പന്ത്രണ്ടാം ? തീയാട്ട് [ Sajith ] 1413

കുഞ്ഞൂട്ടൻ ഡ്രൈവറുമായി നല്ല കത്തി വെയ്പ്പാണ്. ഈ പ്രവശ്യം വന്ന ആളുടെ പേര് ശിവശങ്കരൻ എന്നാണ്. ഗോവിന്ദൻ മാമയുടെ മൂത്ത മകൻ പ്രകാശൻ്റെ ഡ്രൈവറാണ് പുള്ളി. പൊയ്ക്കൊണ്ടിരിക്കുന്ന ഡിസ്കവറി അയാളുടേതു തന്നെയാണ് പ്രകാശൻ്റെ. ഇന്ദിരാമ്മ വരുന്നത് പ്രമാണിച്ച് പുറത്തേക്കൊന്നും പോയില്ല പ്രകാശൻ. അയാൾ വിവാഹം കഴിച്ച് ഒരു കുഞ്ഞുണ്ട്. ഈ വിവരമെല്ലാം കുഞ്ഞൂട്ടൻ ഡ്രൈവറിൽ നിന്നും ചോദിച്ചറിഞ്ഞതാണ്. കൂടുതൽ അവൻ ചികയാൻ നിന്നില്ല. അവിടേക്ക് തന്നെയല്ലേ പോയ്ക്കൊണ്ടിരിക്കുന്നത്. കാണാൻ പോണ പൂരം പറഞ്ഞറിയുന്നതിൽ ഒരു ത്രില്ലില്ല കുഞ്ഞൂട്ടന്.

അപ്പുവും ഇന്ദിരാമ്മയും ചെറുമയക്കത്തിലേക്ക് പൊയിരുന്നു. അത്യാവശ്യം സസ്പെൻഷൻ ഉള്ളത് കൊണ്ട് വലിയ കുലുക്കമൊന്നും വണ്ടിക്കുണ്ടായില്ല. ഇടക്ക് കുഞ്ഞൂട്ടനും ഒന്ന് മയങ്ങി.

സമയം ഏകദേശം ഒരു രണ്ടെരയായപ്പോൾ ഡ്രൈവർ ശിവശങ്കരൻ കുഞ്ഞൂട്ടനെ തട്ടിവിളിച്ചു. അടുത്തുള്ള ഹോട്ടലിലെവിടേലും കയറി ഭക്ഷണം കഴിച്ചിട്ടാവാം ബാക്കി യാത്ര എന്നായി. ബോർഡർ കഴിഞ്ഞാൽ പിന്നെ ഒരു മണിക്കൂർ നേരത്തേക്ക് ഒരു പെട്ടികടപോലും കാണാനിടയില്ല. കുറ്റിച്ചെടികളും മരുഭൂമി കണക്കെ കെടക്കണ വന പ്രദേശവുമായിരിക്കും. കുഞ്ഞൂട്ടൻ കാറിൽ നിന്ന് പുറത്തേക്ക് നോക്കി.

അവര് ഒരുപാട് ദൂരം സഞ്ചരിച്ചിരിക്കുന്നു. കുടപ്പനകളും ചെറിയ ചെറിയ കെട്ടിടങ്ങളും നിറഞ്ഞ ഒരു പ്രദേശത്ത് കൂടിയാണ് കാറ് പൊയ്ക്കൊണ്ടിരിക്കുന്നത്. പാലക്കാട് ബോർഡർ കഴിയാൻ ഇനി കുറച്ച് നിമിഷങ്ങൾ കൂടിയെ ഉള്ളു. റോഡിന് രണ്ട് വശങ്ങളിലും കുടപ്പനകളും നെല്ലിമരങ്ങളും.

കുഞ്ഞൂട്ടൻ ഡ്രൈവറോഡ് വണ്ടി സൈഡാക്കാൻ പറഞ്ഞു. അവൻ്റെ നിർദ്ദേശപ്രകാരം ഡ്രൈവർ വണ്ടി സൈഡാക്കി കൊടുത്തു. കുഞ്ഞൂട്ടനും ശിവശങ്കരനും കാറിൽ നിന്ന് വെളിയിലിറങ്ങി. അധികം വാഹനങ്ങളൊന്നും അതു വഴി പോവുന്നില്ല. വല്ലപ്പോഴും ഒരു ട്രാക്ടറോ കാളവണ്ടിയോ അവരുടെ കാറിനെ കടന്ന് പോയിരുന്നു.

ശിവശങ്കരനേയും കൂട്ടി കുഞ്ഞൂട്ടൻ കുറച്ചപ്പുറത്തെ ഒരു പബ്ലിക് ടോയിലറ്റിൽ പോയി ഒന്ന് ഫ്രഷായി തിരികെ കാറിനടുത്തേക്ക് വന്നു. എന്നിട്ട് ഇന്ദിരാമ്മയേയും അപ്പൂനെയും വിളിച്ചുണർത്തി.

വീടെത്തിയോ എന്ന ആകാംക്ഷയിലാണ് ഇന്ദിരാമ്മ എഴുന്നേറ്റത്. ഇനിയും ഒരു രണ്ട് മൂന്ന് മണിക്കൂർ യാത്രകൂടിയുണ്ടെന്ന് പറഞ്ഞപ്പൊ അവരുടെ മുഖമൊന്ന് മങ്ങി. വീട്ടുകാരെ കാണാനുള്ള ഒരു എക്സൈറ്റ്മെൻ്റിലാണ് അവർ.

കുഞ്ഞൂട്ടൻ രണ്ട് പേരോടും പുറത്തിറങ്ങാൻ പറഞ്ഞു. അവരെ കൂട്ടി അടുത്തുള്ള ടോയിലറ്റിലേക്ക് കൊണ്ട് പോയി ഫ്രഷായി തിരികെ വന്നു. അവര് വന്നതും ഡ്രൈവർ സീറ്റിൽ കയറിയ ശിവശങ്കരനെ കുഞ്ഞൂട്ടൻ ഇറങ്ങാനായി ആവശ്യപ്പെട്ടു.