ഡെറിക് എബ്രഹാം 12 [അഹമ്മദ് ശഫീഖ് ചെറുകുന്ന്] 167

അങ്ങനെയുള്ള അവനോട് നീ പ്രണയം എന്ന് പറഞ്ഞു പോകരുത്…. അവന്റെ ജീവിതം എന്ന് പറയുന്നത് തന്നെ ജൂഹിയും കീർത്തിയുമാണ്… അതിനപ്പുറം വേറൊന്നുമില്ല…. അത് കൊണ്ട് തന്നെയാണ് ജീവനേക്കാൾ സ്നേഹിച്ച പെണ്ണിനേയും തഴഞ്ഞും കൊണ്ട് അവൻ ഇങ്ങനെ ജീവിതം മുന്നോട്ട് കൊണ്ട് പോകുന്നത് ”

“അപ്പോൾ ആദി ശരിക്കും ആരാണ് മാമീ…അവനെന്തിനാണ് ഇങ്ങനെയൊക്കെ ചെയ്യുന്നത് ? ”

“അത് മാത്രം നീയെന്നോട് ചോദിക്കരുത്..എനിക്കത് പറയാൻ പറ്റില്ല… അവന് കൊടുത്ത വാക്കുകൾ കൊണ്ടല്ല…. അത് , എന്റെ മക്കളുടെ ജീവൻ തന്നെ അപകടത്തിലാക്കും…

നിന്നോട് പറയാൻ പറ്റാത്തതാണെങ്കിൽ പോലും ഇത്രയെങ്കിലും പറഞ്ഞത് , നിന്റെ മനസ്സ് പിന്നീട് ഇതിനേക്കാൾ വേദനിക്കാതിരിക്കാനാണ്..”

“എനിക്കൊന്നും മനസ്സിലാകുന്നില്ല മാമീ..”

“നീ അധികമൊന്നും മനസ്സിലാക്കാതിരിക്കലാണ് നല്ലത് മീരാ….

ഒരു കാര്യം കൂടി…

ആദിക്ക്‌ വേണ്ടി മാത്രമല്ല ,ആ കുട്ടികൾക്കും വേണ്ടി ആയുസ്സ് മുഴുവൻ കാത്തു നിൽക്കുന്ന ഒരു പെണ്ണുണ്ടവിടെ….

ചാന്ദ്നി….

ഒത്തിരി ദൂരെയാണെങ്കിലും മനസ്സ് കൊണ്ട് , എന്നും അവരുടെ കൂടെ തന്നെയുണ്ടവൾ… അവൾക്ക് പകരക്കാരിയാവാൻ ലോകത്തിൽ ഇനി വേറൊരാൾക്കും പറ്റില്ല..

അത് കൊണ്ട് എന്റെ മോൾ ഈ ആഗ്രഹം വേണ്ടെന്ന് വെക്കുക…

നിന്റെ സ്നേഹത്തിന്റെ വില മനസ്സിലാകാഞ്ഞിട്ടല്ല കുട്ട്യേ…..

ചാന്ദ്നിക്ക് അവരോടുള്ള സ്നേഹം ഒരാൾക്കും മനസ്സിലാക്കാൻ പറ്റാത്തതാണ്..ആത്മാർത്ഥതയുടെ കൊടുമുടിയിലാണ് അവരുടെ മനസ്സിൽ അവളുടെ സ്ഥാനം…