്നത് . പഠിപ്പിക്കാനല്ലേ ” ഒരു കോപ്പിലെ മനസാക്ഷി . തളർത്താൻ വേണ്ടി നേരത്ത് നേരത്ത് എഴുന്നള്ളിക്കോളും . എന്നാലൊരിത്തിരി ധൈര്യം തരുകയാണെങ്കിൽ വല്ല കോട്ടവും ഉണ്ടോ . എവിടെ , നല്ലകാര്യങ്ങൾ ചെയ്തുള്ള ശീലം പിന്നെ പണ്ടേ ഇല്ലല്ലോ അതിന് . ഇതിനെ കൊണ്ട് കൂടുതൽ ഡയലോഗടിപ്പിക്കാതെ നോക്കണം .

ഞാൻ വേഗം ബാഗും മൊബൈലും എടുത്ത് താഴേക്കിറങ്ങി . അച്ഛൻ കളിയൊക്കെ കഴിഞ്ഞു വന്നിട്ടുണ്ട് കുളിക്കാൻ കേറിയിരിക്കുന്നു . അമ്മ പിന്നെ രാവിലെ തന്നെ കുളിച്ചിട്ടാണ് കിച്ചണിലേക്കുതന്നെ കേറുന്നത് . അപ്പോഴേക്കും അപ്പു കുളിച്ച് കുട്ടപ്പനായി ബാഗും തൂക്കി വന്നിരിക്കുന്നു . യൂണിഫോമിലാണ് പാവം . ഞാനും പ്ലസ് റ്റു വരെ ഇതേ യൂണിഫോമിലായിരുന്നു . അസഹനീയം …

അമ്മ ഞങ്ങൾക്കിരുവർക്കും ലഞ്ച്ബോക്സ് തന്നു . അതും ബാഗിൽ വച്ച് ഞങ്ങൾ ഡൈനിങ് ടേബിളിലേക്ക് ചെന്നിരുന്നു .അപ്പോഴേക്ക് അച്ഛൻ ഡ്രസ്സ് മാറി വന്നു . ഡോക്ടർ ചുള്ളനായിരിക്കുന്നു . അച്ഛൻ പത്രവുമെടുത്ത് ഡൈനിങ് ടേബിളിലേക്ക് വന്നിരുന്നു . പത്രം രാവിലെ മാത്രമേ എല്ലാരും നോക്കൂ , അതും ഒരോട്ടപ്രദക്ഷിണം പോലെ .

ഞാൻ ഫോൺ എടുത്തൊന്നു നോക്കി . വല്ല മെസെജും വന്നിട്ടുണ്ടോന്ന് . എവടെ ? എന്ത് മെസ്സേജ് ? ഗ്രൂപ്പുകൾ അടക്കം എല്ലാം ശോകമാണ് . പണ്ടത്തെ പോലെ ഗുഡ്മോർണിംഗ് മെസേജുകാര് പോലും സ്ഥലം കാലിയാക്കിയിരിക്കുന്നു , ക്ലാസ് ഗ്രൂപ്പ് പോലും കാലി . പിന്നെ സ്റ്റാറ്റസ് നോക്കി . ജാൻസി ഏതോ വല്യ ഇടിമുട്ടി പോലത്തെ ഒരു സാധനം കയ്യില് പിടിച്ച് നിൽക്കുന്ന ഒരു ഫോട്ടോ ഇട്ടിട്ടുണ്ട് ” പമ്പിങ് അയൺ അറ്റ് ഫിറ്റ് ക്ലബ് ” എന്ന കാപ്ഷനും . ജൂബിത്താത്ത ചെക്കന്റെ ഫോട്ടോ ഇട്ടിട്ടുണ്ട് . പരട്ടകൾ ഒരു പപ്പിയുടെ ഫോട്ടോ ഇട്ടിട്ട് അതിനടിയിൽ ” വീട്ടിലേക്ക് പുതിയ അതിഥി കൂടി ” എന്ന കാപ്ഷനും . വന്നു വന്ന് വീട്ടിലൊരു കുട്ടി ജനിച്ചാലും , പട്ടിയെ വാങ്ങിയാലും ഇതാണ് സ്റ്റാറ്റസ് . ഇതൊക്കെ സ്റ്റാറ്റസിൽ നിറഞ്ഞു കിടക്കുന്നത് കാണുമ്പോളാണ് സഹിക്കാൻ പറ്റാത്തത് . വൈദ്യര്ച്ചിക്ക് പിന്നെ ഓൾടെ വൈദ്യരെ വിട്ടൊരു കളിയും ഇല്ല , ഓൾടെ ഫർഹാൻ വൈദ്യർ ചിരിച്ചു നിൽക്കുന്ന ഒരു ഫോട്ടോ ഇട്ടിരിക്കുന്നു . പിന്നെയും കുറെ സ്റ്റാറ്റസുകൾ .. തള്ളുകൾ.. പ്രഹസനങ്ങൾ .. ഓരോരോ ദുരന്തങ്ങൾ അവസ്ഥാന്തരങ്ങൾ .

