◆◆◆◆◆◆◆◆◆◆◆◆◆◆◆◆◆◆◆◆◆◆◆◆

ദക്ഷാർജ്ജുനം – 11

Author : Smera Lakshmi | Previous Part

◆◆◆◆◆◆◆◆◆◆◆◆◆◆◆◆◆◆◆◆◆◆◆◆

DA 11

“അത് ആനന്ദ്..”

“ഇവൻ ഞങ്ങളുടെ മകനല്ല….”

“വെറും 4 ദിവസം പ്രായമുള്ളപ്പോൾ ഒരു ഓർഫനേജിൽ നിന്നും ഞങ്ങളെടുത്തു വളർത്തിയതാണ് ഇവനെ.”

“ഇതുകേട്ട് ആനന്ദുൾപ്പടെ എല്ലാവരും ഞെട്ടി തരിച്ചിരുന്നു.”

“ഭയാനകമായ എന്തോ ഒന്ന് മുൻപിൽ കണ്ടതുപോലെ ദേവാനന്ദ് അറിയാതെ ഇരിപ്പിടത്തിൽ നിന്നും എണീറ്റ് ശേഖരനേയും സീതയേയും ദയനീയമായി ഒന്നു നോക്കി.”

പിന്നെ ആരേയും നോക്കാതെ, ആരോടും ഒന്നും പറയാതെ ഈശ്വരമംഗലത്തിന്റെ പടിയിറങ്ങി നടന്നകന്നു.

ആനന്ദ് ഇറങ്ങി പോകുന്നത് കണ്ട് സീത ആനന്ദിന്റെ പുറകെ ഓടി.

“ആനന്ദ്….മോനെ….അവിടെ നിൽക്ക്,”
“ഒന്നു നിൽക്കെടാ….അമ്മയല്ലേ വിളിക്കുന്നെ….”

സീത കരഞ്ഞു കൊണ്ട് ആ മുറ്റത്തേക്ക് തളർന്നു വീണു.

അപ്പോഴേക്കും ശേഖരനും ഈശ്വരമംഗലത്തുള്ളവരുമെല്ലാം സീതയ്ക്കരികിലേക്ക് ഓടിയെത്തി.

ലച്ചു സീതയെ പിടിച്ചെണീപ്പിച്ചു.
ശേഖരനും അവളെ പിടിക്കാനാഞ്ഞു.

“തൊട്ടുപോകരുതെന്നെ….”

സീത പൊട്ടിത്തെറിച്ചു.

“ഇത്രയും കാലം അവനറിയാതെ കൊണ്ടുനടന്ന ആ രഹസ്യം ഇവരോട് എല്ലാവരോടും പറയണമായിരുന്നെങ്കിൽ എന്നോട് ഒരു വാക്ക് പറയാമായിരുന്നില്ലേ….”

“അവനറിയാതെ ഞാൻ തന്നെ പറയുമായിരുന്നല്ലോ.
അല്ലെങ്കിൽ നിങ്ങൾക്കും അങ്ങനെ തന്നെ ചെയ്യാമായിരുന്നില്ലേ
എന്റെ കുഞ്ഞു മനസ്സ് തകർന്നാ ഇവിടെ നിന്നിറങ്ങി പോയത്.”

കത്തുന്ന കണ്ണുകളോടെ സീത ശേഖരനോട് പറഞ്ഞു,എന്നിട്ട് ദേവനരികിലേക്ക് ഓടി.