അപരാജിതൻ 49 4697

“മഠത്തിലമ്മേ,,,വൈശാലിയിൽ വിലക്കപ്പെട്ട അർഹതന്മാർ വന്നത് അറിഞ്ഞു പീഠപ്രമാണി പെരിയോർ പറഞ്ഞയച്ചതാണ് ഞങ്ങളെ, അവരെ കണ്ടു പിടിക്കാനും പിടിച്ചു കെട്ടി കൊണ്ടുപോകാനും , അന്വേഷണത്തിലാണ് അവരിങ്ങോട്ട് വന്നത് ഞങ്ങൾക്കറിയാൻ സാധിച്ചത്, അതിനാൽ ഞങ്ങളിവരെ കൊണ്ട് പോകുന്നു. കുറച്ചു നാളേക്ക് ഠാണാവിൽ അടയ്‌ക്കേണ്ടതായുണ്ട് ഈ വിലക്കപ്പെട്ടവരെ”

പീഠപ്രമാണി തിരുവെങ്കിടാചലപതിയുടെ പേര് കേട്ടപ്പോൾ തന്നെ അത്രയ്ക്കും ഉന്നതമായ സ്ഥാനം വഹിക്കുന്ന വ്യക്തിയാണ് പീഠപ്രമാണി എന്നുള്ളതിനാൽ. ഭുവനേശ്വരി ദേവി കിടുകിടാ വിറച്ചു.

അനുചരൻ നമസ്കരം പറഞ്ഞു തിരിഞ്ഞു.

അന്നേരം, അഞ്ചു ഭിക്ഷു ബാലകന്മാർ തിരികെ പോകുവാനായി നടന്നു മാളികയുടെ കവാടത്തിനരികിൽ എത്തിയിരുന്നു.

പിന്നിൽ നടന്നയാൾ കൈകൊട്ടിയപ്പോൾ  കവാടത്തിനു പുറത്തു നിന്നിരുന്ന  എണ്ണം പറഞ്ഞ കരുത്തന്മാരായ രാജസേവകർ ഉള്ളിലേക്ക് വന്നു ഭിക്ഷു ബാലകന്മാരെ തടയുകയും ആ കുട്ടികളെ പോകാൻ അനുവദിക്കാതെ പിടിച്ചു വലിച്ചു തങ്ങൾ കൊണ്ട് വന്ന ജീപ്പിൽ കയറ്റി.

ആ അഞ്ചു ബുദ്ധ ഭിക്ഷു ബാലകരും മുഖത്ത് അൽപ്പം പോലും ഭയമില്ലാത്താതെ പുഞ്ചിരിതൂകി ആ ജീപ്പിൽ ഇരുന്നു.

അനുചരന്മാർ, കൊട്ടാരം വക ഠാണാവിലേക്ക് അവരെ തുറുങ്കിലടയ്ക്കുവാനായി കൊണ്ട് പോകുകയും ചെയ്തു.

അവരെ കൊണ്ട് പോകുന്നത് എന്തിനെന്നറിയാതെ  മാലിനിയും മറ്റുള്ളവരും , ജീപ്പിൽ പിന്നിലായി ഇരിക്കുന്ന ബാലകരെ നോക്കി.

മാലിനി വേഗം ഭുവനേശ്വരി ദേവിയുടെ അരികിലേക്ക് ഓടി ചെന്നു.

“എന്തിനാ ആയി ആ കുട്ടികളെ , കൊട്ടാരം സേവകർ കൊണ്ട് പോകുന്നത് ”

“മാളു,,അവരെ കൊണ്ട് പോകുന്നത് കൊട്ടാരകല്പനയനുസരിച്ചല്ല, ഈ വൈശാലിദേശത്ത് പ്രജാപതിതമ്പുരാക്കന്മാർ പോലും ആദരിക്കുന്ന  ദ്വിജോത്തമ ബ്രാഹ്മണികപീഠ പ്രമാണിയുടെ കൽപ്പനപ്രകാരമാണ്”

“എന്തിനു ,, ആ കുട്ടികൾ അവരെന്ത് തെറ്റാ ചെയ്തത് ആയി  ?” മാലിനി തിരക്കി.

“ബ്രാഹ്മണസമൂഹം, ഉന്നത സ്ഥാനം വഹിക്കുന്ന ഈ വൈശാലി മണ്ണിൽ കാൽ കുത്തിയതാണ് ആ ശ്രമണ കുട്ടികൾ ചെയ്ത കുറ്റം, അവരീ നാട്ടിൽ നൂറ്റാണ്ടുകളായി വിലക്കപ്പെട്ടവരല്ലേ, ഇന്നാട്ടിൽ നിന്നും നൂറ്റാണ്ടുകൾക്ക് മുന്നേ ആട്ടിപ്പായിച്ചവരല്ലേ ധർമോപദേശം നടത്തി ജനങ്ങളെ  വർണ്ണങ്ങൾക്ക്  എതിരെയാക്കുന്ന  ശ്രമണൻമാരെ, അപ്പോൾ ഇവിടെ വന്നത് തന്നെയാണ് ഏറ്റവും വലിയ കുറ്റം”

ഭുവനേശ്വരി ദേവി മറുപടി നൽകിക്കൊണ്ട് ഉള്ളിലേക്ക് നടന്നു.

@@@@@@@