അപരാജിതൻ 49 4678

“അപ്പോൾ ,,,കൃത്യമായി പറഞ്ഞാൽ ശങ്കരൻ കൃത്യം ട്രാക്കിലേക്ക് കയറിയല്ലേ ബാലുച്ചേട്ടാ, അതല്ലേ അവന്റെ തിരുവിളയാടൽ”

“അവൻ മുന്നേയും ട്രാക്കിൽ തന്നെയായിരുന്നല്ലോ, എവിടെയാണ് ട്രാക്ക് തെറ്റിയത് മനൂ,,തുടക്കം മുതലേ നോക്കൂ, അവൻ ശിവശൈലത്തു വന്നതു മുതൽ ഓരോ ഘട്ടങ്ങളായി കാര്യങ്ങളെ മുന്നോട്ട് കൊണ്ട് പോയത് തന്നെയല്ലേ,,അവൻ സ്വാമി മുത്തശ്ശൻ നെഞ്ചിൽ ശിവലിംഗം കെട്ടി ശാംഭവിയിൽ ചാടിയ നാൾ , ശിവശൈലത്തെ സാധുക്കൾ തന്നെയാണ് കാത്തിരുന്നത് എന്ന് മനസ്സിലാക്കിയ അന്ന് മുതലേ അവൻ ശരിയായ പാതയിൽ തന്നെയല്ലേ,,

“അത് ശരിയാ,,ശരിക്കും ആലോചിക്കുമ്പോൾ ബാലുച്ചേട്ടൻ പറഞ്ഞത് തന്നെയാ ശരി,അയ്യോ അത് പോട്ടെ , ഇന്ദുവിന്‌ എന്ത് സംഭവിച്ചു, അത് പറ ബാലുച്ചേട്ടാ,,,എനിക്കാകെ ടെൻഷനാകുന്നു,,ഒന്നും സംഭവിക്കില്ല എന്ന് മനസ്സ് പറയുന്നുണ്ട് എന്നാലും ബാക്കിയറിയാൻ എന്റെയുള്ളിന്റെ ഉള്ളിലൊരു വൃത്തികെട്ട ആകാംക്ഷ, വേഗം പറ ബാലുച്ചേട്ടാ,, എങ്കിലും ശങ്കരൻ ഒരു അന്യായ കക്ഷി തന്നെ,,എന്താ ആ ചന്തയിൽ കാണിച്ചു കൂട്ടിയത്,,ഹോ ഭയാനകം തന്നെ,, ത്രില്ലിംഗ് തിരുവിളയാടൽ,,,ഹെവി ഐറ്റം,,”

ബാലു ചിരിച്ചു കൊണ്ട് വെള്ളം കുടിച്ചു.

“മനൂ,,”

“എന്താ ബാലുച്ചേട്ടാ?”

“അതെ , ഇനിയങ്ങോട്ട് ചില ആളുകൾ വരുന്നുണ്ട്”

“എന്റെ പൊന്നുബാലുച്ചേട്ടാ ഇപ്പൊ ഉള്ളത് തന്നെ കൂടുതലാ, ഇനി പുതിയ ആളുകൾ കൂടെ വന്നാൽ”

ബാലു അതുകേട്ടു ചിരിച്ചു.

“മനൂ,,ഇനി വരുന്നവർക്ക് ഒരുപാട് ആദിയുടെ മുന്നോട്ടുള്ള പ്രയാണത്തിൽ ചില ഘട്ടങ്ങളിൽ മാത്രമേ പ്രാധാന്യമുള്ളൂ, അത് കഴിഞ്ഞാൽ പിന്നെയവർക്ക് സ്ഥാനമേയില്ല, ചില പ്രധാനകാര്യങ്ങൾ നിർവ്വഹിക്കാൻ അവരുടെ സാന്നിധ്യം അത്യാവശ്യമാണെന്ന് മാത്രം”

“അങ്ങനെയാണോ എങ്കിൽ കുഴപ്പമില്ല..ബാലുച്ചേട്ടാ , ഇല്ലെങ്കിൽ എനിക്ക് കണ്ഫ്യൂഷനാകുമെന്നെ”

“അതാകുമല്ലോ,,ഇപ്പോ മനസ്സിൽ വേറെ പലതുമല്ലേ നിനക്ക്,,”

“അതെന്താ ബാലുച്ചേട്ടാ ?”

“അനുമോൾ,,അല്ലാതെ വേറെയെന്താ”

“ശോ,,ബാലുച്ചേട്ടാ,,ഇങ്ങനെയൊക്ക പറഞ്ഞെന്റെ മനസ്സിനെയിളക്കല്ലെ,,ബാക്കി പറയു,,ഇതൊക്കെ ഇന്ന് പോയി അനുകുട്ടിക്ക് പറഞ്ഞു കൊടുക്കാനുള്ളതാ,,,കാത്തിരിക്കുവാ അവള് ,,,അറിയുമോ,,”

“ഹ്മ്മ് ,,,എന്നാ നമുക്ക് കഥയിലേക്ക് പോകാം”

ബാലു തുടർന്നു.

@@@@@

ചന്ദ്രവല്ലിയിൽ അറിവഴകൻ തിരുവിളയാടലാടുന്ന സമയം

മറ്റൊരിടത്ത് അതായത് ഹിരണ്യകേശി നദിക്കരയോരത്ത്

വൈശാലിയിലേക്ക് റോഡ് ഗതാഗത സൗകര്യങ്ങൾ ഉണ്ടെങ്കിലും നൂറ്റാണ്ടുകൾക്ക് മുന്നേ തന്നെ കിഴക്കൻമലയിറങ്ങി കാൽനടയായി വന്നിരുന്ന കച്ചവടക്കാർ, തീർത്ഥാടകർ, സന്ദർശകരെല്ലാം വൈശാലിയിലേക്ക് എത്തിയിരുന്നത് കടത്ത് കടന്നായിരുന്നു.

സ്വർണ്ണമുത്ത് വിരിയുന്ന ഹിരണ്യകേശി നദിയുടെ കിഴക്കേ ദിശയ്ക്ക് അക്കരനിന്നും വൈശാലിയിലേക്ക് ചെറുവള്ളത്തിൽ ആളുകളെയെത്തിക്കുന്ന പതിവുണ്ട്.