അനാമിക 5 [Jeevan] 296

അവൾ പുഞ്ചിരിച്ചു യാത്ര ചോദിച്ചു പോയി, ഞാൻ ലൈബ്രറിയിലേക്കും.

അവൾ പാർക്കിലൂടെ നടന്നു ആണ് കടയിലേക്ക് പോകാൻ തുടങ്ങിയത്. പാർക്കിൽ ഒരു ഇലഞ്ഞി മരമുണ്ട്. അതിന്റെ ചുവട്ടിൽ കെട്ടിയ സ്ഥലത്ത് അപ്പോൾ ആൽബിനും അവന്റെ ഫ്രണ്ട്സും ഉണ്ടായിരുന്നു.ആൽബിൻ ഒരു തല്ലിപ്പൊളി ആണ്. വട്ടൻ എന്നാണ്‌ ഇരട്ടപ്പേര് തന്നെ. ജൂനിയേർസിനെ ഊറ്റൽ, പെൺപിള്ളേരെ കമന്റടി ഒക്കെയാണ്‌ പ്രധാന ഹോബികൾ. അവന്റെ കൂടെ വേറെ ഉള്ളത് ജെറിനും, സുനിലും. തേർഡ് ഇയർ ആണ് മൂന്നു പേരും എങ്കിലും തേർഡ് ഇയർ  ഉള്ളവർക്കു പോലും ഇവന്മാരെ കണ്ടു കൂടാ. അത്ര നല്ല സ്വഭാവം.

കടയിലേക്ക് പോയ ആമി നേരെ ചെന്ന് പെട്ടത് ഇവന്മാരുടെ മുന്നിൽ. ഇതിൽ ആൽബിനും ഞാനും തമ്മിൽ ചെറിയ കച്ചറ നേരത്തെ ഉണ്ടായിട്ടുണ്ട്. അന്ന് ഫസ്റ്റ് ഇയർ ആയത് കൊണ്ടു പക്ഷെ ഒന്നും ചെയ്യാൻ ആയില്ല, നിന്നു കൊണ്ടു.

അവന്മാർ അവളെ തടഞ്ഞു നിർത്തി ഓരോന്ന് ചോദിച്ചു തുടങ്ങി. ആദ്യം പാട്ട് പാടാൻ പിന്നെ അവൾ ഡാൻസിൽ ഫേമസ് ആയിരുന്നത് കൊണ്ട് മുദ്ര ഒക്കെ കാട്ടി ഡാൻസ് ചെയ്യാൻ പറഞ്ഞു, അവൾ പേടിച്ച് നിന്നപ്പോൾ ഭീഷണി, പിന്നെ വൃത്തികെട്ട കമന്റ്‌ ഒക്കെ ആയി. ആമി നന്നായി പേടിച്ച് അവൾ കരയാൻ തുടങ്ങി. ഇതെല്ലാം ഒരാൾ കണ്ടു, “ഷാന ” ശ്രീയുടെ ക്ലാസ്സിൽ ഉള്ള കുട്ടിയാണ്. അവളുടെ ചങ്ക് ഫ്രണ്ട്. അവൾക്ക് ആമിയെ എനിക്ക് ഇഷ്ടം ആണെന്ന് അറിയാം ( സത്യത്തിൽ ആമിക്ക് ഒഴികെ കോളേജിൽ മൊത്തോം അറിയായിരുന്നു ). ഷാന ഞാൻ ലൈബ്രറിയിലേക്ക് കയറിപോകുന്നതും കണ്ടിരുന്നു. അവൾ നേരെ എന്നോട് പറയാനായി വന്നു.

ലൈബ്രറി ഓടി കയറി വന്നു അണച്ചു കൊണ്ടിരുന്ന ഷാന എന്നെ നോക്കി. ഞാൻ ന്യൂസ്‌ പേപ്പർ വായിച്ചു ഇരിക്കുക ആയിരുന്നു. അവൾ അടുത്തേക് വരുന്നത് കണ്ടു ഞാൻ ചിരിച്ചു കൊണ്ടു ചോദിച്ചു –

” ഇത് ആര് മൊഞ്ചത്തി ഷാനയോ… നീ ഇപ്പോളും കുളിക്കാറില്ലേടീ പഴേപോലെ തന്നെ ആണോ… വന്നപ്പോളേ ഒരു നാറ്റം… ”

” പോടാ നാറി… നീ ഇവിടെ തമാശിച്ചോണ്ടിരുന്നോ.. മറ്റേ വട്ടൻ ആൽബിനും ടീംസും നിന്റെ കൊച്ചിനെ അവിടെ ഇട്ടു കുളിപ്പിക്കുന്നുണ്ട്… ”

” എവിടെയാടി… എവിടെയാ അവൾ… ” ഞാൻ ചാടി എണീച്ചു ചോദിച്ചു, എന്റെ മുഖം ദേഷ്യം കൊണ്ട് ചുവന്നു.

” പാർക്കിലെ ഇലഞ്ഞി മരത്തിന്റെ ചോട്ടിൽ ഇണ്ടെടാ… വേഗം ചെല്ല്… ”