ഡെറിക് എബ്രഹാം 27 [അഹമ്മദ് ശഫീഖ് ചെറുകുന്ന്] 222

ഡെറിക് എബ്രഹാം 27
( In the Name of COLLECTOR )

~~~~~~~~~~~~~~~~~~~~~~~~~~

✒️ അഹമ്മദ് ശഫീഖ് ചെറുകുന്ന്

PART 27

Previous Parts

 

സാന്റാ ക്ലബ്ബിന്റെ വാതിലും മറികടന്ന് കൊണ്ട് , ഓടി വരുന്നതരാണെന്നറിയാൻ എല്ലാ കണ്ണുകളും ആകാംക്ഷയോടെ കാത്തിരുന്നു..

അജിയും സേവിയും സ്റ്റീഫന്റെ പിടുത്തം വിട്ടില്ലായിരുന്നു..

അധികം വൈകാതെ , കയറി വരുന്നവരുടെ മുഖങ്ങൾ തെളിഞ്ഞു വന്നു….

പോലീസുകാരും മാഫിയക്കാരും ഒരേ പോലെ ഭയപ്പെടുന്ന കൂട്ടം തന്നെയായിരുന്നു അത്..

മീഡിയ…

അതായത് മാധ്യമപ്രവർത്തകരായിരുന്നു അകത്തേക്ക് ഓടി വന്നത്….

മീഡിയയാണെന്ന് തിരിച്ചറിഞ്ഞപ്പോൾ തന്നെ , പോലീസുകാർ ഓടിച്ചെന്നു കൊണ്ട് അവരെ ബ്ലോക്ക് ചെയ്തു…

ആ ഏരിയയിൽ ഒരു രീതിയിലും എത്തിച്ചേരാൻ സാധ്യതയില്ലാത്ത മീഡിയ , എങ്ങനെ അവിടെയെത്തിയെന്ന് മനസ്സിലാവാതെ ഡെറിക്കും കൂട്ടരും മിഴിച്ചു നിന്നു..

സംശയത്തോടെ , മധുവങ്കിളിനെ നോക്കിയപ്പോൾ അദ്ദേഹവും കൈമലർത്തി…

മാധ്യമപ്രവർത്തകരുടെ പിന്നാലെ , രാജസ്ഥാൻ പോലീസിന്റെ നിഴലുകളും അവിടെ കണ്ടപ്പോൾ , എല്ലാവരും സ്തബ്ധരായി നിന്നു പോയി..

 

================

 

മാസങ്ങൾ നീണ്ടു നിൽക്കുന്ന കൃത്യമായ പ്ലാനിങ്ങോടെയായിരുന്നു , സ്റ്റീഫൻ സാന്റാക്ലബ്ബിൽ ‘ഡ്രീം നൈറ്റ് പാർട്ടി ‘ നടത്തി വന്നിരുന്നത്…

അതിൽ പങ്കെടുക്കുന്നവരുടെയൊക്കെ വിവരങ്ങൾ , നാളുകൾക്ക് മുമ്പ് തന്നെ അവന്റെ മുമ്പിലെത്തിയിരുന്നു…

ഗസ്റ്റുകൾ ഫ്ലൈറ്റ് ഇറങ്ങിയത് മുതൽ തിരിച്ചു നാട്ടിലേക്ക് കയറുന്നത് വരെയുള്ള ഓരോ നീക്കങ്ങളും , സ്റ്റീഫന്റെയും കൂട്ടരുടെയും നിയന്ത്രണത്തിലായിരുന്നു…

എന്തിനേറെ പറയുന്നു…

ഗസ്റ്റുകളായി കയറിപ്പറ്റിയ , ഡെറിക്കിന്റെയും കൂട്ടരുടെയും നിയന്ത്രണം പോലും അവരുടെ കൈയിലായിരുന്നു…

പക്ഷേ, ആ തോണി തുഴഞ്ഞത് മുഴുവനും മൈക്കിളായിരുന്നുവെന്ന് മാത്രം..

 

അന്നേ വരെയുള്ള സ്റ്റീഫന്റെ പദ്ധതികളിൽ ആദ്യമായാണ് , അവന്റെ കണക്കുകൂട്ടലുകളൊക്കെ തെറ്റിച്ചു കൊണ്ട് , ഡ്രീംനൈറ്റ് പാർട്ടി അലങ്കോലമാകുന്നത്…

അതിന് മുമ്പൊക്കെ , പാർട്ടിയിൽ വരുന്നവരുടെ തിരിച്ചു പോക്ക് പോലും , പുറത്തുള്ളവർക്ക് സംശയമൊന്നും തോന്നാത്ത രീതിയിലായിരുന്നു..