തിരുഗണിക-1 [Harshan] 4133

അധ്യായം 3

പറങ്കിചരിതം

പതിനാറാം നൂറ്റാണ്ടിന്റെ ആദ്യ  ദശകത്തിൽ പതിനഞ്ചാം നൂറ്റാണ്ടിന്റെ അവസാന ഘട്ടത്തിൽ പറങ്കികൾ (പോർച്ചുഗീസ്) വാസ്കോ ഡി ഗാമയുടെ നേതൃത്വത്തിൽ  മലയാളമണ്ണിൽ മലബാർ തീരത്തു കാൽ കുത്തി.

സാമൂതിരിയുമായി ഉടലെടുത്ത അസ്വാരസ്യങ്ങൾക്ക് അപ്പുറം അധീശത്വം സഥാപിക്കുന്നതിന്റെ ഭാഗമായി പോർച്ചുഗീസ് വൈസ്രോയിയായി നിയമിതനായ അഡ്മിറല്‍ അഫോന്‍സോ ഡി അല്‍ബുക്യുര്‍ക്ന്റെ നേതൃത്വത്തില്‍ പറങ്കിപട ഗോപകപട്ടണം കീഴടക്കി.

അക്കാലത്ത് ഗോപകപട്ടണം പടിഞ്ഞാറ് പ്രദേശത്തെ പ്രധാന തുറമുഖമായി മാറിയിരുന്നു. സമുദ്രമേഖലയും അതിലൂടെയുള്ള വാണിജ്യവും പൂർണ്ണമായും പറങ്കികളുടെ നിയന്ത്രണത്തിലാകുകയും പറങ്കികൾ തങ്ങളുടെ വലിയൊരു സാമ്രാജ്യം സ്ഥാപിക്കയുമുണ്ടായി. നിരവധി കെട്ടിടങ്ങളും കോട്ടകളും  പണിതുയർത്തി. നാനൂറു വർഷത്തിന് മേൽ പറങ്കികൾ ഗോപകപട്ടണത്തിൽ ഭരണ൦ നിർവ്വഹിച്ചു.

ഭരണത്തോടൊപ്പം പറങ്കികൾ അവിടെ ജീവിച്ചു കൊണ്ടിരുന്ന വിവിധ മതവിഭാഗങ്ങളെ ഭീഷണിപ്പെടുത്തിയും നിർബന്ധിച്ചും മത൦ മാറ്റത്തിനു വിധേയമാക്കി. അതിനു പറങ്കികളുടെ രാജാവിന്റെ അനുമതിയുമുണ്ടായിരുന്നു.പിന്നീട് പറങ്കി ഭരണകൂട൦ അവിടത്തെ വിവിധ സംസ്കാരങ്ങളെയും ആചാരങ്ങളെയും തച്ചുടക്കുവാൻ നിയമങ്ങൾ കൊണ്ട് വന്നു. മനുഷ്യാവകാശലംഘനങ്ങളൂം കൂട്ടക്കൊലകളും നടക്കപ്പെട്ടു.പരമ്പരാഗത ആചാരങ്ങൾ അനുവർത്തിച്ചു ജീവിക്കുന്ന ക്രൈസ്തവരെയും പറങ്കിപടയാളികൾ വെറുതെ വിട്ടില്ല. വിഗ്രഹാരാധന നിരോധിച്ചു. മുന്നൂറിൽ  പരം ക്ഷേത്രങ്ങൾ തകർത്തു. അതിലേറെ ക്ഷേതങ്ങൾ അടച്ചു പൂട്ടി. ക്ഷേത്ര സ്വത്തുക്കൾ കൊള്ളയടിച്ചു. കൊങ്കണി മറാത്തി സംസ്കൃത അറബി ഭാഷകളിലെ പുസ്തകങ്ങളുടെ വിൽപ്പന നിരോധിക്കപ്പെട്ടു. കൊങ്കണി ഭാഷയെ നിരോധിച്ചു. പറങ്കി മിഷനറിമാർ ഗോപകപട്ടണത്തിലുള്ള ക്ഷേത്രവിശ്വാസികളെ ചെകുത്താൻ ആരാധകർ എന്ന പേരിൽ മതവിചാരണ (inquisition) നടത്തി. മതപരിവർത്തനം ചെയ്യാത്ത സകലർക്കും സർക്കാ൪ ജോലികൾ നിഷേധിച്ചു. മത വിചാരണയിൽ  കുറ്റക്കാർ എന്നാരോപിച്ചു ക്രൂരമായ ശിക്ഷാവിധികൾക്കു വിധേയരായാക്കി. കുറെ ജനങ്ങൾ മതപരിവർത്തനം നടത്തി. അതിനു തയ്യാറാകാത്തവരെ ക്രൂരമായി ശിക്ഷിച്ചു. അതിൽപ്പെട്ട നിരവധി ഇതരസമുദായങ്ങൾ പ്രാണരക്ഷാർത്ഥം കുടുംബവുമായി സകല സ്വത്തുവകകളും ഉപേക്ഷിച്ചു നാട് വിട്ടു. ഗൗഡസാരസ്വത ബ്രാഹ്മണർ ഭൂരിഭാഗവും പ്രാണരക്ഷാർത്ഥം ദ്രാവിഡ ദേശങ്ങളിലേക്കും മലയാളനാട്ടിലേക്കും പലായനം ചെയ്തു.