തിരുഗണിക-1 [Harshan] 4133

അധ്യായം 1

ഗോപകപട്ടണചരിതം

കൊങ്കണ പ്രവിശ്യ എന്നത് മഹാരാഷ്ട്രയിലെ താനെ മുതൽ കർണ്ണാടകത്തിലെ കാർവാർ വരെ അറബികടലിനോടു ചേർന്ന് കിടക്കുന്ന ദീർഘമായ പ്രദേശം.

കൊങ്കണ പ്രവിശ്യയിൽ നിലകൊണ്ടിരുന്ന ഒരു പൂർവ്വകാല തുറമുഖപട്ടണം. ഗോപകപ്പട്ടണം  അഥവാ ഗോവാപുരി.

സ്കന്ദപുരാണത്തിൽ സഹ്യാദ്രിഖണ്ഡത്തിൽ ഗോവാപുരിയെ കുറിച്ച് പ്രതിപാദിക്കുന്നതിങ്ങനെ

गोकर्णादुत्तरे भागे सप्तयोजनविस्तृतं
तत्र गोवापुरी नाम नगरी पापनाशिनी

ഗോകർണ്ണാദുത്തരെ ഭാഗേ സപ്തയോജനാവിസ്തൃതം

തത്ര ഗോവാപുരി നാമനഗരി പാപനാനാശിനി

ഗോകർണ്ണത്തിനു വടക്കു ഏഴു യോജന വിസ്തൃതിയിൽ ഗോവാപുരി എന്നൊരു പാപനാശിനിയായ നഗരമുണ്ട്.

ഒരു തുറമുഖനഗരം കൂടെയായതിനാൽ ചരിത്രാതീത കാലം മുതലെ കീർത്തികെട്ട പ്രദേശമാണ് ഗോവാപുരി അഥവാ ഗോപകപട്ടണ൦.

പൗരാണികരായ ഗ്രീക്ക് ഈജിപ്ഷ്യൻ അറബ് കച്ചവടക്കാർ പായകപ്പലിൽ വന്നു തുണിത്തരങ്ങളും മസാലകളും സുഗന്ധദ്രവ്യങ്ങളും  കച്ചവടം നടത്തിക്കൊണ്ടിരുന്ന കൊങ്കൺ പ്രവിശ്യയിലെ ഒരു പ്രദേശമായിരുന്നു ഗോവാപുരി.

ഗോവാപുരിയടങ്ങുന്ന മഹാവിസ്‌തൃതിയാർന്ന  പ്രദേശങ്ങൾ ചരിത്രാതീത കാലം മുതല്ക്ക് തന്നെ നിരവധി രാജവംശങ്ങൾ ആധിപത്യം സ്ഥാപിക്കപ്പെട്ടതാണ്.

ആറാം നൂറ്റാണ്ടു മുതൽ എട്ടാം നൂറ്റാണ്ടുവരെ ഈ പ്രവിശ്യ ചാലുക്യ൯മാരുടെ അധീനതയിലായിരുന്നു. അവർക്കു ശേഷം ഭരണം ശിലാഹര രാജവംശത്തിനു കീഴിലായി. അവർ എട്ടാം നൂറ്റാണ്ടുമുതൽ പത്താം നൂറ്റാണ്ടു വരെ ഈ പ്രവിശ്യയെ കൈയടക്കി ഭരണം നിർവ്വഹിച്ചു.

അവർക്കു ശേഷം പത്തു മുതൽ പതിനാലു നൂറ്റാണ്ടുകൾ കദംബ വംശത്തിന്റെ അധീനതയിൽ വന്നു.കദംബ രാജവംശത്തിന്റെ വാഴ്ചയിൽ ആദ്യം ഗോപകപട്ടണം ഉൾപ്പെട്ടിരുന്നില്ല , പിന്നീട് സായുധ ആക്രമണത്തിലൂടെ  അന്നത്തെ രാജാവായിരുന്ന ശാസ്തദേവ൯ ഈ പ്രദേശവും അവരുടെ അധീനതയിലാക്കുകയും ഒപ്പം തന്റെ രണ്ടാം തലസ്ഥാനമാക്കി ഭരണനിർവഹണം നടത്തുകയുമുണ്ടായി.കദംബ വംശത്തിനു കീഴിൽ ഗോപകപട്ടണം  സാമ്പത്തികമായും  സാംസ്കാരികമായും കലാസാഹിത്യപരമായും  ഏറെ അഭിവൃദ്ധി  പ്രാപിച്ചു,

അന്നാളിൽ ഗോപകപട്ടണം ആഫ്രിക്ക മലയ അടക്കമുള്ള വിദേശരാജ്യങ്ങളിലേക്കുള്ള കച്ചവടകേന്ദ്ര തുറമുഖമായി മാറുകയുമുണ്ടായി. അതിനു ശേഷം കദംബ രാജവംശത്തി൯ കീഴിൽ നിന്നും ഡെക്കാൻ പ്രവിശ്യയിലെ മുസ്‌ലിം ഭരണാധികാരികളായ ബഹ്‍മാനി സുൽത്താൻ വംശം  ഈ പ്രദേശം ആക്രമിച്ചു കീഴ്പെടുത്തി ഭരണമേൽക്കുകയും ചെയ്തു . ഏറെ നാൾ അവർക്ക് ഭരിക്കുവാൻ സാധിച്ചില്ല , വിജയനഗരസാമ്രാജ്യം അവരെ കീഴ്‌പ്പെടുത്തി ഗോപകപട്ടണം അടങ്ങുന്ന പ്രദേശങ്ങളിൽ ഭരണം സ്ഥാപിച്ചു.ഒരു  നൂറ്റാണ്ടുകാലം വിജയനഗര രാജാക്കന്മാർ  വികസനോന്മുഖമായ കന്നഡ ദേശത്തെ ഹംപി തലസ്ഥനമാക്കി  ഭരണം നടത്തുകയുമുണ്ടായി.

അവർക്കു ശേഷം ബീജാപ്പൂർ സുൽത്താനായിരുന്ന ആദിൽഷാ ഗോപകപട്ടണത്തെ  തന്റെ ഭരണത്തിന് കീഴിൽ കൊണ്ടുവന്നു

*********