പിരിയില്ലൊരിക്കലും 1 [പ്രൊഫസർ ബ്രോ] 100

ആദ്യ ദിവസം ക്ലാസ്സ്‌ ഒന്നും എടുക്കാതെ ടീച്ചേർസ് എല്ലാം വന്ന്‌ ഇൻട്രൊഡക്ഷൻ മാത്രം നടത്തി പോയി , ഇന്റർവെൽ ടൈമിൽ ഒക്കെ ക്ലാസ്സിൽ ഇരിക്കാതെ വെളിയിൽ ഇറങ്ങി ഞാൻ ദീപക് ചേട്ടനെ തന്നെ തപ്പി നടക്കുകയായിരുന്നു , ഉച്ചക്കും ഞാൻ പുള്ളിയെ തപ്പി ആ കോളേജ് മുഴുവൻ നടന്നെങ്കിലും എനിക്ക് പുള്ളിയെ കാണാൻ മാത്രം പറ്റിയില്ല . അതുകൊണ്ട് തന്നെ ഫർസാന അല്ലാതെ വേറെ ആരെയും കൂട്ടുകാരായി കിട്ടിയതുമില്ല

വൈകിട്ട് പോകാൻ സമയത്താണ് പിന്നെ ഞാൻ പുള്ളിയെ കാണുന്നത് , തലേദിവസം വന്ന്‌ ഹോസ്റ്റലിൽ ചേർന്നിരുന്നത് കൊണ്ട് കോളേജ് കഴിഞ്ഞ് നേരെ ഹോസ്റ്റലിലേക്ക് പോകാനായി ഇറങ്ങിയതായിരുന്നു ഞാൻ, എന്റൊപ്പം ഫർസാനയും ഉണ്ടായിരുന്നു അവളുടെ റൂമും എന്റെ അടുത്ത് തന്നെ ആയിരുന്നു , ഹോസ്റ്റൽ വാർഡനോട് സംസാരിച്ചു അവളെ എന്റെ റൂമിലേക്ക് മാറ്റണം എന്ന് ഞങ്ങൾ തീരുമാനിച്ചിരുന്നു

ഞാനും ഫർസാനയും സംസാരിച്ചു നടക്കുന്നതിനിടയിലും എന്റെ കണ്ണുകൾ ദീപക് ചേട്ടനെ തിരയുകയായിരുന്നു, പുള്ളി ഒരു കറുത്ത ബുള്ളറ്റിൽ ഇരിക്കുന്നത് കണ്ടതും എന്റെ കണ്ണുകൾ വിടർന്നു , എന്റെ കാലുകൾ യാന്ത്രികമായി പുള്ളിയുടെ അടുത്തേക്ക് നീങ്ങി

പുള്ളി എന്നെ കണ്ടതും ഒന്ന് ചിരിച്ചു , അതുകൂടി കണ്ടപ്പോൾ എന്റെ ഹൃദയം നിലച്ചു പോകുമോ എന്ന് തോന്നിപ്പോയി , പെട്ടന്നാണ് എന്നെ തള്ളിമാറ്റിക്കൊണ്ട് ഒരു സീനിയർ ചേച്ചി പുള്ളിയുടെ അടുത്തേക്ക് വേഗത്തിൽ നടന്നു പോയത് . അപ്പോഴാണ് എനിക്ക് മനസ്സിലായത് പുള്ളി എന്നെ നോക്കി അല്ല എന്റെ പിന്നിൽ വന്ന ആ ചേച്ചിയെ നോക്കിയാണ് ചിരിച്ചത് എന്ന് ,

ആ ചേച്ചി ചേട്ടന്റെ പിന്നിൽ ചേർന്നിരുന്ന് വയറിൽ കയ്യും ചുറ്റി പോകുന്നത് കണ്ടപ്പോൾ എന്റെ ഉള്ളിൽ എന്തെന്നറിയാത്ത ഒരു നൊമ്പരം ,  എന്റെ ചുമലിൽ ഒരു ഭാരം അനുഭവപ്പെട്ടു നോക്കുമ്പോൾ ഫർസാന എന്നെ കെട്ടിപ്പിടിച്ചു നിന്ന് ചിരിക്കുകയാണ് , ആദ്യം ഒരു ദേഷ്യം തോന്നിയെങ്കിലും പിന്നെ എനിക്കും ഓർത്തപ്പോൾ ചിരി വന്നു .

അപ്പോൾ ആണ് ഫർസാന എന്നെ മറ്റൊരു കാഴ്ച കൂടി കാട്ടിത്തരുന്നത് എന്നെ ക്ലാസ്സിൽ വച്ച് നോക്കിപ്പേടിപ്പിച്ച നാലെണ്ണവും നാല് സൈഡിൽ നിന്ന് അവർ പോകുന്നതും നോക്കി വിഷമിക്കുന്നു , അതുകൂടി കണ്ടപ്പോൾ ഞങ്ങളുടെ ചിരി കുറച്ചു ഉച്ചത്തിൽ ആയി

തുടരും…