പ്രിന്റ്‌ ചെയ്യാൻ കൊടുത്തപ്പോൾ അവസാനം വന്ന ആ കവിതയും അയാളെഴുതിയ മറുപടി കവിതയും ഉൾപ്പെടുത്തി. ആ മാഗസിനിൽ നിന്നും കീറിയെടുത്ത പേജാണ് ആനിയമ്മ കുറേകാലം സൂക്ഷിച്ചിരുന്നത്. അയാളെഴുതിയ മറുപടി കവിതയുടെ അവസാന വരികൾ ഇങ്ങനെയായിരുന്നു…
“എന്നിൽ നീ നുള്ളിയിട്ട പ്രണയവസന്തം പൂവാകകളായി ആ കനാൽക്കരയിൽ തളിർക്കും…
നീ തന്ന ഓർമ്മകളുടെ കാവൽക്കാരനായി അവിടെയാ ഒമ്പതാം പൂവാകച്ചോട്ടിൽ ഞാൻ കാത്തിരിക്കും….
അതിന്റെ വേരുകളെന്നിലാഴ്ന്നിറങ്ങി വരിഞ്ഞ് മുറുകുമ്പോഴും ഞാനാ പൂവാകത്തുമ്പുകളിൽ പൂത്ത് നിൽക്കും..”