നന്ദന 6 [ Rivana ] 124

അവൻ ഇന്നലെ തന്നെ ഈ കാര്യങ്ങൾ എന്നോട് പറയാൻ നിന്നതായിരുന്നു പക്ഷെ ഞാൻ നേരത്തെ പോയതിനാൽ പറയാൻ സാധിച്ചില്ല.

ഒരിക്കലും അവനിൽ നിന്നും ഞാൻ കേൾക്കരുത് എന്നഗ്രഹിച്ച കാര്യങ്ങളാണ് കേട്ട് കൊണ്ടിരുന്നത്. അപ്പൊഴെല്ലാം ഉള്ള് നീറി കൊണ്ട് പുറത്ത് ചിരി വരുത്തി അവന് സപ്പോർട്ട് ആയി ഞാൻ നിന്നു. എനിക്ക് അതിനെ സാധിക്കുമായിരുന്നുള്ളൂ.

എപ്പോഴും അവൻ സന്തോഷത്തോടെ ഇരിക്കണം എന്ന് മാത്രമേ ഞാൻ ആഗ്രഹിച്ചിരുന്നുള്ളു. അവന്റെ സന്തോഷം ഇപ്പോൾ ടെസയാണ് അപ്പോൾ അവരുടെ സന്തോഷത്തിൽ ഒരു കരടായി നിൽക്കാൻ എനിക്ക് ആകുമായിരുന്നില്ല. അവനോട് ഒരിക്കലും എന്റെ ഇഷ്ട്ടം പറയാൻ കഴിയില്ല എന്ന് ഞാൻ മനസ്സിലാക്കുകയായിരുന്നു.

____

ഓരോ ദിവസവും കടന്ന് പോയി. അവർ രണ്ടു പേരും നല്ലൊരു പ്രണയ ജോഡികളായി തന്നെ എന്റെ കൺ മുന്നിൽ കൂടെ കോളേജിലെ പല ഇടങ്ങളിലും നടക്കുന്നത് ഞാൻ കണ്ടു.

ആദ്യമെല്ലാം എനിക്ക് അത് കാണുമ്പോൾ ഹൃദയം നുറുങ്ങുന്ന വേദനകൾ സമ്മാനിച്ചു. എന്നാൽ അധിക നാൾ കഴിയും മുൻപ് തന്നെ ഈ കാഴ്ചകൾ എല്ലാം റോയിയെ നല്ലൊരു ഫ്രണ്ടായി കാണാനും അതിനപ്പുറത്തേക്കുള്ള ഒരു ബന്ധം ഇല്ലെന്നും മനസിന്നെ ഞാൻ പഠിപ്പിച്ചിരുന്നു, അത് തന്നെയാണ് യാഥാർഥ്യവും.

അതോട് കൂടെ എന്റെ വിഷമങ്ങൾ എല്ലാം ഇല്ലാതായി അവർ രണ്ടു പേരോടും പഴയ പോലെ സൗഹൃദ പരമായി മനസ്സിൽ വിഷമങ്ങൾ ഒന്നും വയ്ക്കാതെ സംസാരിക്കാൻ എനിക്കായി.

അവരുടെ ആ ബന്ധത്തിൽ ഞാൻ ഹാപ്പി ആവുകയും ചെയ്തു. അവർ രണ്ടു പേരും ഒരുമിക്കണം എന്നാകും  ദൈവ നിശ്ചയം, അതിന് ഞാൻ വെറുതെ ആശിക്കുകയും കുറെ വിഷമിക്കുകയും ചെയ്തു അത് എന്റെ തെറ്റായി ഞാൻ കണക്കാക്കി.

ഇത് പോലെ എനിക്കും ഉള്ള ആൾ മറ്റെവിടെയോ ദൈവം കണ്ടു വച്ചിട്ടുണ്ടാകും പക്ഷെ എനിക്ക് കണ്ടെത്താൻ ഉള്ള സമയം ആയികാണില്ല.

അവർ രണ്ടു പേരും എപ്പോഴും ഒരുമിച്ചു സന്തോഷത്തോടെ ഇരിക്കണം എന്ന് ഞാൻ ദൈവത്തോട് പ്രാർത്ഥിക്കും.