അമ്മയും ഡ്രസ്സ് മാറി വന്നു . ഞങ്ങൾ ബ്രെക്ഫാസ്റ് കഴിക്കാൻ ഇരുന്നു . ഇന്ന് ഇഡ്ഡലിയും സാമ്പാറുമാണ് . ഉച്ചക്ക് ചോറിനും സാമ്പാറാണെന്ന് ഉറപ്പിച്ചു . അങ്ങനെ ഇഡ്ഡലിയും സാമ്പാറും തട്ടി ചായയും കുടിച്ച് ഞങ്ങൾ ഓരോരുത്തരും ഇറങ്ങാൻ തുടങ്ങി . കീ ഹോൾഡറിൽനിന്ന് ഞാൻ എന്റെ വിഗോയുടെ ചാവി എടുത്തിറങ്ങി . അപ്പുവിന്റെ സ്കൂൾ ബസ്സ് ഇവിടെ തന്നെ വരും . അവൻ ഷൂ ഇട്ടുകൊണ്ട് ഇറങ്ങി . കയ്യിൽ ഒരു ഹോക്കി കിറ്റ് ഉണ്ട് . അപ്പൊ ഇന്ന് അവർക്ക് പ്രാക്ടീസ് ഉണ്ട് . അപ്പു CBSE മലപ്പുറം ജൂനിയർ ഹോക്കി ടീമിൽ ഒക്കെ ഉണ്ട് . ഗേറ്റിനടുത്ത് പങ്കു നിൽക്കുന്നു . അപ്പു അവളുടെ അടുത്തേക് പോയി അവളുടെ കയ്യിൽ എന്തോ ചാർട് പേപ്പർ ഒക്കെ ഉണ്ട് . അപ്പോളേക്കും അമ്മയും അച്ഛനും വീട് പൂട്ടി ഇറങ്ങി . അമ്മയുടെ സ്കൂളിന്റെ ബസ്സ് മെയിൻ റോഡിലെ വരൂ . അതുവരെ അച്ഛന്റെ കാറിൽ പോകും . ഞാൻ ടാറ്റാ പറഞ്ഞിട്ട് എന്റെ വണ്ടി എടുത്തിറങ്ങി .

ഇനി കോളേജിൽ ..

ഞാൻ വണ്ടി പാർക്കിങ്ങിൽ ഇട്ട് ക്ളാസിലേക്ക് നടക്കുമ്പോളാണ് നൂസിയെ കൊണ്ട് അവളുടെ വൈദ്യർ വന്നത് . എന്നോട് ഒന്ന് ചിരിച്ച് വൈദ്യർ വണ്ടി വിട്ടു . ഓന്റെ ബീവി എന്റെ അടുതെക്ക് ഓടി വന്നു .

” ബ്യാഗൂ മോളെ , ഇന്ന് വൈന്നേരം റിംസിത്താനെ കാണാൻ പോയാലോ . ”

” ഇന്ന് വൈകുന്നേരോ” ഞാൻ ചോദിച്ചു .

” ആ ഇന്ന് വൈന്നേരം തന്നെ . അല്ലെങ്കിലേ പെരേല് മൂത്തച്ചി ആക്കീ കൊണ്ട് പറയിണ്ട് . പണ്ട് എന്തോക്കെന് , റിംസി ഞങ്ങളെ മിസ്സല്ല ഞങ്ങളെ ചങ്കാണ് , ഇത്താത്തെണ് , മാങ്ങേണ് ന്നൊക്കെ . ന്ന്ട്ട് ആ പെണ്ണൊരുത്തി കാലൊടിഞ്ഞിട്ട് പെരേൽ കുത്തിരിക്കാൻ തുടങ്ങീട്ട് മാസം 1 ആയില്ലേ . അയിനെ ഒന്ന് പോയി കണ്ടോ ഇജ്ജും അന്റെ ചെങ്ങായിച്ചയാളും . ” ഓൾ വികാരഭരിതയാവുന്നു .