ഡെറിക് എബ്രഹാം 27 [അഹമ്മദ് ശഫീഖ് ചെറുകുന്ന്] 220

പ്രത്യേക ഇടവേളകളിലായിരുന്നു അവരെയൊക്കെ തിരിച്ചു വിടുന്നുണ്ടായിരുന്നത്…

എന്നാൽ , എല്ലാ പ്ലാനുകളും തെറ്റിച്ചു കൊണ്ടുള്ള ഗസ്റ്റുകളുടെ മരണപ്പാച്ചിലായിരുന്നു അന്നേ ദിവസം നടന്നത്…നിലയ്ക്കാത്ത ഓട്ടം , മരുഭൂമിയുടെ പുറത്തേക്കും തുടർന്നപ്പോൾ , ആ നാട്ടിലുള്ളവരൊക്കെ ആശങ്കാകുലരായി..

അത് പതിവ് പോലെ മീഡിയയുടെ ചെവിയിലുമെത്തി…

അധികം വൈകാതെ തന്നെ , പോലീസ് സ്റ്റേഷനിലും വിവരമറിഞ്ഞു…

വണ്ടികളുടെ നിലയ്ക്കാത്ത മത്സരപ്പാച്ചിലായതിനാൽ , അവയുടെ ഉത്ഭവ സ്ഥാനം കണ്ടു പിടിക്കാൻ ബുദ്ധിമുട്ടേണ്ടി വന്നില്ല..

പെട്ടെന്ന് തന്നെ മീഡിയയ്ക്ക് അവിടെ എത്തിച്ചേരാൻ സാധിച്ചു..

പിന്നാലെ പോലീസുകാരുമെത്തി..

ആ നാട്ടുനടപ്പ് എല്ലാ ദേശത്തും ഒരു പോലെ തന്നെയായിരുന്നു…

മീഡിയയൊക്കെ അറിഞ്ഞു വന്നതിന് ശേഷം , ഒരു കർമ്മം പോലെ മാത്രമേ പോലീസുകാർ എത്തുകയുള്ളൂ…

ഇവിടെയുമവർ പതിവ് തെറ്റിച്ചില്ല..

അങ്ങനെയാണ് മീഡിയയും പോലീസും അവിടെ എത്തിച്ചേർന്നത്…

 

==================

 

വന്നത് മീഡിയയും പോലീസുമാണെന്ന് മറ്റുള്ളവരെ പോലെ സ്റ്റീഫനും തിരിച്ചറിഞ്ഞു…

അവരെ കണ്ടപ്പോൾ , അത് വരെ കുഴഞ്ഞു വീഴാനായ നിലയിലുണ്ടായിരുന്ന അവനിൽ , എവിടെ നിന്നോ വല്ലാത്തൊരു ഊർജം കയറി വന്നു….

സർവ്വശക്തിയുമെടുത്തു കൊണ്ട് അജിയുടെയും സേവിയുടെയും തടങ്കൽപൂട്ടുകൾ പൊട്ടിച്ചു കൊണ്ട് , അവൻ മീഡിയയുടെ മുന്നിലേക്ക് ഓടി…

അത് കണ്ടപ്പോൾ തന്നെ , ഡെറിക് അവനെ ഉന്നം വെച്ചു കൊണ്ട് തോക്ക് ചൂണ്ടി…അപ്പോഴേക്കും അവന്റെ അടുത്തെത്തിയിട്ടുണ്ടായിരുന്ന മധുവങ്കിൾ , ഡെറിക്കിനെ തടഞ്ഞു…

അപ്പോഴേക്കും , അവിടം മുഴുവനും CCTV യേക്കാൾ കാഴ്ച കൂടിയ , മാധ്യമക്കണ്ണുകളുടെ നിരീക്ഷണത്തിലായിത്തീർന്നിരുന്നു..

അതായിരുന്നു മധുവങ്കിളിന്റെ നീക്കത്തിന് കാരണം…

അവരെയും മറികടന്നു കൊണ്ട് , സ്റ്റീഫൻ മീഡിയയെ ലക്ഷ്യമാക്കി ഓടി…

 

” സുഹൃത്തുക്കളേ…

കീഴടങ്ങിയിട്ടും , കേരള പോലീസ് എന്നെ വെടി വെച്ചു കൊല്ലാൻ ശ്രമിക്കുകയാണ്…ആരെങ്കിലും എന്നെ ഇവിടുന്ന് രക്ഷിക്കണേ…”

 

എന്നവൻ നിലവിളിച്ചു കൊണ്ടിരിക്കുന്നുണ്ടായിരുന്നു…

അതൊക്കെയും മീഡിയ ഒപ്പിയെടുക്കുന്നുമുണ്ടായിരുന്നു…

സ്റ്റീഫൻ , മീഡിയയുടെ മുന്നിലേക്കെത്തുന്നത് തടയാനുള്ള സമയം , ഡെറിക്കിനും കൂട്ടർക്കും കിട്ടിയില്ലായിരുന്നു..

എന്താ ചെയ്യേണ്ടതെന്നറിയാതെ അവർ നിസ്സഹായരായി നിന്നു…

എന്നാൽ , ഇടിമിന്നൽ പോലെ പെട്ടെന്ന് സ്റ്റീഫന്റെ നേരേക്ക് ഒരു കാൽ ചീറി വന്നു..

അതിന്റെ ആഘാതത്തിൽ അവൻ പിന്നിലേക്ക് തെറിച്ചു വീണു..

 

ചീറി വന്ന ആ കരുത്തൻ കാലുകൾ മൈക്കിളിന്റേതായിരുന്നു..

വീണു കിട്ടിയ അവസരം ഡെറിക് മുതലാക്കി…

താഴേക്ക് വീണു കിടന്ന സ്റ്റീഫനെ , പിടിച്ചു വലിച്ചു അവൻ ഒരു കോണിലേക്ക്‌ പോയി… കൈയിലെ പരിക്കുകളൊക്കെ മറവിക്ക് വിട്ടു കൊടുത്തു കൊണ്ട് ഒരു ഭ്രാന്തനെ പോലെ , ഡെറിക് കാലുകൾ കൊണ്ട് സ്റ്റീഫനെ ഒരുപാട് തൊഴിച്ചു…

 

“ഈ ലോകം മുഴുവൻ എതിരായി നിന്നാലും , വിടില്ലെടാ നായേ..നിന്നെ ഞാൻ…”

 

നിയന്ത്രണം വിട്ട ഡെറിക് സ്റ്റീഫനെ മർദിച്ചു കൊണ്ടേയിരുന്നു…